10 مامىردا وسكەمەن قالاسىندا قاسيەتتى رامازان ايىنىڭ قارساڭىندا قازاقستان مۇسىلماندارى ءدىني باسقارماسىنىڭ ءتورالقا ءماجىلىسى ءوتتى، دەپ حابارلايدى قامشى اقپاراتتىق اگەنتتىگى.

القالى جيىنعا باس ءمۇفتي ەرجان قاجى مالعاجى ۇلى، نايب مۇفتيلەر – سەرىكباي قاجى وراز، ناۋرىزباي قاجى تاعان ۇلى، قمدب اپپارات جەتەكشىسى عىلىمبەك ماجييەۆ، قمدب ءبولىم مەڭگەرۋشىلەرى، قمدب-نىڭ وبلىستارداعى وكىل يمامدارى قاتىستى.

قمدب باسپا ءسوز قىزمەتىنىڭ مالىمەتىنشە، باسقوسۋدا رامازان ايىندا قايىرىمدىلىق اكسيالارىن كوبىرەك ۇيىمداستىرۋ، مەدرەسەلەرگە شاكىرت جىبەرۋ، «زەكەت» قورىنىڭ جۇمىسىن جانداندىرۋ، ءپىتىر ساداقانىڭ ولشەمىن بەكىتۋ، جاڭا مەشىتتەرگە ات قويۋ، مەشىت اۋلاسىن كوركەيتۋ، رەسپۋبليكالىق اقپاراتتىق-ناسيحاتتىق توپتىڭ جۇمىسىن پىسىقتاۋ، ت.ب. ماسەلەلەر تالقىلاندى.

سونداي-اق، بيىلعى رامازان ايىندا بەرىلەتىن ءپىتىر ساداقا مولشەرى انىقتالدى.

ءار وبلىستاعى بيدايدىڭ باعاسى ەسكەرىلىپ، ورتاق مولشەرمەن بەكىتىلدى. ءتورالقا ءماجىلىسى مۇشەلەرىنىڭ ءبىراۋىزدى شەشىمىمەن بيىلعى ءپىتىر ساداقا مولشەرى – 300 تەڭگە بولىپ بەكىتىلدى.

ايتا كەتەيىك، ءپىتىر ساداقانى قۇرمانىڭ، مەيىزدىڭ، ارپانىڭ، بيدايدىڭ قۇنىمەن دە بەرۋگە بولادى.

ەگەر ءپىتىر ساداقانى بيدايمەن بەرەتەن بولساڭىز، ءار ادام ءۇشىن جارتى ساع. ال جارتى ساع 1 كەلى 625 گراممعا تەڭ. اقشامەن ەسەپتەگەندە (ءار ايماقتىڭ بيداي باعاسىنا قاراي) 1 كەلى 625 گراممنىڭ قۇنىن بەرۋ كەرەك. قۇرما، مەيىز، ارپادان دا ءبىر ساعتىڭ (3،25 كگ) قۇنىن بەرۋ قاجەت.  

ەسكە سالا كەتەيىك، ءپىتىر ساداقانى رامازان ايىنىڭ ءبىرىنشى كۇنىنەن ورازا ايت نامازىنا دەيىن بەرۋگە بولادى.

شولۋشى: گۇلىم جاقان