بويداق كۇندەردەگى ماحاببات قاشان دا بال-شىرىن. سول كۇندەردە عۇمىر بويى ءسۇيۋ، ماڭگىلىك ماحاببات دەگەندەرگە ءار عاشىق اينىماستاي سەنەدى. الايدا ۇيلەنگەن سوڭ تۇرمىس كۇيبەڭى ارالاسقان سەزىمنىڭ باعدارى باسقا ارناعا اۋىسىپ كەتەرىن تۇرمىس قۇرعاندار عانا جاقسى بىلسە كەرەك. ونىڭ جايىن جاستار، ءتىپتى، سەزىنە دە الماس. الايدا، ماحابباتتى ماڭگىلىك الاقاندا ايالاپ ۇستاي الۋ - ەرلى-زايىپتىلاردىڭ ەكەۋىنىڭ دە بورىشى، مىندەتى. بۇل جايعا نەمقۇرايلى قاراۋ قاسىرەتكە اپارىپ سوعادى. اجىراسۋ كەزىندەگى مىنا جىگىتتىڭ حاتىن قامشى اقپاراتتىق اگەنتتىگى asylarna.kz- كە سىلتەمە جاساي وتىرىپ وقىرمان نازارىنا ۇسىنادى.

 ۇيلەنگەنگە دەيىن مەنىڭ كوڭىلىمنەن تەرەڭ ورىن الدىڭ. ۇنەمى مەنى شىعىنداتۋعا اۋەس ەدىڭ. بىرەسە ونى الامىن، بىرەسە مۇنى الامىن دەپ قيعىلىق سالساڭ دا، بارىنە ماقۇل دەر ەدىم. الايدا، ۇيلەنگەن سوڭ، ءبارى باسقا ارناعا اۋىستى. قيالىڭدا اقشا جيناۋدان باسقا وي جوق. جالاقىمدى تۇگەلدەي تاپسىرۋدى تالاپ ەتتىڭ. ايەل زاتىنىڭ ءار قاراجاتتى كۇيەۋىمەن اقىلداسىپ، مۇمكىن بولسا وتباسىن ەر ازامات باسقارۋى ءتيىس ەكەنىن بىلمەيتىن بە ەدىڭ؟!

ۇيلەنۋدەن بۇرىن، قاشاندا الدىمنان سۇلۋ بولىپ شىعاتىنسىڭ. ال ۇيلەنگەن سوڭ شە؟! وتباسىندا وز-وزىنە ونشا كوڭىل اۋدارمايتىن، قۇددى ءبىر سالاق ايەلدەر سەكىلدى كەيىپكە ەندىڭ. مەنى سۇلۋلىققا قۇمارتۋدان ماقۇرىم ەتتىڭ. ال سىرتقا شىعاتىن بولساڭ، ەلدەن ەرەك ساندەنىپ الاسىڭ. مەن سوندا عانا سەنىڭ بار سۇلۋلىعىڭ ماعان ارنالماعانداي ازاپتى كۇي كەشتىم.

ۇيلەنۋدەن بۇرىن اقىلدى قالپىڭمەن مەنى ەرەكشە باۋرايتىنسىڭ. ول كەزدەگى سەنىڭ الدىڭداعى سەزىمىمدى بەينەلەۋگە ءقازىر ءتىلىم جەتپەس ەدى. ال ۇيلەنگەن سوڭ شە؟! بارلىعىن ءوزىم باسقارامىن دەپ تۇرىپ الدىڭ. ءار ءىستى ءوز بەتىڭمەن، ءوز شەشىمىڭمەن اتقاراسىڭ. ءبىر رەت بولسىن، مەنىڭ ءتىلىمدى الىپ كوردىڭ بە؟! سەنىڭ نازارىڭداعى ەركەك قايدا كەتتى سوندا؟!

ۇيلەنۋدەن بۇرىن، مەنى اقىلدى، ىسكەر دەپ ماقتايتىنسىڭ. قىزمەتتە، كاسىبىمدە تابىسقا جەتۋىمە قولداۋ كورسەتىپ وتىراتىن ەدىڭ. ال ۇيلەنگەن سوڭ، سەن مەنىڭ جاساعان جاقسىلىقتارىمدى كورمەيتىن بولدىڭ. قانشا قاراجات تاپسام دا سەن ءۇشىن ول از بولدى. ءسال كەمشىلىگىمدى كورسەڭ، قالعان بار جاقسىلىعىمدى ءراسۋا ەتىپ، جوققا شىعاردىڭ.  

ۇيلەنۋدەن بۇرىن، ءار ءسوزىم ساعان سونداي ماعىنالى، ءتاتتى سەزىلەتىن. ول كەزدە ءوزىمدى جۇرت كوزىنە كەڭپەيىل كورىنەتىن شىعارمىن دەپ ويلاۋشى ەم. ۇنەمى سىرلاساتىن ەدىك. ال ۇيلەنگەن سوڭ، ساعان ايتقان ءاربىر سىرىم، ءاربىر كەڭەسىمنىڭ سوڭى ۇرىسپەن اياقتالىپ جاتتى. كەي ساتتەردە سول بۇرىنعىداي ساعان بار سىرىمدى اقتارىپ، سىرلاسقىم كەلەدى. مەنى ءتۇسىنۋىڭدى، سىپايى مامىلە جاساۋىڭدى قالادىم. الايدا، تاعى دا ۇرىس-كەرىسپەن اياقتالاتىنىن ءبىلىپ تۇرعاندىقتان سەنىمەن سويلەسۋدى قويدىم.

 ومىردە كىناسىز، ءمىنسىز ەشكىم بولمايدى. ۇنەمى وسىنىڭ ءبارى ءوز كىنامنان بولار دەپ ويلايمىن. سويتەم دە، بۇرىنعى جۇرگەن قالپىما قايتقىم كەلەدى. قاي جەردەن قاتە جىبەردىم؟ قايتسەم تۇسىنەمىن؟ دەپ كوپ ويلاندىم. الايدا ءوز كىناسىن تانىپ-بىلە الار ادام شىنىمەن-اق از ەكەنىنە كوزىم جەتتى. مۇمكىن بار كىنامدى سەن بىلەرسىڭ، سەن ايتارسىڭ. مەن وتكەن كۇندەرىمدى قاتتى ساعىندىم، سول كۇندەرگە قايتىپ بارعىم كەلەدى. كىتاپ وقىعان كەزىمدە قاسىمدا وتىرىپ جالىقپاي تىڭدايتىن ساتتەرىڭدى، جانىما شۋاق شاشار مەيىرىمدى كۇلكىڭدى ساعىندىم. دەگەنمەن، ەندى ءبارى ورالماسقا كەتتى... باقىت قاشاندا ەرلى-زايىپتىلاردىڭ ەكەۋىنە دە ورتاق. ال سەن باقىتتى بولامىن دەپ كەتىپ باراسىڭ! ءبىراق، سەن ءبىل، بارىن باعالاپ، قاناعات ەتە بىلمەگەن جۇرەك بايلىققا شومىلسا دا ءوزىن كەدەي سەزىنەتىنىن! جانە تاعدىر قوسقان جارىنان تاپپاعان باقىتتى ايەل شايتان سالعان شاتتىقتان تابا المايتىنىن ۇمىتپاعايسىڭ...

شولۋشى: اسەل وتەشوۆا