ەمما ۋيۆەردىڭ كۇيەۋى اقش اسكەرىنىڭ جوعارعى لەيتەنانتى تودد ۋيۆەر اۋعانستانداعى قىزمەتى بارىسىندا ولتىرىلگەن. ايەلى ومىرىندەگى كۇيەۋىمەن بايلانىستارىعان بار دۇنيەنى جيناماق بولادى.

جەرلەۋ ءراسىمى اياقتالىپ 2 كۇن وتكەن سوڭ ەمما كۇيەۋىنىڭ نوۋتبۋگىن اشادى. سول كەزدەگى كورگەنى ايەلدىڭ كوزىنە ەرىكسىز جاس كەلتىرگەن.

جۇمىس ۇستەلىندە ەكى Word قۇجاتى تۇردى. بىرىندە «قىمباتتى ەمما» دەپ، ەندى بىرىندە «قىمباتتى كايلي» دەپ تۇردى. كايلي ەكەۋنىنىڭ جالعىز قىزدارى ەدى.

جانارى جاسقا تۇنعان ەمما قۇجاتتاردى اشىپ، تودد قالدىرعان حاتتى وقي باستادى.

ەمماعا جازىلعان حاتتىڭ مازمۇنى مىناداي ەدى:

قىمباتتى ەمما!

ەگەر سەن بۇل حاتتى اشقان بولساڭ، مەن ۇيگە قايتپادىم دەگەن ءسوز. ساعان دەگەن ماحابباتىمدى تاعى دا جەتكىزە المادىم دەگەن ءسوز.

مەن سەنى قاتتى سۇيەمىن، ءومىر بويى ءسۇيىپ وتەتىن بولامىن. جانىڭدا بولماسام دا، ساعان جوعارىدان قاراپ جۇرەتىنىمدى ويلاپ، كوڭلىم جاي تابادى.

مەن ءاردايىم سەنىڭ جانىڭدامىن، مەنىڭ رۋحىم سەنىمەن بىرگە. ءقازىر قينالىپ وتىرعانىڭدى بىلەم، ءبىراق سەن مىقتىسىڭ عوي.

ۇمىتپا، قۇداي ءبىز ءۇشىن قالاي جاقسى دەپ تاپسا، سونى ىستەيدى، بىزگە تەك جاقسىلىق تىلەيدى. مۇنىڭ ءبارى كەزدەيسوق بولعان جاعدايلار ەمەس. سەنۋ قيىن، بىلەم، ءبىراق سوعان كوزىڭ جەتەتىن كۇن كەلەدى.

مەن ءۇشىن سەنىڭ ورنىڭ ماڭىزدى، سونى ءبىلىپ ءجۇر. جانىمدا سەنەن وزگە قامقور، سۇلۋ، مەيىرىمدى جاردى ەلەستەتە المايمىن. سەنىمەن وتكىزگەن ءار كۇنىم – ومىرىمدەگى ەڭ كەرەمەت شاقتار.

مۇمكىن ءومىرىم تىم قىسقا بولعان شىعار، ءبىراق مەن اركىمگە بۇيىرا بەرمەيتىن ەڭ كەرەمەت كۇندەردى باستان كەشتىم، شەكسىز باقىتتى بولدىم. سەبەبى، الەمدەگى ەڭ ءمىنسىز جار ماعان تيەسىلى بودى، ەڭ سۇيكىمدى، ەڭ ءتاتتى قىز مەنىكى بولدى. ءتىپتى ەڭ ادال يتتەر مەندە بولدى. بۇدان ارتىق نە كەرەك؟ جانىڭ جابىرقاسا، ەكەۋمىزدىڭ باقىتتى ساتتەرىمزدى ەسىڭە ال. ءبىزدىڭ قىزىمىزعا قارا دا، ونىڭ اسقان سۇلۋلىعىن كور.

قىزىمىز ءۇشىن مىقتى بول. اكەسى ونى قاتتى جاقسى كورەتىنىن كۇندە ەسىنە سالىپ ءجۇر.

ونىڭ دۇنيەگە كەلگەن كۇنى مەنىڭ ومىرىمدەگى ەڭ باقىتتى كۇن بولدى. ونىڭ كۇلكىسى، جىميعانى – مەنىڭ ءومىرىمنىڭ عاجابى. اكەسى ونى ءاردايىم قورعاپ جۇرەتىنىن ءبىلسىن.

سەنى شەكسىز سۇيەمىن، ەمما. باقىتىم وسىمەن ءتامام دەپ ويلاۋشى بولما. باقىتىڭدى ىزدەۋدى جالعاستىر. بۇل مۇمكىن ەمەستەي كورىنەدى، بىلەمىن، ءبىراق ەڭسەڭ تۇسپەسىن.

الدا سەنى جاقسى كۇندەر كۇتىپ تۇر. كايلي ەكەۋىڭ ءالى دە تالاي باقىتقا كەنەلەسىڭدەر.

سەنىڭ كۇيەۋىڭ، تودد.

كەلەسى حات كايليگە تيەسىلى، مازمۇنى مىناداي:

قىمباتتى كايلي، كۇنىم مەنىڭ!

مەنى ەسىڭە تۇسىرە المايتىن شىعارسىڭ، ءبىراق اكەڭنىڭ سەنى قاتتى جاقسى كورەتىنىن ۇمىتپا.

سەن 9 ايلىق بولعاندا مەن اۋعانستانعا اتتاندىم. سەنى تاستاپ، الىسقا اتتانۋ مەن ءۇشىن وتە قيىن بولدى.

سەن مەنىڭ كۇنىمسىڭ عوي، بارىمسىڭ، قۇدايدىڭ بەرگەن ەڭ كەرەمەت سىيىسىڭ.

سەنىڭ دۇنيەگە كەلگەن كۇنىڭ – مەنىڭ ءومىرىمدى تۇبەگەيلى وزگەرتكەن كۇن.

سەن كۇلگەن سايىن، مەن ەرەكشە باقىتقا كەنەلەمىن. مەنىڭ ءومىرىمدى جارىق كۇنگە اينالدىرعان اسىل قىزىم، سەنىڭ قالاي وسكەنىڭدى كورە المايتىنىما قاتتى وكىنەمىن.

ءبىراق، ەسىڭدە ساقتا – اكەڭ ءاردايىم جانىڭدا.

سەن الەمدەگى ەڭ باقىتتى قىزسىڭ، سەبەبى سەنىڭ كەرەمەت اناڭ بار. ءتارتىپتى قىز بولىپ، اناڭا قاشان دا قولعابىس بول.

ءار ءتۇنى اناڭ ءۇشىن دۇعا ەت.

ءبىز سەنى بار جان-تانىمىزبەن جاقسى كورەمىز. مەكتەپكە بارعاندا، كوپ ىزدەنۋگە، كوپ بىلۋگە ۇمتىل.

اينالاڭا قامقورلىقپەن قارا، مەيىرىمىڭدى توك، سول كەزدە تابيعات ساعان بار جاقسىلىعىن توگەدى.

ەگەر ءبارى سەن قالاعانداي بولماسا، ۇمىتپا، قۇداي ساعان نەنىڭ كەرەك، نەنىڭ كەرەك ەمەس ەكەنىن جاقسى بىلەدى.

سەنىڭ بولاشاعىڭ جارقىن.

ءومىر ءسۇر. كوڭىل كوتەر. اكەڭ سەنىمەن ماقتانادى، سەنى جاقسى كورەدى.

ۇلكەن ماحابباتپەن، اكەڭ.

حاتتى وقىعان ەمما الەمگە جار سالۋدى ويلاماعان، الايدى بۇل حاتتار جاقىنىن جوعالتقان وزگە ادامدار ءۇشىن كۇش بەرۋى مۇمكىن. ءسويتىپ، الەۋمەتتىك جەلىگە تاراتتى.

شولۋشى: گۇلىم جاقان