1943-44 جىلدار ارالىعىندا فاشيستەر №1 پولوسكيي بالالار ءۇيىنىڭ تاربيەلەنۋشىلەرىن دونور رەتىندە پايدالانعىسى كەلگەن دەپ جازادى قامشى اقپاراتتىق اگەنتتىگى.

بالالار ءۇيىنىڭ ديرەكتورى ميحايل ستەپانوۆيچ فورينكو بالالاردىڭ ءومىرىن ساقتاپ قالۋعا بەل بايلادى. ول بالالاردىڭ اعزاسىن العانعا دەيىن ولاردىڭ دەنساۋلىعىن تۇزەۋ ماقساتىندا بالالار مەن بالالار ءۇيىنىڭ قىزمەتكەرلەرىن بەلچيسا اۋىلىنا كوشىرۋدى ۇسىنادى. وسىلايشا بالالارعا ءتونىپ تۇرعان ءقاۋىپتى ۋاقىتشا سەيىلتتى. ەندىگى قادام بالالاردى پارتيزاندىق ايماققا شىعارىپ، ۇشاقپەن الىپ كەتۋ ەدى.

1944 جىل اقپان ايىنىڭ 18-نەن 19-نا قاراعان ءتۇنى اۋىلدان 154 بالالار ءۇيىنىڭ تاربيەلەنۋشىلەرى، 38 تاربيەشى جانە قۇپيا «بەسستراشنىە» توبىنىڭ مۇشەلەرى مەن چاپايەۆ اتىنداعى ششورسا بريگاداسى اۋىلدان شىقتى. بالالاردىڭ جاسى 3-تەن 14-كە دەيىن بولدى.

كىشكەنتايلاردىڭ ءوزى ءقاۋىپتى سەزدى. فاشيستەر ءبىلىپ قويعان جاعدايدا ولاردى ۋاقىتشا تەجەيتىن كەزەكشى پارتيزاندار بولدى. ورماندا ولاردى شاناعا جەگىلگەن پوەزد كۇتىپ تۇردى. ۇشقىشتار كوپ كومەگىن تيگىزدى. ولار بەلچيي اۋىلىن اينالدىرا ۇشىپ جاۋدىڭ كوڭىلىن باسقاعا اۋدارۋعا تىرىستى.

اسپاندا جارىق راكەتالار پايدا بولسا جەرگە وتىرىپ، قيمىلداماۋ قاجەتتىگى تۋرالى بالالارعا ەسكەرتىلدى. بالالاردىڭ بارلىعىن دىتتەگەن جەرگە جەتكىزدى. ەندى بالالاردى فرونتتان تەزىرەك شىعارۋ قاجەت ەدى. سەبەبى نەمىستەر بالالاردىڭ جوقتىعىن بىردەن بايقادى. ۇشاقتار بالالاردى شىعارا باستادى. ابىروي بولعاندا بالالاردى ولىمنەن ساقتاپ قالعان.