يالتادا «پرەزيدەنتتىڭ دەمالىسى» كينوكومەدياسىنىڭ تۇسىرىلىمدەرى باستالىپ كەتتى، دەپ جازادى Qamshy.kz اقپارات اگەنتتىگى.

جەرگىلىكتى مالىمەتكە سۇيەنسەك، ءفيلمنىڭ سيۋجەتى مىناداي: كرەملدە ۆلاديمير ءپۋتيننىڭ سىڭارى قالعان ۋاقىتتا پرەزيدەنت جالعىز ءوزى قىرىمعا اتتانىپ، كۇيبەلەڭ تىرشىلىكتەن تىنىعادى، حالىقپەن ارالاسادى. ونىڭ دەمالىسى جونىندە ەشكىم سەزىكتەنبەس ءۇشىن گريمشىلەردىڭ قىزمەتىنە جۇگىنەدى.

پرەزيدەنت ۆلاديمير ءپۋتيننىڭ سىڭارىنىڭ ءرولى دميتريي گراچيەۆقا بۇيىردى، ال گريمدەلگەن «ناعىز» پرەزيدەنتتىڭ ءرولىن گوشا كۋسەنكو سومدايدى.

كينوكومەدياعا ناستاسيا سامبۋرسكايا، ولەگ ۆاسيلكوۆ، ەۆگەنيي سيديحين، دميتريي ديبروۆ، اننا سۋكانوۆا جانە وزگە دە رەسەيلىك اكتەرلەر شاقىرتىلدى.

كينوكارتينانى 2018 جىلدىڭ قاڭتارىنان باستاپ تاماشالاۋعا بولادى.