ەلوردالىق اكىمدىكتە اسەت يسەكەشيەۆتىڭ باسشىلىعىمەن جيىن ءوتتى، ونىڭ اياسىندا قالانىڭ تىرشىلىك قاراكەتتەرىنە قاتىستى ءبىرقاتار ماسەلەلەر تالقىلاندى، دەپ حابارلايدى Qamshy.kz اقپارات اگەنتتىگى قالا اكىمدىگىنە سىلتەمە جاساپ.
قالا اكىمىنىڭ ورىنباسارى ماليكا بەكتۇروۆا مەملەكەتتىك-جەكە سەرىكتەستىك جوبالارىنىڭ ىسكە اسۋى جانە سمارت-سيتي جوباسى تۋرالى ايتىپ بەردى.
سونداي-اق قوعامدىق دەنساۋلىق ساقتاۋ دەپارتامەنتىنىڭ باسشىسى نۇرقان ءسادۋاقاسوۆ جاڭا وقۋ جىلى قارساڭىندا ءبىلىم مەكەمەلەرىنىڭ دايىندىعى تۋرالى باياندادى.
كۇن تارتىبىندە كەلەسى تاقىرىپتار بويىنشا ماسەلەلەر قاراستىرىلدى: تۇرعىن ءۇي قۇرىلىسىندا ۇلەسكەرلىكپەن سالۋ ماسەلەسى، قالاداعى تىرشىلىك قارەكەتىنىڭ نىساندارى، قالادا قاۋىپسىزدىكتى جانە جەدەل ارەكەت ەتۋدى قامتامىز ەتۋ ماسەلەلەرى، بيۋدجەت قاراجاتىنىڭ يگەرىلۋى، ازىق-تۇلىك باعاسى، تكش سالاسىندا جاڭا تەتىكتەر.
«سوڭعى ۋاقىتتا تۇنگى ۋاقىتتا ورىن الاتىن شۋ جانە كوشەدەگى ۇرىس-توبەلەس جونىندە شاعىمدار كوبەيىپ كەتتى. وسىعان بايلانىستى قالالىق ءىىد جانە جپق ويىن-ساۋىق مەكەمەلەرگە قاتىستى باقىلاۋدى كۇشەيتۋ كەرەك»،- دەدى اسەت يسەكەشيەۆ.
وعان قوسا اكىمنىڭ ورىنباسارى قوسمان ايتمۇحامبەتوۆ قالا باسشىسىنىڭ تاپسىرماسى بويىنشا توتەنشە جاعدايلار دەپارتامەنتىمەن بىرلەسە وتىرىپ ءورت قاۋىپسىزدىگى ماسەلەلەرىنە قاتىستى «Highvill» تك-دە تەكسەرۋ جۇمىستارىن ۇيىمداستىرۋدا.
سونداي-اق اسەت يسەكەشيەۆ قوعامدىق كولىكتە ءجۇرۋ تۋرالى حاتتامالىق تاپسىرما بەردى.
«ەلوردالىق اكىمدىكتىڭ باسشىلارى، اكىمنەن باستاپ، اۋدان اكىمدەرى، ورىنباسارلار، ونىمەن بىرگە باسقارما، قالالىق ۆەدومستۆو جانە قۇرىلىمدىق بولىمشەلەردىڭ باسشىلارى اپتاسىنا ءبىر رەت قوعامدىق كولىكتە جۇرۋلەرى ءتيىس»، - دەدى قالا باسشىسى.
جيىن قورىتىندىسى بويىنشا اكىم ەلوردالىق ءىىد باسشىسىنا قوعامدىق تىنىشتىقتى ساقتاۋدا قاۋىپسىزدىك شارالارىن كۇشەيتۋ قاجەتتىلىگى جونىندە تاپسىرما بەردى.
پىكىر قالدىرۋ