باتىستىڭ رەسەيگە قاتاڭ سانكسياسى جالعاسا بەرسە، الەمدىك ەكونوميكاعا اۋىر ءتيىپ، مۇنايدىڭ قۇنى 1 باررەل ءۇشىن 200 دوللارعا دەيىن شارىقتاۋى مۇمكىن. ونداي جاعدايدا ەۋروپادا گاز قىمباتتاپ، ونەركاسىبى دامىعان جەتەكشى ەلدەر ءىجو-نىڭ 2،4 - 3،5 پايىزىنان قاعىلادى. قازاقپاراتتىڭ مالىمدەۋىنشە بۇل تۋرالى Oxford Economics كونسالتينگتىك كومپانياسىنىڭ ساراپتاماسىندا جازىلعان.

«رەسەيدىڭ مۇناي مەن گازىنا ەمبارگو جاريالانسا، ول جاعدايدى قاتتى كۇردەلەندىرۋى مۇمكىن، باتىس ەلدەرىنىڭ كوشباسشىلارى وعان جول بەرمەۋ ءۇشىن بارىن سالىپ وتىر»، - دەيدى Oxford Economics ساراپشىسى ادام سلەيتەر. سەبەبى، ماسەلە ۋشىققان جاعدايدا الەمدىك نارىقتا ەنەرگيا تاسىعىشتاردىڭ تاپشىلىعىنان ەۋروايماق 2015 جىلدىڭ باسىندا ءىجو-نىڭ 3،5 پايىزىن جوعالتادى، ال اقش-تا بۇل كورسەتكىش - 3%، جاپونيادا - 2،4 پايىزعا جەتپەك.

«Brent» ماركالى مۇنايدىڭ ورتاشا قۇنى 2014 جىلعى باعا بويىنشا باررەل ءۇشىن 108،8 دوللاردى قۇراپ وتىر (Bloomberg دەرەكتەرى). باعانىڭ شارىقتاعان كەزى 2008 جىلدىڭ ماۋسىمىندا تىركەلگەن (1 باررەل - 147،5 دوللار). ەكونوميستەردىڭ ايتۋىنشا، سول 2008 جىلعى مۇناي باعاسىنىڭ ءوسۋى جاھاندىق داعدارىستىڭ باستى سەبەبى بولعان.

«اقش-تا 1974 جىلدان باستاپ، بارلىق ەكونوميكالىق داعدارىسقا مۇناي باعاسىنىڭ ءوسۋى سەبەپ بولىپ كەلەدى»، - دەپ جازعان امەريكالىق ساراپشى دجەيمس حەميلتون. ەۋروپادا مۇنداي دامۋ كورسەتكىشىمەن 2014 جىلدىڭ ەكىنشى جارتىسىندا تەحنيكالىق رەسەسسيا بولادى. ناقتىراق ايتقاندا، ەڭ ءبىرىنشى ۆەنگريا، پولشا، تۇركيانىڭ ەكونوميكاسى زارداپ شەگەدى. گاز قۇنى 15 پايىزعا ءوسىپ، مۇناي شامامەن 10 پايىزعا كوتەرىلەدى. ال امەريكا مەن ازيادا مۇنىڭ سالدارى شەكتەۋلى بولۋى مۇمكىن. مامانداردىڭ پىكىرىنشە، اقش پەن جاپونيانىڭ ءىجو 2014 جىلدىڭ سوڭىنا قاراي تەك 0،5 پايىزعا تومەندەيدى.

 “قامشى-اقپارات”