الماتىدا ەل تاۋەلسىزدىگىنىڭ 25 جىلدىعىنا ارنالعان “التىن دومبىرا-2016” رەسپۋبليكالىق اقىندار ايتىسى ءوتتى. “التىن دومبىرانى” وسىمەن ەكىنشى مارتە سىر ءوڭىرىنىڭ اقىنى مۇحتار نيازوۆ جەڭىپ الدى. كوپشىلىك وسى شاراداعى ەركەبۇلان قاينازاروۆ پەن مۇحتار نيازوۆتىڭ اراسىنداعى ايتىستىڭ وتە تارتىستى وتكەنىن، ەركەبۇلاننىڭ مۇحتارعا قاراتىپ ايتقان شۋماقتارى كوپتىڭ كوڭىلىنەن شىققانىن ايتادى. ەندەشە ەركەبۇلان مۇحتارعا نە ايتتى، وقىپ كورەلىك:
…شەيح مۇحتار يبن نياز ال-اقمەشىت،
اقيداڭ ءاھلي-سۇننا ساۋاپ دەسىپ.
جاينامازدا جولىققان جىگىتتەر ەك،
ءبىر تاۋلىكتە بەس رەت «قامات» دەسىپ.
كەرى قاراي جۇرەتىن بولدىڭ ءقازىر،
اسىعىس ماسەلەڭدى اعات شەشىپ.
جاز بويى استاناعا كەلمەپ ەدىڭ،
تۋعاندى ەر تۋعان جەردە قالاد دەسىپ.
ارقار اۋعان ايازدا اۋىسىپسىڭ،
اقمەشىتتەن ارقاعا قار اپ كوشىپ.
اياق استى ايازعا ۇرىنعان سوڭ،
ءجۇرمىسىڭ جىرتىق پەنەن جاماپ تەسىك؟
وتقا جاعىپ جىلىنعان سەكىلدىسىڭ،
شالبارىڭنىڭ بالاعىن شولاق كەسىپ.
اۋزىڭدى ۇسىك شالىپ كەتپەسىن دەپ،
شىعىپتى-اۋ ساقالىڭ دا زاماتتا ءوسىپ.
حانافي ەكەنىڭدى بىلمەيتىندەر
شاتاساتىن بولدى عوي ءسالاف دەسىپ.
بۇل ساقال بولماسا دا جىگىتكە ايىپ،
تالايلار ءجۇر ىسىنەن شىعىپ تايىپ.
ءقازىر ەل ساقالدىدان شوشىپ ءجۇر عوي،
دەسەك تە كوڭىلىڭىزدى سۋىتپايىق.
قارسىلاستىڭ كەلبەتىن كورگەننەن سوڭ
كەۋدەمدە بارا جاتىر كۇدىك بايىپ.
كەشە عانا قالانى قان قاقساتقان
قىلمىسكەردىڭ سۋرەتىن سۇرىپتايىق.
ءاي، بالا، بەرى قاراشى، قاتتى ۇقسايسىڭ،
كاللەكتيۆىڭ ەمەس پە كۇلىكبايەۆ؟
مىنانى بۇل ايتىسقا قالاي قوسقان؟
ءتىزىمدى قاراپ ءجۇر ەد قىرىقبايەۆ.
اتىستىڭ ماڭايىندا جۇرگەندەردى
ايتىستىڭ ماڭايىنا جۋىتپايىق.
شىققان سوڭ جاقسىلاپ تەكسەرەيىك،
كەتپەسىن ءبىر تاكسيگە ءمىنىپ تايىپ.
مۇحامەدجان اعا، بالل بەرەر كەزدە
ءداستۇرلى ءدىنىمىزدى ۇلىقتايىق.
قازاقيا ەلىنىڭ ۇستانىمى
حانافي ەكەندىگىن ۇمىتپايىق!
دەرەككوز: saigez.kz
