32 جاستاعى مايكل ديەۆيستىڭ اتا-اناسى لوتەرەيادان 101 ملن. فۋنت جەڭىپ الادى دەپ جازادى قامشى اقپاراتتىق اگەنتتىگى شەتەلدىك باق-قا سىلتەمە جاساي وتىرىپ. ولار اقشانىڭ جارتىسىن قايرىمدىلىق قورىنا بەرىپ، قالعانىن تۋىسقاندارى  مەن دوستارىنا بەرەدى. سونىمەن بىرگە جالعىز ۇلى مايكلعا 1 ملن. فۋنت بەرگەندە، العاشىندا مايكل قاتتى قۋانادى. ءبىراق قولىنا تۇسكەن اقشانى مايكل 1 ايدىڭ ىشىندە جاراتىپ تاستاپ، اتا-اناسىنان تاعى دا  5 ملن. فۋنت بەرۋىن سۇرايدى. ءبىراق اتا-اناسى ۇلىنىڭ  بۇل ءوتىنىشىن ورىندامايدى.

«مەنىڭ ءومىرىم ۇنەمى وسىنداي بولادى دەپ ويلادىم.  اقشا كوپ بولىپ ەشقاشان بىتپەيتىندەي كورىندى. ءبىراق اتا-انامنىڭ ءوتىنىشىمدى ورىنداماۋى مەن ءۇشىن اۋىر سوققى بولدى»،- دەيدى مايكل. ول شىنىمەن دە سولاي ويلاعان. ءتىپتى ول اقشا قولىنا تۇسكەننەن كەيىن جۇمىستان دا شىعىپ كەتىپتى. 

وسى وقيعادان كەيىن مايكل ءوز اتا-اناسىن سوتقا بەرەدى. ءوز اتا-اناسىنىڭ ىس-ارەكەتىن ادامگەرشىلىككە جاتپايدى دەپ ەسەپتەپ سوتقا ارىز جازىپتى. ونىڭ ايتۋى بويىنشا اتا-اناسىنىڭ جالعىز ۇلىنا 1 ملن. فۋنتتى عانا ءبولىپ بەرۋى دۇرىس ەمەس ەكەن. الايدا سوت ونىڭ ارىزىن قابىلدامادى.

«مايكلدا كەرەمەت مۇمكىندىك بولدى. ول قولىنداعى اقشامەن ءوز ويىنداعىداي ءومىر سۇرۋىنە بولاتىن ەدى. الايدا ول مۇمكىندىكتى پايدالانا المادى»، - دەپ مالىمدەدى سوت.

شولۋشى: اسەل وتەشوۆا