ون سەگىز مىڭ عالامنىڭ يەسى اللا تاعالا جەر مەن اسپاندى جانە ەكەۋىنىڭ اراسىنداعى دۇنيەنى التى كۇندە جاراتقانى ءمالىم. ءبىر اپتادا جەتى كۇن بولسا، سونىڭ ءارقايسىسىنىڭ وزىندىك قادىر-قاسيەتى بار دەپ جازادى قامشى اقپاراتتىق اگەنتتىگى mazhab.kz-كە سىلتەمە جاساي وتىرىپ. سونى تاراتىپ ايتساق:

دۇيسەنبى ساۋدا جاساۋعا، ساپارعا شىعۋعا قولايلى كۇن. ساۋدا-ساتتىق وڭىنان كەلىپ، ساپار ءساتتى بولادى. مۇحاممەد (س.ع.س) پايعامبارىمىزعا جەبىرەيىل پەرىشتە ارقىلى اللادان العاش حابار كەلگەن كۇن دە وسى كۇن.
پايعامبارىمىزبەن مۇحاممەد (س.ع.س) دۇيسەنبى دۇنيەگە كەلىپ جانە سول دۇيسەنبىدە باقيلىق بولعان.
حازىرەت يبراھيم قاعبا قۇرىلىسىنا كىرىسىپ، اياقتادى.
جاڭا قۇرىلىس باستاعاننىڭ ءىسى وڭىنان كەلىپ، جولى بولادى.
تىرناق العاننىڭ اقىلى ارتىپ، زەيىندى، ۇقىپتى، ىستەرى ونەگەلى بولادى.

سەيسەنبىدە حاۋا انا قايىز قانىن كورگەن.
قابىل باۋىرى ءابىلدى قانعا بوكتىرگەن.
يبراھيم ەلى قاسيەتتى سيىقتىڭ اجالىنا جەتكەن.
بۇل كۇنى تىرناق الۋعا بولمايدى، وكپە-رەنىش تۋۋى مۇمكىن. ساتسىزدىكتەردىڭ ساباقتاسىپ كەتۋى دە عاجاپ ەمەس.
ساحابالار اللانىڭ ەلشىسىنەن: «بۇل قانداي كۇن؟» -دەپ سۇراعاندا، «قاندى كۇن»، – دەپ جاۋاپ بەرگەنى سوندىقتان.

سارسەنبى دۇشپانعا قارعىس تيگەن كۇن. اللانىڭ ەلشىسى مۇنى «ناحاس كۇن» دەپ اتاعان.
وتە ءساتتى كۇن سانالىپ، جولعا شىعۋعا، جاڭا ىستەردى قولعا الۋعا بولادى.
تىرناق، شاش الۋعا تىيىم سالىنعان، پەيىل بۇزىلادى دەلىنەدى.

بەيسەنبءى اللانىڭ ەلشىسى «جاقسى كۇن» دەپ اتاپتى، تىلەگەن تىلەگىڭ قابىل بولىپ، ءتاڭىرى سۇراعانىڭدى بەرەتىن كۇن.
بۇل كۇنى مۇسا (ع.س.) پايعامبار مىسىرعا كەلگەن.
حازىرەت ءجۇسىپ (ع.س.) پايعامباردىڭ اتاسى مەن اعالارى زىنداننان شىعىپ، قايتا قاۋىشقان.
اللانىڭ ەلشىسى مەككەنى ءدىنىمىزدىڭ استاناسى ەتكەن.
تىرناق پەن شاش الدىرعاننىڭ اۋرۋى كەتىپ، كۇللى اۋرۋ-سىرقاۋعا شاپاعات-ەمى مول كۇن.

جۇما كۇنى پايعامبارلار – ءجۇسىپ (ع.س.) زىليقامەن، حازىرەت مۇسا (ع.س) ساپۋرامەن، مۇحاممەد (س.ع.س) حاديشا جانە ايشامەن، ازىرەت ءالى فاتيمامەن نەكەلەستى.
حازىرەت ادام اتا (ع.س) جۇمادا جاراتىلىپ، تىرشىلىك يەلەرىن تانىپ، ءجاناتقا كىرىپ، راحاتىن كوردى.
بۇل كۇنى تىرناعى مەن شاشىن الدىرعاننىڭ باق-داۋلەتى ارتىپ، مولشىلىققا كەنەلەدى.
مۇسىلمان بالاسى دۇنيەدەن وتسە، يمانى كامىل.
تۇندە جاراتقانعا جالبارىنىپ، عيبادات جاساسا، تىلەگى قابىل.
ارۋاقتارعا قۇران باعىشتاپ، ساداقا جاساۋ ساۋاپ.

سەنبى – سەيىل كۇنى. التى پايعامبارىمىز – نۇح، سالىق، ءجۇسىپ، مۇسا، يسا جانە مۇحاممەد (س.ع.س) اڭشىلىققا شىعىپ، سەيىل-سەرۋەن قۇرعان.
تىلەگى ءبىر، ماقسات-مۇددەسى ورتاق جانداردىڭ باس قوسىپ، ەمىن-ەركىن بوي جازاتىن كۇنى.
تىرناق الۋعا بولمايدى، جاراقات الۋى مۇمكىن.
باسقا نەندەي ىسكە ساتتىلىك تىلەسە دە، تالابى وڭعارىلادى، جۇمىسى العا باسادى.

جەكسەنبى كۇنى باستالعان قۇرىلىس تەز ءارى ساپالى بىتەدى.
جەمىس اعاشتارىن وتىرعىزسا، تەرەڭ تامىر جايادى، قاۋلاپ وسەدى.
حريستياندار ءۇشىن قاسيەتتى كۇن بولعانىمەن، مۇسىلمانعا اۋىرلاۋ كۇن.
بۇل كۇنى تىرناق السا، مال-مۇلىك ازايىپ، داۋلەتتىڭ بەرەكەسى قاشادى دەگەن ىرىم بار.

بابالاردان بىزگە جەتكەن ءبىر امانات وسى. اقيقاتىندا، اپتانىڭ قايسى كۇنىندە بولسىن، جان مەن ءتاننىڭ، ماقسات پەن نيەتتىڭ تازالىعى ساقتالسا، پەندەنىڭ رۋحى ءوسىپ، كەمەلدەنە تۇسەدى. كورگەن كۇننىڭ جامانى جوق، قاناعات پەن شۇكىرشىلىك، سابىر مەن تاعات بولسا – دۇنيەنىڭ ارتى قايىرلى.