بۇرىنعى كەزدەرى «اجىراسىپ كەتىپتى» دەگەن جامان ءسوزدى ءتىپتى دە ەستىمەيتىن ەدىك. ال ءقازىر ءجيى ەستيتىن بولدىق دەپ جازادى zamana.kz. 

ءتىپتى ەكى-ۇش جىل بىرگە ءجۇرىپ ۇيلەنسە دە جارتى جىلعا جەتپەي اجىراسىپ جاتقاندار بار. سونداي-اق ءبىر-بىرىن ۇناتقان جاستارعا اتا-اناسى كەدەرگى كەلتىرەتىن وقيعالاردى دا ەستيتىن بولدىق.

تاياۋدا ماعان جاقىن قۇربىم قوڭىراۋ شالدى. داۋسىنان ءابىرجۋ، اسىعىستىق بىلىنەدى. «جاقسى قىز بولسا تاۋىپ بەرشى ماعان. ەكى-ۇش كۇن اراسىندا تۇرمىسقا شىعاتىن قىز كەرەك بولىپ تۇر»، – دەيدى. مەن ونىڭ مۇنىسىن ونشا تۇسىنبەي قالدىم. ويىم سان-ساققا كەتتى. سودان نە بولىپ قالدى ەكەن دەپ ونىڭ ۇيىنە بارعانمىن.

بارسام، قۇربىمنىڭ ۇيىندە كوپ ادام جينالىپ، ءبىر نارسەنى قىزۋ تالقىلاپ وتىر. سول جەردە قىز ىزدەگەن جىگىتتىڭ دە بارىن ءبىلدىم.  ەسىمى ەرلان ەكەن. بارلىق ءمان-جايدى ماعان سول ايتىپ بەردى.

ەرلان وسىدان ەكى جىل بۇرىن ءنازيرا ەسىمدى قىزبەن تانىسىپ، ەكەۋى جاقسى ارالاسىپتى. كەيىن ەرلان ونى ءوزىنىڭ ۇي-ىشىمەن تانىستىرادى. ءنازيرا جىگىتتىڭ اتا-اناسىنا دا قاتتى ۇناپ قالادى. سودان اكە-شەشەسى ەرلانعا بيىلدان قالماي ۇيلەن، ايتپەسە مىناداي قىزدان ايىرىلىپ قالاسىڭ دەۋدى جيىلەتىپتى.

سودان ەكى جاستىڭ اتا-اناسى تانىسىپ، ءبىر ءدامحانادا «ءتاتتى شاي» ىشكەن. ءبىراق ءنازيرانىڭ اكە-شەشەسى ەكى جاستىڭ ۇيلەنۋلەرىنە ۇزىلدى-كەسىلدى قارسى بولىپتى.

ءبىراق ارادا بىرنەشە كۇن وتكەننەن كەيىن ەرلان ءنازيرانى الىپ قاشىپ كەتەدى. ءوزىنىڭ كەلىسىمىمەن. بۇل كەزدە ەرلاننىڭ ءۇيى قىزۋ دايىندىق ۇستىندە ەكەن. اناسى قاتتى قۋانىپ، ءنازيرانىڭ ماڭدايىنان ءسۇيىپ، وڭ اياقپەن تابالدىرىق اتتاتقىزادى. بەتاشارعا قىزۋ دايىندىق بولىپ جاتقان كەزدە حابارشىعا ادامدار كەتەدى.

الايدا جينالعان جۇرتقا تاماق بەرىلىپ، بەتاشار­عا دايىندالىپ جاتقان كەزدە ءنازيرانىڭ اكەسى تورگى بولمەگە اشۋلى كۇيمەن كىرىپ كەلىپ ايقايعا باسا جونەلەدى. «سوت­قا بەرەمىن! مەن سەندەرگە قازاقشالاپ ايتتىم عوي قىزىمدى بەرمەيمىن دەپ!» – دەگەن ول ءنازيرانىڭ باسىنداعى ورامالدى جۇلىپ الىپ لاقتىرىپ جىبەرىپتى. قىزىنىڭ: «وسى ۇيدەن كەتپەيمىن. ەرلاندى جاقسى كورەمىن»، – دەپ ەڭىرەپ جىلاعانىنا قارامايدى. ۇرىپ-سوعىپ، اۋىلىنا اكەتىپ قالادى.

«ءنازيراعا وبال بولدى. وبالىنا قالدىم-اۋ! اتا-اناسىنىڭ ونداي ادامدار ەكەنىن قايدان بىلەيىن؟..» – دەگەن ەرلان مۇڭايىپ وتىرىپ قالدى. كوزىنەن جاس شىعىپ كەتتى.

...قىسقاسى، اتا-اناسى تويعا دايىندالىپ قويعان ەرلانعا سول كۇنى اياق استىنان بىرەۋدى الىپ كەلۋ كەرەك بولىپتى. «ەكى-ۇش كۇننىڭ ىشىندە تۇرمىسقا شىعاتىن قىز» ىزدەۋ سودان باستالعان ەكەن.

بۇل جەردە مەن اكەنىڭ ءوز قىزىنىڭ تاعدىرىنا سونشالىقتى قاتىگەزدىكپەن قاراعانىنا تاڭمىن. پەرزەنتىنىڭ كوز جاسى سەلت ەتكىزبەگەن ول كىسىنىڭ سونداعى ارمانى نە ەكەن؟ باي جەرمەن قۇدا بولعىسى كەلدى مە؟ ولاي دەيىن دەسەڭ، ەرلاننىڭ وتباسى دا جەرگە قاراپ وتىرعان جوق، ءبىر اۋىلعا بەدەلى بار وتباسى ەكەن.

قالاي بولعاندا دا ەكى جاستىڭ جۇرەگىنە جارا ءتۇستى. وعان قىز اتا-اناسىنىڭ سەبەپكەر بولعانى وكىنىشتى.

ر. ءومىرجان قىزى