روبوتوتەحنيكا – قازاقستاننىڭ ءبىلىم بەرۋ مەكەمەلەرىندە ەنگىزىلىپ جاتقان جاڭا باعىتتاردىڭ قاتارىندا دەپ جازادى قامشى اقپاراتتىق اگەنتتىگى ق ر ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ. بۇگىندە رەسپۋبليكامىزداعى جۇزدەگەن مەكتەپ پەن جوعارى وقۋ ورنىندا وتە باستاعان بۇل ارالاس ءپاننىڭ قۇرامىندا ءبىرقاتار قولدانبالى پاندەر بار. بولاشاق روبوت قۇراستىرۋشى ماتەماتيكا مەن فيزيكانى، ينفورماتيكا مەن سىزۋدى، باسقا دا ءبىرقاتار عىلىم سالاسىن مىندەتتى تۇردە مەڭگەرۋى ءتيىس. ال وتكەن جىلدان باستاپ وقىعاندارى مەن ۇيرەنگەنىن تاجىريبە جۇزىندە قولدانۋعا مۇمكىندىك بەرىلۋى وسى ءبىر ەرەكشە ماماندىقتىڭ قىزىعىنا بويلاعان قازاقستاندىق بالالار ءۇشىن اسا ماڭىزدى قادام بولدى.
ءبىلىم جانە عىلىم مينيسترلىگىنىڭ باستاماسىمەن ەلىمىزدەگى ءبىرقاتار ءبىلىم بەرۋ مەكەمەلەرى جاڭا LEGO Education جيىنتىقتارىمەن جابدىقتالدى، ونىڭ كومەگىمەن ويعا العان ەڭ باتىل جوبالاردى دا جۇزەگە اسىرۋعا بولادى، اتاپ ايتقاندا، كوپتەگەن مۇمكىندىگى بار جانە ءبىرقاتار قىزمەتتى اتقاراتىن ناعىز روبوتتاردىڭ ۇلگىسىن جانە باعدارلاماسىن جاساۋعا بولادى. دەمەۋشىلەردىڭ قارجىسىنا الىنعان 400 سىنىپ-كومپلەكت ارقاسىنا شامامەن 20 مىڭ مەكتەپ وقۋشىسى تاجىريبە جۇزىندە روبوت قۇراستىرا الادى. بۇل قىزىقتى ءارى بولاشاعى زور باعىتتى دامىتۋ بويىنشا العاشقى قادام عانا.
بيىلعى ءساۋىر ايىنىڭ سوڭىندا قاراعاندى قالاسىندا وتكەن «RoboLand-2017» فەستيۆالى جوعارى تەحنولوگيالى قۇرال-جابدىقتارعا جۇمسالعان اقشانىڭ تەككە كەتپەگەنىن كورسەتتى. مۇنى ق ر ءبىلىم جانە عىلىم ءمينيسترى ەرلان ساعادييەۆ تە اتاپ ايتتى، مينيستر ءوز سوزىندە روبوتوتەحنيكانىڭ بۇگىنگى كۇنى ەل دامۋىنىڭ باسىم باعىتتارىنىڭ ءبىرى ەكەنىنە توقتالدى. ءبىلىم ءمينيسترى بيىلعى وقۋ جىلىندا بولاشاعى زور وسى ءپاندى وقيتىن وقۋشىلاردىڭ سانى ەكى ەسەگە ارتاتىنىنا ۋادە بەردى.
روبوتوتەحنيكا كۋرستارىنىڭ باعدارلاماسىمەن ارىپتەستىك ورناتقان قازاقستاندىق مەكتەپتەردىڭ ديرەكتورلارى بۇل وقۋشىلاردىڭ لوگيكاسىن دامىتىپ، موتوريكاسىن جەتىلدىرىپ، باسقا دا قابىلەتتەرىن اشادى دەپ ەسەپتەيدى. ءارى پروسەسس قىزىقتى بولعاندىقتان، بالالار جالىقپايدى. مەكتەپ باسشىلىعى وكىلدەرىنىڭ بۇل پىكىرىمەن كەلىسپەسكە امال جوق، كورنەكى قۇرال رەتىندە بالا كۇننەن جاقسى تانىس قۇراستىرعىش كۋبيكتەر پايدالانىلاتىن ساباقتى جاقسى كورمەۋ مۇمكىن ەمەس. وقۋدىڭ قىزىقتى بولا ءتۇسۋىنىڭ تاعى ءبىر سەبەبى، مىندەتتەردى شەشۋ تەك تاجىريبەنى عانا ەمەس، سونىمەن بىرگە شىعارماشىلىق كوزقاراستى قاجەت ەتەدى. سونداي-اق، روبوتوتەحنيكا كۋرسىنىڭ باعدارلامالارى ءارتۇرلى توپقا ارنالعانىن دا اتاپ ايتقان ءجون: مەكتەپكە دەيىنگى بالالارعا، باستاۋىش سىنىپ وقۋشىلارىنا جانە ورتا سىنىپ وقۋشىلارىنا.
بالالار مەكتەپتەگى قانداي دا ءبىر پاندەردى ۇناتپاۋى مۇمكىن، ءبىراق روبوتوتەحنيكا ەلەمەنتتەرىمەن بىرىككەن ۋاقىتتا ولار ويىن فورماسىندا وتەدى. مەكتەپ باسشىلارىنىڭ باقىلاۋىنشا، بالالار ءبىلىم جانە عىلىم مينيسترلىگىنىڭ جاڭا باستاماسىن قۋانا قابىلداعان: ويتكەنى كونسترۋكتورلار بالا كەزدەن-اق ۋاقىتتى قىزىقتى وتكىزۋمەن ەستە قالادى. وقۋشىلار بۇرىنعىدان گورى ىنتالى بولا تۇسكەن، ويتكەنى روبوتوتەحنيكا كۋرسى تەك وقۋ عانا ەمەس، ويىن دا.
البەتتە، مەكتەپ باسشىلارى ءۇشىن ءوز مەكتەپتەرىنىڭ بەدەلى دە الدىڭعى قاتاردا. ديرەكتورلار روبوتوتەحنيكا كۋرستارىمەن ارىپتەستىك بايلانىس ورناتقان مەكتەپتىڭ الدىڭعى قاتارلى وقۋ ورداسى بولاتىنىن، باسەكەلەستەرىنىڭ اراسىندا قۇرمەتكە يە بولاتىنىن دا جاقسى تۇسىنەدى. اتا-انالار دا بۇل جاڭالىقتى قۋانا قابىلداپ وتىر: كەيبىر اتا-انالار مەكتەپ تاڭداعان ۋاقىتتا دا روبوتوتەحنيكا كۋرسىنىڭ بولۋىنا نازار اۋداراتىن بولادى. ويتكەنى، اتا-انالار روبوت تەحنيكاسىن مەڭگەرۋ بالانىڭ بولاشاعى ءۇشىن ۇلكەن مۇمكىندىك ەكەنىن جاقسى تۇسىنەدى.
مەكتەپ ديرەكتورلارى روبوتوتەحنيكا باعدارلاماسى وقۋشىلاردىڭ مۇمكىندىگىن اشا تۇسەدى دەپ ەسەپتەيدى. بۇل مەكتەپ باسشىلارى مەن پەداگوگتارعا جوعارى سىنىپقا كوشكەن بالالاردى بەيىندىك باعىتقا بولگەن ۋاقىتتا دا كاسىبي تۇرعىدا قاراۋعا كومەكتەسەدى دەپ بىلەدى. باعدارلاماعا قاتىسۋ ارقىلى مەكتەپتەن تىس جەردە دە بالا ءوزىن كورسەتە الادى: بالالاردىڭ روبوتوتەحنيكا بويىنشا حالىقارالىق وليمپياداعا قاتىسۋعا، مەكتەبىنىڭ عانا ەمەس، ەلدىڭ دە نامىسىن قورعاۋعا مۇمكىندىگى بار. ال جالپى العاندا، مەكتەپ ديرەكتورلارى مەن ديرەكتوردىڭ ورىنباسارلارى روبوتوتەحنيكا كۋرستارىن ءبىلىم بەرۋدىڭ يننوۆاسيالىق تاسىلگە كوشۋىنىڭ ۇلگىسى دەپ بىلەدى. بۇل كۋرستار وقۋ ورىندارىنىڭ «قازاقستان-2050» مەملەكەتتىك باعدارلاماسىنا ىلەسۋىنە دە جاردەمدەسەدى.
