26 مامىر كۇنى قازاق ەلىندە، قازاق جەرىندە قازاقتىڭ ناعىز ازاماتتارى قويعان ۇلى كەش ءوتتى. «بىزبەن بىرگە» دەپ اتالاتىن قايىرىمدىلىق شوۋ كونسەرتى زالعا جينالعان ءدۇيىم جۇرتتىڭ جۇرەگىن باستالماي جاتىپ جاۋلادى.

الاش ۇلى توبى – 2009 جىلى ت. جۇرگەنوۆ اتىنداعى ونەر اكادەمياسىنىڭ قابىرعاسىندا قۇرىلعان ۇلتتىق ءداستۇردى ۇلىقتاعان مۋزىكالىق توپ. بۇگىندە بار قازاققا تانىلىپ ۇلگەرگەن. «ءبىر اتانىڭ ەمەس، بارشا الاشتىڭ ۇلى بولايىق» دەگەن نيەتتەگى ازاماتتاردىڭ باستى ماقساتى – جاستاردىڭ رۋحىن كوتەرىپ، قازاقتىڭ ۇلتتىق ونەرىن كەڭىنەن ناسيحاتتاۋ، قازاق ەلىن جاھانعا تانىتۋ. بۇگىنگى تاڭدا ۇمىت بولىپ جاتقان تەرمەلەر مەن جىرلاردى قايتا جاڭعىرتۋ، تاريحىمىزدى ۇلىقتاۋ. سول ماقساتتارىنا جەتتى دە. «بىزبەن بىرگە» كەشى سونىڭ ناق ايعاعى. اتا سالتىن ارداقتاعان «الاش ۇلىنىڭ» اندەرى جۇرتتىڭ دەلەبەسىن قوزدىراتىن مانەرىمەن بىردەن جۇرەكتەردى جاۋلاپ الدى. ۇستىندەگى ۇلتتىق كيىمدەرى دە، بيلەرى دە «الاش ۇلى» دەگەن اتقا لايىق جاراسىپ، ەرەكشە وزىندىك ستيلدەرىن تانىتا ءبىلدى.

«باتىرلار ۇرانى»، «گيككاي»، «ۋگاي»، «ەلىم مەنىڭ اڭساعان»، «جۇرەگىم قازاق»، «بىزدە ءبارى قازاقشا»، «تۇرانىم»، «پاي-پاي»، «ماحامبەتتىڭ جىرى»، تاعى دا باسقا اندەرى قازاق جەرىن تۇگەل شارلاپ، جۇرەكتەرگە جەتىپ، رۋحتاندىرا بىلگەن ۇلى كۇشكە يە. سول كۇشتى حالىققا سەزدىرە العان «الاش ۇلى» توبىنىڭ جىگىتتەرىنىڭ ورنى الاش جۇرتى ءۇشىن قاشان دا بيىكتە.

«بىزبەن بىرگە» شوۋ كونسەرتىنە جينالعان جۇرتتىڭ ءبىر دە ءبىرى نەمقۇرايلى وتىرمادى، ءبارى اتسالىستى، انشىلەرمەن قوسا ءان شىرقادى، بيلەدى،  شاپالاقتى ۇزاق سوقتى. سەبەبى جىگىتتەردىڭ اندەرى حالىقتىڭ جۇرەگىنە جەتتى. كىشكەنتاي عانا «الاتاۋ» ءداستۇرلى ونەر تەاترىندا قويعان كەشتەرى ءاپ ساتتە ۇلكەن شوۋعا اينالا كەتتى.

توپ انشىلەرىنىڭ «ەندىگى كەشىمىزدى رەسپۋبليكا سارايىندا دۇركىرەتىپ وتكىزگىمىز كەلەدى» دەگەن اق ارمانىن ءدۇيىم جۇرت قولدادى.  وزدەرىن الار اسۋى الدا ەكەنىن ايتادى الاشتىڭ جىگىتتەرى. 

قامشىگەر: گۇلىم جاقان