تارازداعى كوشى-قون پوليسياسى ارقىلى قۇجات راسىمدەگەن قانداستار ەندى ەلدەن قۋىلۋى مۇمكىن. ويتكەنى ءار ەلدەن اتاجۇرتقا قونىس اۋدارعان 250 ادامعا بەرىلگەن ىقتيار حاتتىڭ ەكى جىلدان كەيىن جارامسىز ەكەنى انىقتالعان. سوندىقتان بۇل كىسىلەردىڭ ەندى قازاقستاندا ءجۇرۋى زاڭسىز. وسىلايشا قۇزىرلى ورىن وكىلدەرىنىڭ كەسىرىنەن تىعىرىققا تىرەلگەن اعايىن نە ىستەرىن بىلمەي، باس قاتىرۋدا، دەپ حابارلايدى Qamshy.kz اقپارات اگەنتتىگى ktk تەلەارناسىنا سىلتەمە جاساپ.

الماتىدان ارنايى كەلگەن بۇل ءتورت ازامات توبەسىنەن جاي تۇسكەندەي بولدى. ويتكەنى 2015 جىلى قىتايدان كوشىپ كەلگەندە، قازاقستاندا جۇرۋلەرى ءۇشىن ءتولقۇجات ەسەبىندە بەرىلگەن ىقتيار حات جارامسىز بولىپ قالعان. مۇنداي سۇمدىقتىڭ بەتى تۇرعىلىقتى جەر بويىنشا انىقتاما الۋ كەزىندە اشىلعان.

قانات بەرىكبول:

– ءبىز جينا دەگەندى جينادىق. بەر دەگەنىن بەردىك. ەندى بەرىپ الىپ ءبىر جىلدان سوڭ قۇجات جارامسىز دەگەندەرى بىزگە قاجەت ەمەس. مەن قازاقستانعا ازاماتتىق الايىن دەپ كەلدىم، مەن قىتايعا قايتا كەتەيىن دەپ كەلگەنىم جوق. ازاماتتىق كەرەك ماعان.

اتا جۇرتتى اڭساپ كەلگەن اعايىن ەندى ەكى ورتادا تەنتىرەپ قالدى. ءقازىر ازاماتتىق الماق تۇگىلى، قازاقستاندا اياق باسىپ ءجۇرۋدىڭ ءوزى مۇڭ. ياعني بەرىلگەن قۇجات زاڭسىز دەپ تابىلعان سوڭ ونىڭ كۇشى جويىلعان. ال قىتايدان كەلگەندەردىڭ جاعدايلارى تىپتەن قيىن.

باجيگۇل قاجىبەك قىزى:

– قىتايلار قابىلدامايدى. ولار زاڭ شىعارىپ قويعان: ءوز ەركىمەن ءبىزدىڭ رۇقساتىمىزسىز ازاماتتىق المايسىڭ دەپ. بۇلار بارسا توتەلەي ولاردىڭ قۇرباندىعى سوتتالۋ كەرەك. قۇجاتتىز ءبىر كۇندە جۇرە المايدى. قىتايعا بارا المايدى دا، بۇلاردىڭ تاعدىرى بوسقىن نەمەسە تۇرمە جاعالاۋمەن وتەدى.

ەكى ورتادا «بوسقىن» كۇيىنە تۇسكەندەردىڭ ايتۋىنشا، قالالىق كوشى-قون پوليسياسى باسقارماسىنداعىلار بۇل مەكەمەنى بيزنەس ورتالىعىنا اينالدىرىپ العان. جالپى، وسى قۇزىرلى ورىن وكىلدەرىنىڭ كەسىرىنەن 250 ادامنىڭ ىقتيار حاتى جارامسىز دەپ تابىلعان. ونىڭ كوبى بۇل جايىندا ءالى ەستىمەپتى. ءقازىر وسى بىلىققا قاتىسى بار دەگەن كۇدىكپەن قالالىق كوشى-قون پوليسياسى باسقارماسىنىڭ باسشىسى بىرنەشە ينسپەكتورىمەن بىرگە قاماۋعا الىنىپ، تەرگەۋ جۇرگىزىلۋدە.  

بەكزات دوسىبايەۆ، جامبىل وبلىستىق ءىىد كوشى-قون پوليسياسى باسقارماسىنىڭ ينسپەكتورى:

– ناقتى ءقازىر ەشتەمە ايتا المايمىن. قىزمەتتىك تەكسەرىس جۇرگىزىلەدى. قازىرگى تاڭدا قۇجات زاڭسىز بەرىلگەندىگى ءۇشىن، ىشكى ىستەر ورگاندارىنىڭ قىزمەتكەرلەرى ءىستى بولىپ جاتىر عوي. سوندىقتان دا سول كىسىلەردىڭ كىناسى دەسەك تە بولادى.

كوشى-قون پوليسياسىنىڭ كەسىرىنەن ەندى 250 ادامنىڭ تاعدىرى قىل ۇستىندە. تەكسەرۋ كەزىندە ءتولقۇجات ەسەبىندە جۇرەتىن ىقتيارحاتتىڭ جالعان ەكەندىگى راستالسا، وندا زاڭعا ساكەس 250 قانداس ەلدەن شىعارىلۋى ءتيىس. ال بەيرەسمي مالىمەتتەرگە سۇيەنسەك، جالعان قۇجات ەل بويىنشا تەك جامبىل وبلىسىندا جاسالىپ، ازاماتتار تەك سودان سوڭ ءار وڭىرگە جىبەرىلىپ وتىرعان.