-اللو، بۇل ىزدەۋ بيۋروسى ما؟ تەلەفوننىڭ ار جاعىنان كىشكەنتاي بالانىڭ داۋسى ەستىلدى.
ء-يا، بالاقاي. بىرنارسە جوعالتتىڭ با؟
-مەن انامدى جوعالتتىم. ول سىزدەردە ەمەس پە؟
-اناڭنىڭ قانداي ەكەنىن ايتشى، قانە؟
-ول – وتە سۇلۋ، مەيىرىمدى. سوسىن ول مىسىقتاردى جاقسى كورەدى.
-ساعان جاقسى جاڭالىعىمىز بار. كەشە ءبىر انانى تاپقانبىز، سەنىڭ ايتقاندارىڭمەن سايكەس كەلەدى. سەن قايدان حابارلاسىپ تۇرسىڭ؟
-№3 جەتىمدەر ۇيىنەن.
-جاقسى، جاقىندا ساعان اناڭدى جىبەرەمىز. كۇت.
مىنە، بولمەگە ەڭ سۇلۋ، مەيىرىمدى، قولىنا مىسىق ۇستاعان ايەل كىرىپ كەلدى.
-انا! – قۋانىشتان ايقايعا سالعان بالا ايەلگە قاراي جۇگىردى. ونى قۇشاقتاعانى سونشالىق، ەشقاشان جىبەرمەستەي كورىندى. – اناشىم مەنىڭ!
ارتەم ءوزىنىڭ داۋسىنان ءوزى شوشىپ وياندى. مۇنداي تۇستەردى سوڭعى كەزدەرى ءجيى كورەتىن بولدى. قولىن جاستىعىنىڭ استىنا سالىپ، قىزدىڭ سۋرەتىن الىپ شىقتى. سۋرەتتى اۋلادا ويناپ جۇرگەندە تاۋىپ العان ەكەن. ءسويتىپ، ونى كوزىنىڭ قاراشىعىنداي ساقتاپ كەلەدى، سەبەبى سۋرەتتەگى الگى قىزدىڭ اناسى ەكەنىنە سەنىمدى بولدى. ءار ءتۇنى سۋرەتكە قاراپ جاتىپ، ۇيىقتاپ ءجۇردى.
تاڭ اتا جەتىمدەر ءۇيىنىڭ مەڭگەرۋشىسى انگەلينا يۆان قىزى ادەتتەگىدەي بولمەلەردى ارالاپ، ءار بالانى ءسۇيىپ شىقتى. ارتەمنىڭ جانىنا جاقىنداي بەرگەندە توسەگىنىڭ استىنان قىزدىڭ سۋرەتىن بايقاپ قالادى. سۋرەتتى كوتەرىپ، ارتەمنان كىم ەكەنىن سۇرايدى.
-ارتەم، مىنا سۋرەت سەندە قايدان ءجۇر؟
-كوشەدەن تاۋىپ الدىم.
-بۇل كىم؟
-مەنىڭ انام. ول ادەمى، مەيىرىمدى جانە مىسىقتاردى جاقسى كورەدى، - دەپ جىميدى بالاقاي.
مەڭگەرۋشى ويعا باتىپ كەتتى، سەبەبى سۋرەتتەگى قىزدىڭ كىم ەكەنىن جاقسى ءبىلدى. ول ەرىكتى دوستارىمەن جەتىمدەر ۇيىنە كەلىپ تۇراتىن، سۋرەتىن سول كەزدە ءتۇسىرىپ العان بولۋ كەرەك. قىزدىڭ بالا اسىراپ العىسى كەلگەن نيەتى دە جوق ەمەس ەدى، سول ءۇشىن كوپ كۇش جۇمسادى. الايدا تۇرمىستا بولماعاندىقتان بۇل مۇمكىن ەمەس ەدى.
-بۇل سەنىڭ اناڭ بولسا، وندا ءىستى وزگەرتەمىز، - دەدى انگەلينا يۆانوۆنا.
بىرنەشە كۇننەن سوڭ مەڭگەرۋشىنىڭ بولمەسىنە سۋرەتتەگى قىز كىردى دە، قۇجاتقا تولى پاپكاسىن ۇستەل ۇستىنە قويدى.
-مىنە، ءبارىن جيناپ ءبىتتىم، - دەدى.
-جاقسى، الينا. سىزگە قوياتىن بىرنەشە سۇراعىم بار. ءۇردىس سونداي. ءسىز وتە ۇلكەن جاۋاپكەرشىلىككە بارىپ تۇرعانىڭىزدى بىلەسىز بە؟ بالانى ءومىر بويىنا الىپ تۇرسىز...
ء-بارىن تۇسىنەمىن. بىلەسىز بە؟ ءبىر ادامعا كەرەك ەكەنىمدى ءبىلىپ تۇرىپ بىرگە ەمەس ەكەنىمىزدى ويلاسام، جانىم جاي تاپپايدى.
-جاقسى، بالالاردى قاراپ شىققىڭىز كەلمەيدى مە؟
-جوق، قارامايمىن، انگەلينا يۆان قىزى. ءسىز اكەلگەن العاشقى بالانى الامىن، - دەدى الينا.
مۇنداي جاۋاپتى كۇتپەگەن انگەلينا قىزعا كوزىن الماستان قاراپ قالدى.
ء-بارى ناعىز انالاردىڭ باسىنان وتكەرگەندەي بولعانىن قالايمىن. انالار بالاسىن تاڭدامايدى عوي. مەن ناعىز انا بولعىم كەلەدى، - دەدى قوبالجىپ وتىرعان الينا.
ء-دال وسىنداي اسىراپ الۋشىلىقتى ءبىرىنشى رەت كورۋىم. ءسىزدىڭ كىمگە انا بولاتىنىڭىزدى مەن بىلەمىن. ونىڭ ەسىمى ارتەم، جاسى 5-تە، تۋعان اناسى پەرزەنتحانالار ۇيىندە-اق بالاسىنان باس تارتقان. دايىن بولساڭىز، ءقازىر اكەلەيىن، - دەدى مەڭگەرۋشى.
-دايىنمىن، ماعان ۇلىمدى كورسەتىڭىز.
بولمەدەن شىعىپ كەتكەن مەڭگەرۋشى ءبىراز ۋاقىتتان سوڭ بالامەن كەلدى.
-ارتەم، تانىسىپ قوي، بۇل...
-انا! - دەپ ايقاي سالدى ارتەم. – اناشىم!!!
الينانى قۇشاعىنا باسقان بالانىڭ قۋانىشىندا شەك جوق.
-بالام، بالام مەنىڭ... مەن ەندى سەنىڭ جانىڭدامىن...
ءسويتىپ قۇجاتتارىن دايىنداپ بولىپ، الينا ارتەمدى الىپ كەتپەك بولادى. بالانىڭ ءجۇزى بال-بۇل جايناعان، ءتىپتى اناسىنىڭ قولىن ءبىر ساتكە دە جىبەرمەيدى. ءبار دايىن بولعان سوڭ بالا مەڭگەرۋشىمەن قوشتاسىپ، جەتىمدەر ۇيىنەن شىعىپ كەتەدى.
ۇيىنە قايتىپ بارا جاتقان بالا اناسىنا ماڭىزدى سۇراعىن قويادى:
-انا، سەن مىسىقتاردى جاقسى كورەسىڭ بە؟
-قاتتى جاقسى كورەمىن. مەنىڭ ەكى مىسىعىم بار، - دەپ جىميدى الينا ۇلىنىڭ كىشكەنتاي عانا الاقانىن قىسىپ.
جاۋاپقا ريزا بولعان ارتەم قادامدارىن نىق باسىپ، كوڭىلدى جۇزبەن اناسىنىڭ ارتىنان ەرىپ كەلەدى.
دايىنداعان: گۇلىم جاقان
پىكىر قالدىرۋ