الماتى قالاسى، قالقامان-2 ىقشام اۋدانىنداعى قازىرگى ابىشيەۆ، بۇرىنعى التى-الاش-1 كوشەسىنىڭ بۇگىندە استاڭ-كەستەڭى شىعىپ جاتىر. سەبەبى جول جوندەۋشىلەر اتالمىش كوشەنى جوندەۋ جۇمىستارىنا كىرىسىپ، اقىرى اياقسىز قالدىرعان. استانا كۇنىنىڭ قارساڭىندا جوندەۋ جۇمىستارى توقتاپ قالعان كورىنەدى.

تۇرعىنداردىڭ ايتۋىنشا، بۇل كوشە ەشقاشان اسفالت كورمەگەن. ءار جازدا سۋ قۇبىرلارىن وتكىزۋ جۇمىستارى ءجۇرىپ تۇرادى. ءجيى قازىلعان جەردىڭ سالدارىنان كۇزگى جانە كوكتەمگى جاڭبىردا تۇرعىندار بالشىققا باتاتىن. وسى جىلى ءدال سول جاعدايدى باستان كەشەمىز بە دەپ ۇرەيلەنىپ وتىر حالىق.

ونىڭ ۇستىنە، كوشە قازىلعان كۇيى جاتىر ەكەن. «كولىكتەردىڭ قاتىناۋى ءتىپتى قيىن، نەبارى 500 مەتر بولاتىن كوشەنىڭ باسىنان اياعىنا جەتۋ ءۇشىن 20 مينۋت ۋاقىت كەتەدى» دەپ تۇرعىندار اشىنىپ وتىر. كىشكەنتاي بالالاردىڭ ءارى بەرى جۇگىرىپ ويناۋىنا دا ىڭعايسىز. ويناپ ءجۇرىپ جاراقات العاندارى دا جەتەرلىك.

قالييەۆا الماگۇل، قالقامان-2 ىقشام اۋدانىنىڭ تۇرعىنى:

«وسىندا كوشىپ كەلگەنىمىزگە 10 جىلدان استام ۋاقىت ءوتتى. اسفالت دەگەندى كورگەن ەمەسپىز. مامىردا جوندەۋ جۇمىستارى باستالعاندا، قاتتى قۋانىپ ەدىك، ونى دا توقتاتىپ قويدى. قايتادان قالپىنا كەلتىرىپ قويسا بولادى عوي ەڭ بولماعاندا، كوشەنىڭ ءبارى قازىلعان كۇيى جاتىر. ادامدار ول جەرلەردى قوقىسقا ءۇيىپ تاستادى. كولىك وتكەن سايىن شاڭ-توزاڭ بولادى».

وسى ماسەلەنىڭ سەبەبىن ءبىلۋ ماقساتىندا Qamshy.kz اقپارات اگەنتىتگىگىنىڭ ءتىلشىسى ناۋرىزباي اۋدانىنىڭ اكىمدىگىنە حابارلاسىپ كوردى. الايدا اكىمنىڭ قابىلداۋ ءبولىمى دە، كومەكشىسى دە تۇتقالارىن كوتەرمەدى.

ايتا كەتەيىك، مامىردىڭ باسىندا الماتى قالاسىنىڭ اكىمى باۋىرجان بايبەك ناۋرىزباي اۋدانىن دامىتۋ بويىنشا كوشپەلى جيىن وتكىزگەن. جيىن بارىسىندا ناۋرىزباي اۋدانىنىڭ اكىمى سايران سايفەدەنوۆ بيىلعى جىلى قالقامان ىقشام اۋدانىندا جاڭا جولدار سالۋ جوسپارلانعانىن، ۇزىندىعى 17 شاقىرىم بولاتىن 32 كوشەنىڭ جاڭارتىلاتىنىن، ۇزىندىعى 26 شاقىرىم بولاتىن 22 كوشەگە ورتاشا جوندەۋ جۇمىستارى جۇرگىزىلەتىنىن ايتتى.

تۇرعىندار ناۋرىزباي اۋدانىنىڭ اكىمىنەن جول جوندەۋشىلەردىڭ ءوز جۇمىستارىنا جاۋاپكەرشىلىكپەن قاراۋىن تالاپ ەتۋىن، سونداي-اق جوندەۋ جۇمىستارىنىڭ كۇزگە دەيىن اياقتالۋىن سۇرادى.