وڭتۇستىك كورەيانىڭ 75 جاستاعى تۇرعىنى چان چجە قارت الەۋمەتتىك مەديانىڭ وزىنە بەيتانىس، تىڭ دۇنيەلەردى ايەلى مەن ۇلىنىڭ كومەگى ارقىلى يگەرىپ، Instagram-عا جۇگىندى. ول ءوزىنىڭ  پاراقشاسىن عيبراتتى اڭگىمە ايتۋ قۇرالى رەتىندە پايدالانىپ، ءوزىنىڭ سالعان سۋرەتتەرىن ءۇش نەمەرەسىنە ارناپ وتىرعان.

ونىڭ Drawings for my Grandchildren اتتى اككاۋنتىنداعى شىعارمالىق تۋىندى قالىڭ قاۋىمنىڭ قىزىعۋشىلىعىن تۋعىزىپ، قازىرگى ۋاقىتتا 40،000 جازىلۋشىعا دەيىن تىركەلگەن. ونىڭ تابىسى كەزدەيسوقتىق ەمەس. بۇل قارت اتانىڭ ۇلى 45 جاستاعى Facebook، Instagram-نىڭ قولدانۋشىسى دجي ءليدىڭ يدەياسى بولاتىن.

وتباسى 1981 جىلى سان-پاۋلۋدان سەۋلگە قونىس اۋدارعان بولاتىن. ءبىراق ۇلى  دجي لي نيۋ-يوركقا قونىس اۋدارعان ۋاقىتتا ونىڭ تاتەسى، كۇيەۋى جانە ەكى بالاسىمەن بىرگە كورەياعا قايتۋعا شەشىم قابىلدايدى.

«مەنىڭ اكەم زەينەتكە شىققان بولاتىن جانە ۋاقىتىن مەنىڭ جيەندەرىممەن بىرگە وتكىزەتىن. ولاردى مەكتەپكە اپارۋ اكەمنىڭ ۋاقىتىنىڭ كوپ بولىگىن الاتىن. ولار كەتىپ قالعاننان كەيىن، ول ىستەرگە ءىس تاپپادى، بۇل، ارينە، انام ەكەۋمىزدى الاڭداتقىزدى. ءبىز ونىڭ تەز قارتايىپ بارا جاتقانىنا ابىرجۋلى بولدىق،»، –دەيدى لي مىرزا. 

اكەسىن جاڭا دۇنيەلەرگە ۇيرەتۋ ءۇشىن ايلار كەتكەنىن ايتادى. بايلانىستا قالۋ ءۇشىن نەمەرەلەرىنە ارناپ سۋرەت جۇكتەپ وتىرۋ كەرەك بولدى. «ول بۇل يدەيانى ۇناتپادى جانە Instagram-عا ونەر تۋىندىسىن جۇكتەپ وتىرۋدىڭ ماقساتىن تۇسىنبەدى. ءبىراق مەن ونى ۇيرەتۋدى ءجون كوردىم» ،– دەدى نيۋ-يوركتاعى ۇيىنەن BBC News-قا بەرگەن سۇحباتىندا.

«ءبىراق مەن اكەممەن كۇندە وتىردىم، ءبىر كۇنى مەنىڭ ۇلىما توسىنسىي جاسايىق دەپ اكەمە ۇسىنىس تاستادىم. بۇل جاعدايدى تولىعىمەن وزگەرتۋگە سەپتىگىن تيگىزدى. ونىڭ ۇيرەنۋگە دەگەن تالپىنىسى ارتا ءتۇستى.   

«ءقازىر ول رەداكسيالاۋدىڭ ءتۇرلى قۇرالدارىن ۇيرەنىپ الدى. Instagram اكەمنىڭ ءومىرىن تولىقتاي وزگەرتتى. سول كەزدەن باستاپ، ول كۇنىنە ءبىر سۋرەت سالادى. مەنىڭ انام اڭگىمەلەر جازادى، ال اكەم ولارعا ءومىر سىيلايدى. 

دينوزاۆرلار، پاندالار، قاھارمان باتىرلار مەن تابيعات – چان چجە جۇمىسىنىڭ نەمەرەلەرىنە ارنالعان نەگىزگى تاقىرىبى. كۇندەلىكتى ءومىر مەن كورەي مادەنيەتى دە تىس قالمايدى. ول بۇل سۋرەتتەر ارقىلى ومىرلىك ءمانى بار ساباقتارعا ۇيرەتەدى، ويىمەن بولىسەدى، ءتىپتى جەكە حابارلامالاردى دا الىپ جۇرەدى. ولار ءۇش تىلگە: اعىلشىن، كورەي، پورتۋگال تىلدەرىنە اۋدارىلعان.

«سەنىڭ اجەڭ – سۋپەر ايەل. ول قولىندا ءبىر بالانى الىپ جۇرسە، ەكىنشىسىن ارتىنا سالىپ الادى. بالالار، ءوتىنىش، ۇمىتپاڭدار!» دەگەن جۇرەك جىلىتار جازباسى دا بار.

اكەسىنىڭ وقيعاسىن قالىڭ كوپشىلىكپەن ءبولىسۋدى ءجون ساناعان دجي لي Facebook-تان ۆيدەو ارقىلى ءبولىسىپ قويادى. بۇل ۆيدەو ۆيرۋس سياقتى تەز تارالعان. 18000 رەاكسيا جيناپ، 1،3 ملن ادام تاماشالاعان ەكەن. ول بۇل ۆيدەونىڭ تانىمال بولاتىنىن ەش كۇتپەگەنىن ايتادى. «مەن ۇيىقتاۋعا جاتتىم، تۇرعانىمدا Instagram-داعى جازىلۋشىلار سانى بىردەن 40000-عا ارتقانىن كوردىم»،– دەيدى ۇلى.

Facebook-تاعى مىڭداعان قولدانۋشىلار چان چجەنىڭ وقيعاسى ولاردىڭ جۇرەكتەرىن ەلجىرەتكەنىن ايتادى. «ءتىرى مۇرا، مازمۇندى اڭگىمەلەر، ادەمى سۋرەتتەر» دەپ جەلىدە باعا بەرۋشىلەردىڭ سانى وتە كوپ.