بۇگىن، 7 جەلتوقسان كۇنى م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا اقىن، انشى-كومپوزيتور ەرمۇرات زەيىپحاندى ەسكە الۋ كەشى ءوتتى.
ق ر مادەنيەت قايراتكەرى، جازۋشىلار وداعىنىڭ مۇشەسى، كومپوزيتور، ءانشى، اكتەر، قالامگەر ەرمۇرات زەيىپحان بيىل ءتىرى بولسا ەردىڭ جاسى 50-گە كەلەر ەدى. 45-ىندە ارامىزدان وزعان دارىن يەسىن ەسكە الۋعا جينالعان حالىقتىڭ قاراسى كوپ بولدى. ەسكە الۋ كونسەرتىنە ەرمۇرات زەيىپحاننان تۋعان-تۋىستارى، قالامداستارى، قارۋلاستارى، دوستارى جينالدى. ولاردىڭ ىشىندە كلاسسيك جازۋشى قابدەش ءجۇمادىلوۆ، اقىن جاركەن بودەش سياقتى قازاق ادەبيەتىنىڭ اقساقالدارى دا بار. سونداي-اق ول تۋىپ-وسكەن شىعىس تۇركىستاننان كوزىن كورگەن اۋىلداستارى، دوستارى كونسەرتكە ارنايى كەلدى.
«ەكى دۇنيەدە جالعىزىم – قازاقستان» كونسەرتى مادەنيەت جانە سپورت ءمينيسترى ارىستانبەك مۇحامەدي ۇلىنىڭ ارنايى جىبەرگەن جۇرەكجاردى حاتىمەن باستالىپ، ەرمۇرات زەيىپحاننىڭ بار ارمان-مۇراتىن بويىنا سىڭىرگەن «كوك تۋدىڭ جەلبىرەگەنى» انىمەن شىمىلدىعىن ءتۇردى. كونسەرتكە قازاقستاننىڭ ەڭبەك سىڭىرگەن ارتىستەرى، مادەنيەت قايراتكەرلەرى، قوعام قايراتكەرلەرى جانە جۇڭگو ەلىنەن تانىمال ونەر يەلەرى كەلىپ ەرمۇرات زەيىپحاننىڭ ەل اراسىنا تارالعان اندەرىن ورىندادى. 2 ساعاتقا سوزىلعان كونسەرتتەن اۋەلەگەن ءان تىڭداۋشىسىنىڭ جۇرەگىنە جەتىپ، ەرمۇرات زەيىپحاننىڭ ەل ەسىندەگى بەينەسى جاڭعىرا ءتۇستى.
ەسكە الۋ كەشىنەن سوڭعى قوناقاسىندا الماتى وبلىسى تالعار اۋدانى ءماسليحاتىنىڭ دەپۋتاتى ءابدىعاني ءپازىلقان ۇلى جينالعان قاۋىمعا ەرمۇراتتىڭ اتىنا تالعار قالاسىنان كوشە بەرىلەتىنىن ايتىپ سۇيىنشىلەدى. بۇدان بىلاي، تالعار قالاسىنداعى شوسسەينايا كوشەسى ەرمۇرات زەيىپحان كوشەسى دەپ اتالادى.
ەرمۇرات زەيىپحان، جۇڭگو حالىق رەسپۋبليكاسى شىڭجاڭ ولكەسى، ىلە ايماعى كۇنەس اۋدانىندا دۇنيەگە كەلگەن. تاۋەلسىزدىكتىڭ العاشقى جىلدارى شەتەلدە تۇراتىن ميلليونداعان قانداسىمىزدىڭ اراسىنان اتامەكەنگە العاشقى بولىپ ات باسىن بۇرعان تالانتتى جاستاردىڭ ءبىرى بولاتىن. جاسىنداي جارق ەتىپ وتە شىققان 45 جىل عۇمىرىندا «سىبىزعى سارىنى»، «وزىڭە ارنادىم» «ءۇش بۋرىل»، «بۇ دۇنيە» سياقتى پروزالىق شىعارمالار مەن ولەڭدەر جيناعىن جارىققا شىعاردى. قورعانىس مينيسترلىگىنىڭ وركەسترىندە قىزمەت ەتىپ، «كوك تۋدىڭ جەلبىرەگەنى»، «كۇنەس-اي»، «ەكى دۇنيەدە جالعىزىم – قازاقستان»، «جايلاۋىم – ءانىم»، «كەنەسارى»، «قىزاي انا» سياقتى رۋحتى اندەر سىيلادى.
