بەلگىلى جۋرناليست، «قازاق گازەتتەرى» ءجشس-نىڭ باس ديرەكتورى - رەداكتورلار كەڭەسىنىڭ ءتوراعاسى جۇمابەك كەنجالين ومىردەن وزدى. بۇل تۋرالى «جەتىسۋ» تەلەارناسى ديرەكتورىنىڭ ءبىرىنشى ورىنباسارى سەرىك ابىكەن جازدى، دەپ حابارلايدى Qamshy.kz اقپارات اگەنتتىگى..  

«قازاق جۋرناليستيكاسىنىڭ ءبىر قاراعايى قۇلاپتى. يماندى بولىڭىز، جۇمابەك اعا»، - دەپ جازدى سەرىك ابىكەن فەيسبۋكتەگى جەكە پاراقشاسىنا.

جۇمابەك كەنجالين 1954 جىلى قوستاناي وبلىسى، امانكەلدى اۋدانىنداعى جدانوۆ اتىنداعى كولحوزدا تۋعان. 1971 جىلى تورعاي وبلىسى ارقالىق اۋدانىنداعى قايىڭدى ورتا مەكتەبىن بىتىرگەن سوڭ، اسكەر قاتارىندا قىزمەت ەتتى، شارۋاشىلىقتاردا جۇمىس ىستەدى. 1981 جىلى قازاق مەملەكەتتىك ۋنيۆەرسيتەتىن تامامداعان سوڭ، «سوسياليستىك قازاقستان» («ەگەمەن قازاقستان») گازەتىندە ءتىلشى، ءبولىم مەڭگەرۋشىسى، 1986–1988 جج. «ءبىلىم جانە ەڭبەك» («زەردە») جۋرنالىندا جاۋاپتى حاتشى، باس رەداكتوردىڭ مىندەتىن اتقارۋشى بولدى. 1990 جىلدان «حالىق كەڭەسى» گازەتى باس رەداكتورىنىڭ ورىنباسارى، ءبىرىنشى ورىنباسارى، ال 1994 جىلدىڭ قاڭتارىنا دەيىن وسى باسىلىمنىڭ باس رەداكتورى قىزمەتىن اتقاردى.

1996–1997 جج. «اقيقات» جۋرنالىنىڭ باس رەداكتورى، 1997–1999 جج. «قازاق ادەبيەتى» گازەتىنىڭ باس رەداكتورى قىزمەتىن اتقاردى. 1999–2006 جج. «قازاق گازەتتەرى» جابىق اكسيونەرلىك قوعامىنىڭ پرەزيدەنتى، «قازاق گازەتتەرى» ءجشس-نىڭ باس ديرەكتورى، «انا ءتىلى» گازەتىنىڭ باس رەداكتورى، 2006–2009 جج. «اقيقات» جۋرنالىنىڭ باس رەداكتورى، 2009 جىلدىڭ اقپانىنان «قازاق گازەتتەرى» ءجشس-نىڭ باس ديرەكتورى – رەداكتورلار كەڭەسىنىڭ ءتوراعاسى. شىعارمالارى رەسپۋبليكالىق مەرزىمدى باسىلىم بەتتەرىندە جاريالانىپ ءجۇر. قازاقستان ۇكىمەتى جانىنداعى مەملەكەتتىك تەرمينولوگيالىق كوميسسيا مۇشەسى، حVءىى شاقىرىلعان حالىق دەپۋتاتتارى الماتى قالالىق كەڭەسىنىڭ دەپۋتاتى بولىپ سايلاندى. 2004 جىلى كانديداتتىق ديسسەرتاسيا قورعاپ، ساياسي عىلىمدارىنىڭ كانديداتى عىلىمي دارەجەسىن العان.

 «جەلكىلدەپ وسكەن قۇراقتاي»، (1988، «ونەر»)، «شىندىقتى شىراق ەتىپ ۇستاڭىز» (1998، «قازاقستان»)، «ۇلت رۋحىن ۇلىقتاعان ۇرپاقپىز» (2005، «ولكە») دەپ اتالاتىن دەرەكتى اڭگىمەلەر مەن ەسسە كىتاپتارىنىڭ اۆتورى. قازاقستان جۋرناليستەر وداعى سىيلىعىنىڭ لاۋرەاتى (1984)، قازاقستان رەسپۋبليكاسى پرەزيدەنت سىيلىعىنىڭ لاۋرەاتى (2006)، ق ر مادەنيەت جانە اقپارات مينيسترلىگىنىڭ «مادەنيەت قايراتكەرى» بەلگىسىمەن ماراپاتتالعان (2004). قازاقستان جۋرناليستەر اكادەمياسىنىڭ تولىق مۇشەسى – اكادەميگى (2001).