Super.kg سايتىنىڭ ءجۋرناليسى اۆتانديل دوبۋلبەكوۆ قىرعىزستان پرەزيدەنتى المازبەك اتامبايەۆقا قويعان سۇراعىنان كەيىن جۇمىستان قۋىلعانىن مالىمدەدى، دەپ جازادى Qamshy.kz اقپارات اگەنتتىگى. اتامبايەۆتىڭ جۋرناليستەرمەن كەزدەسۋى 24 شىلدەدە شولپان اتادا وتكەن.
«پرەزيدەنتتىڭ باسپا ءسوز كونفەرەنسياسىنان كەيىن جۇمىسقا كەلسەم، رەداكسيا ماعان توسىن سىي دايىنداپ قويىپتى. كورىسەرمىز!»، - دەپ جازدى جۋرناليست ءوزىنىڭ فەيسبۋكتەگى پاراقشاسىنا. سايت باسشىلىعى قانداي دا ءبىر پىكىر بەرۋدەن باس تارتتى.
24 شىلدەدە وتكەن اتامبايەۆتىڭ باسپا ءسوز كونفەرەنسياسىندا دوبۋلبەكوۆ پرەزيدەنتتەن "قىرعىز حالقىن نەگە ءجيى سىنايسىز؟" دەگەن سۇراق قويعان. اتامبايەۆ ونىڭ ساۋالى وسەك-ايانعا قۇرىلعانىن ايتىپ، جۋرناليستكە «كاسىبي بولۋىن» ەسكەرتكەن.
Super.kg سايتى مەن "سۋپەر ينفو" گازەتىنىڭ يەسى - قىرعىزستاننىڭ مالايزياداعى بۇرىنعى ەلشىسى - قىلىشبەك سۇلتانوۆ. ول قىزمەتىنەن 2016 جىلى تامىزدا كەتكەن، سەبەبى قىرعىزستان كونستيتۋسياسىنىڭ وزگەرۋىنە قارسى شىققان. كەيىن ەلشى Facebook جەلىسىندە اتامبايەۆتان كەشىرىم سۇراعان.
