اڭگىمە
نۇر - اسپان (قالام ات)
شەرنياز ءقازىر سوزدەن قالدى. سويلەسەڭ بەتىڭە بادىرايىپ قاراپ قويادى، ءتىس جارىپ، جاق كىرىسىن اشپايدى. ول بۇرىن اۋىزدىعا ءسوز بەرمەيتىن شەشەن بولماسا دا، كەز كەلگەن تاقىرىپقا كىرىسىپ، سوزگە ارالاسىپ “مەن بىلەم” - دەپ توقتاماي سويلەپ كەتەتىن. سوسىن دا ونى اۋىلداستارى “مەن بىلەم شەرنياز” - دەيدى. ءتىپتى كەزىندە ول اۋىلداعى ءبىر تويدىڭ تاماداسى كەلمەي قالىپ الاش الىپتارىنىڭ جاس كەزىندەگىدەي توي جۇرگىزگەنى دە بار. شەرنياز ۇلت كوسەمى ءاليحاننىڭ ليزا قىزىنان تۋعان بالاسى، ءبىراق ونى وزىنەن باسقا ەشكىم بىلمەيدى. “ناعاشى اتامنىڭ سالقىنى تيەمە” - دەپ “ساپتاياقپەن اس ءىشىپ، سابىنا قاراۋىل قويعان” كەر زاماننىڭ جەلىنەن ءالى قورقادى. اۋىلداعى ورىستاردى كورگەندە ءتىپى دىرىلدەپ كەتەدى. كىم بولسا سوعان قولىنان كەلگەنشە كومەكتەسكىسى كەلەدى. ءبىراق ونىڭ بارى دا جوعى دا ەكى قوڭىر سيرى مەن ەكى بۇزاۋى عانا. ءار جىلى ءبىر تانا ساتىپ قىزدارىنا كيىم-كەشەك الادى، ءبىر تاناسىن سوعىمعا سويادى. جالعىز سارى توبەتى اندا-ساندا وزىنەن-وزى ارپىلداپ بار ەكەنىن بايقاتادى. اۋىلدا وتىرسادا ەسىگىنىڭ الدىندا تاۋىق، قاز، ۇيرەك دەگەننەن دىم جوق. ونىڭ جۇمىرتقاسىن ساناپ “بايسىڭ دەپ ايتادى ” دەگەندى ەستىگەن سوڭ ءبارىن سول كەزدە ساتىپ جىبەرگەن. ول اۋىلداعى جالعىز مەكتەپتى جاعالاپ كۇزەتشى بولىپ ىستەگەن. بەرىپ ەمەس، الىپ ۇيرەنگەن ديرەكتور بۇعان ايلىق بەرگەن كۇنى قايتادان اقشا سۇراتادى. “جيعىشتارىن” جىبەرىپ، ءبىر رەت اقشا بەرمەي جۇمىستان قۋىلدى. كەيىن پوچتا اۋلاسىن سىپىرعان بولاتىن، ولاردىڭ بەرەتىنى ايەلى ساۋاتىن ءتورت شەلەك ءسۇتتىڭ اقشاسىنىڭ ار-جاق بەر جاعى بولدى. ونى قويىپ كوك تۋى كىرلەپ توزىپ كەتسەدە، اسپاندا جەلبىرەپ تۇراتىن اكىمشىلىكە ەسىك باققىش تا بولعان، وندا ايلىعىن ءبىر اي بەرىپ، كەلەسى ايدا بەرمەي، ءتىپتى تورت-بەس اي بەرمەي بۇنى ۇمىتىپ كەتتى. اۋىلداعى جالعىز مەشىتتىڭ سىرى وزىنە ءمالىم، ونىڭ تۇراقتى ونعا جۋىق جاماعاتىنىڭ بىرەۋى وسى شەرنياز.
- ەندىگى جول تەك قارىز اقشا الۋ، - دەيدى ايەلى. ول ءۇنسىز بادىرايا قارادى.
- قارىزى جوق ەل بارما بۇگىندە. بۇكىل حالىق قارىزبەن كۇن كورىپ جاتىر، قارىز الۋ مودىعا اينالدى. ول تاعى بادىرايا قارادى ايەلىنە.
- قارىز الۋ بۇگىندە دامۋدىڭ جولى، - دەپ ايەلى سويلەمەسىنە قويمادى.
- بانكتەن قارىز الۋ وتە اۋىر كۇنا. ءوسىمقورلىق قۇرانداعى ەڭ ۇزىن ايات، - دەپ شەرنياز ايەلىنە ەجىريە قارادى.
تاڭ نامازىنا مەشىتكە جامان ءتۇس كورگەندە عانا باراتىن شەرنياز بۇگىن ازانمەن تاڭعى تورتتە اللا ۇيىنە باردى. ەسىكتەن كىرە مەشىت اقىسىنا ەكى باس ناماز وقۋعا تۇردى. داڭعازا مۋزىكا قۇلاعىن تۇندىردى، ءوزىنىڭ نە وقىعانىن ۇمىتقان ول تەزدەتىپ ءبىتىرىپ، تەرەزەنى جاپتى. قاراما-قارسى اۋلاعا ورنالاسقان مەكتەپ بۇگىن تۇنىمەن “التىن بەلگىلەر” ءتۇنىن وتكىزدى. جەرگىلىكتى اكىمدەر باستاپ باسقادا جاس-جاسامىس ەركەكتەر قوستاپ، ءبارى تاڭ اتىردى دەيدى سىبىرلاعان ەكى جىگىت بىرى-بىرىنە.
باقتىبەك يمام ازان شاقىردى، سالگە پاۋزا جاساعان باتىستىق باس اۋىرتار اۋەن مەشىتتىڭ ىشىندە تەرەزە جابىلسادا اۋەلەپ كەتتى. نامازدارىن ازەر ءبىتىردى. شەرنياز يمامدى ەتەكتەپ ءوزىنىڭ بۇيىمتايى بويىنشا ءپاتۋا سۇرادى.
- شاريعاتتا قارىز اقشا الۋدىڭ پاتۋاسى قانداي؟
- نە ءۇشىن الاسىڭ؟
- قىزىمدى وقۋعا ءتۇسىرۋ ءۇشىن.
- وقىتپاساڭ بولماي ما؟
- قىزىم بايبالام سالىپ جىلاپ، ايەلىم دە قوستاپ ەكەۋى ەكى جاقتاپ باسىمدى ابدەن قاتىردى.
- نەگىزى قارىز الۋ حارام، ءبىراق مۇقتاجدىقتىڭ ۇلكەن كىشىلىگىنە قاراي ءپاتۋا بەرۋگە بولادى. مىسالعا ءۇيىڭنىڭ توبەسى ءتۇسىپ تۇرسا... سول سياقتى الماسا بولمايتىن جاعدايدا رۇقسات بەرەدى. سەن ءۇشىن قىزىڭدى وقىتۋ قاتتى قاجەت بولىپ تۇرسا بولادى.
بىرنەشە كۇن ويلانىپ ءجۇردى، تانىسى قانىشتىڭ يماني ساۋاتى جامان ەمەس، سودان سۇراپ كورەيىن دەپ قولفونعا جارماستى. ول “ءوز اناڭدى جەتپىس ءۇش رەت استىڭا سالعانداي اۋىر كۇنا” - دەپ توبەسىنەن قاتتى سوققى بەرە سىلەيتتى. وداندا ءوسىمسىز قارىز بەرەتىن ادامدار ىزدە تامىر-تانىستاردان دەپ كەڭەس بەردى. ونىڭ يەگىندەگى تورت-بەس تال ساقالى ەسىنە ءتۇسىپ ونى تەز ۇمىتتى.
بۇگىندە كىم ءوسىمسىز جانە بىرەر جىلعا قارىز اقشا بەرەدى، ول وتە قيىن دەيدى شەرنياز وزىمەن-وزى سويلەسىپ.
عالامتوردى اقتارىپ “مۋفتيات كيزەتكە” كىرىپ سۇراق-جاۋاپ بولىمىنە سۇراق قويدى، جاۋاپ بولماعاسىن قوڭىراۋ شالدى.
- اسسالاۋماعالايكۋم، مەنىڭ ءبىر سۇراعىم بار ەدى.
- ۋاعالايكۋماسسالام، ايتىڭىز، - دەدى قارسى بەتتە جاس جىگىتىڭ سالماقتى داۋسى.
- شاريعاتتا قارىز اقشا الۋدىڭ ءپاتۋاسى قانداي؟
- بۇل بۇگىندە داۋلى ماسەلەنىڭ بىرەۋى، وسى جاقىندا اتالمىش ماسەلە بويىنشا الەمدىك دەڭگەيدە عىلىمي كونفەرنسيا ءوتتى، سوندا ارابيا تۇبەگىننەن ءبىر عالىم، ءسىزدىڭ سول العان اقشانى ۋاعىندا قايتارۋ قۋاتىڭىز بار بولسا وندا بولادى دەدى.
- قارىز بەرەتىن جاق، ياكي ءوسىم الاتىن جاق كاپىر قاۋىمنان بولسا، ءسىز امالسىزدان الىپ وتىرساڭىز جانە ونى قايتاراتىن تۇراقتى كىرىسىڭىز بولسا وندا دا رۇقسات، - دەدى ءبىر عالىم.
شەشىم قابىلداۋ وزىندە قالعان شەرنياز شاريعاتتا كەز كەلگەن نارسەگە شىعار جول بار ەكەن-اۋ، كەزىندە اتالارىمىز “شاريعاتتىڭ سان جولى بار، ول قاراعايدىڭ شايرىنداي سوزىلادى”، “مولدانىڭ ايتقانىن ىستە، ىستەگەنىن ىستەمە دەگەن” - دەپ وزىمەن ءوزى تاعى سويلەستى.
***
ءسابيرا ايناعا قارادى، قاراعان سايىن قايتا-قايتا قارادى، سۇلۋلىعىنا تويمادى. دومالاق ءجۇزى اكەسىنە ۇقساسادا، بويى سىرداڭداپ ءوسىپ، تالدىرماش دەنەسى كۇن وتكەن سايىن اجەسى ليزاعا ۇقساپ بارادى. بيىل توعىزىنشى سىنىپتى ءبىتىرىپ ونىنشى سىنىپقا كوشتى. سىنىپتاستارىنىڭ كوبى قىزدار، بارلىعى بىرىمەن ءبىرى جارىسا كيىنىپ مەكتەپكە كەلەدى. بۇل دا بار-جوعىنا قاراماي، ازاتتىقتىڭ قالاي كەلگەنىن سەزەدە بەرمەيتىن بايدىڭ قىزدارىمەن بىردەي كيىنەدى. “اتتىعا ەرىپ جاياۋدىڭ تاڭى ايىرىلىپتى” - دەگەندەي بيىل تۋعان اكپەسى جازيرا وقۋعا كەتىپ كەدەي وتباسى ەكەندەرىن كورسەتىپ قويا جازدادى. دەسە دە شەشەسى اكەسىنە ايتپاي قولىنداعى التىن جۇزىگى مەن سىرعاسىن ساتىپ، ونى قاتارىنان قالدىرمادى. كىشكەنتايىنان “وزىمە تارتقان ءوز قىزىم” - دەپ شەشەسى بۇل قىزىن بوتەنشە ەركەلەتتى. سوسىن دا ول اكەسىنە قاراعاندا شەشەسىنە جاقىن. شەشەسى “جاستىعىم ءوتتى، ەندى ماعان كىم قارايدى” - دەپ بارىن ساتىپ قىزىنا سوڭعى مودەلدەگى سمارتفون الىپ بەردى. وقۋى جايىندا قالدى. شەشەسىنىڭ سيىرىنىڭ سۇتىنەن اي سايىن ەكى جارىم مىڭ تەڭگەگە بىرلىك ساتىپ الىپ كۇن-تۇن دەمەي عالامتوردىڭ ءىشىن كەزەدى....سوڭعى كەزدە ءتىپتى تۇنىمەن بىرەۋمەن سويلەسەتىن بولدى. اكەمەن شەشە سەزسەدە قىزىنىڭ بەتىن قاقپاي بىلمەگەندەي بولدى.
***
تەلەديداردا توك شوۋ...
كيگەن كيىمدەرى تىزەسىنە جەتپەيدى. مەكتەپ ۇلگىسى دەپ بالالاردى الداپ ءبارىن جالتىر سان جاسادى الگى “پاتشانىڭ جاڭا كيمىندەگى” اككى ساۋداگەرلەر سياقتى مەكتەپ فورماسىن تىگەتىن قۋلار. ول از بولعانداي بىزدەي بيىك وكشە كيىپ، اياعىن تىقىلداتا باساتىن بوتا تىرسەك اپايلار ءوز جاسىن ۇمىتىپ بوتەنشە داراقىلانىپ ايلىعىنان ارتىق كيىندى. ەلىكتەۋمەن كۇن كەشكەن جەتكىنشەكتەر كوزسىز ەلىكتەپ، اينا الدىنا ەرتە باردى. “ولار كىتاپقا قاراپ وي تۇزەپ ەمەس، ايناعا قاراپ بوي تۇزەدى” - دەپ اتاقتى عالىم اسقار ءجۇمادىل شىر-پىر بولىپ وتىر.
“سان ءتۇرلى مەرەكەنى قۇر جىبەرمەي تويلادى. ول كىمدىكى، قانداي مادەنيەت ەكەنىمەن مۇلدە جۇمىسى جوق،” - دەپ جۇرگىزۋشى شەكەسىنە تۇسكەن شاشىن قايتا-قايتا سيپالايدى.
قالالىق №17 مەكەتەپتىڭ تاربيەگە جاۋاپتى مەڭگەرۋشىسى تارسىلداتىپ وسى كەزدە ەسىكتەن كىردى، وتىرعاندار وتىرىك شاپالاق شالىپ قارسى الدى.
- ءيا، بىزدەر كوپ ۇلتتى مەملەكەتتە تۇرامىز، ءار ۇلتتىڭ مادەنيەتىنە قۇرمەت ەتىپ جىل سايىن ءار مەرەكەنى قۇر جىبەرمەي تويلايمىز.
- داڭعازا مۋزىكانى ازانمەن، ءتىپتى كەيدە جارىم تۇندە دە قوسىپ ديسكوتەكا جاسايسىزدار بۇل نە ماسقارا ، - دەپ سۇراق بەردى كورەرمەن اراسىنان ءبىر اتا.
- بىزدەر كەيدە ازانمەن مەرەكەگە دايىندالۋ ءۇشىن مۋزىكا قوساتىنىمىز راس جانە 25 مامىردا “سوڭعى قوڭىراۋ” تۇندە مۋزىكا بولاتىنى دا شىن، - دەيدى شاشىن جەلكەسىنە جەتكىزبەي قيىپ تاستاعان سارى جۋان مەڭگەرۋشى كەلىنشەك.
- ەلدىڭ قىزىن قىرعا قوندىرىپ، دالاعا تۇنەتىپ، ەرتەڭگى بولاشاق وت انانى، وتاننىڭ تاربيەشىسىن كەزبەلىككە ۇيرەتەدى، سۇمدىق، - دەيدى توك شوۋعا قاتىسىپ وتىرعان اق جاۋلىقتى اجە.
- ءبىزدىڭ كەزدە ۇلدار مەن قىزدار بولەك سىنىپتا وقۋشى ەدىك، دالاعا تۇنەۋ تۇرماق جارتى ساعات كەزەكشىلىك ىستەپ ۇيگە كەشىككەن كۇنى ۇيدە بۇرىشقا تۇراتىنبىز، ال مەكتەپكە كەشىكسەك مايداندى اينالدىرىپ ءيتىمىزدى شىعاراتىن. اكەلەرىمىزدىڭ قاتال قاباعىنان قورىققاندا قانداي ءدىر-دىر ەتۋشى ەدىك، قازىرگى اكەلەر “مىسىق” بولىپ كەتتى-عوي، شىركىن! ..وتىرعاندار شاتىرلاتا شاپالاق سوقتى.
- اۋىرۋىن جاسىرعان ولەدى دەگەن، مەكتەپ جاسىنداعى قىزداردىڭ اياعى اۋىر بولىپ وقۋدان جاسىرىن شىعاتىنى اششى بولسادا شىندىق، - دەپ وتقا ماي قۇيا شاڭىراقتاي باس كيىمى كوك تىرەگەن مولداعا ءسوز بەردى جۇرگىزۋشى.
- استاعۇپراللا، ءبىز نەگىزى حيدجاپ كيگەندەرمەن ەمەس، جالاڭاشتارمەن كۇرەسۋىمىز كەرەك. قۇراندا قىز بالاننىڭ ەكى بەتى مەن قولىنان باسقاسى ۇياتتى جەر ەكەنى ايتىلادى، بىزدەر ۇياتتى جەرىن جاپقانداردى كورگەندە توبە شاشىمىز تىك تۇرىپ بۇكىل قوعام بولىپ سوعان قارسى تۇرامىز، ال مەكتەپكە قىزدارىمىز تىرجالاڭاشقا از جەتپەي كيىندىرىپ جىبەرەمىز. كىمدە كىم كۇنا جاساۋعا سەبەپشى بولسا ولدا سول كۇنانى جاساعانمەن بىردەي. قىز بالا سانىن جالتىراتىپ مەكتەپكە باردى، قانشا ۇل بالا وعان قارايدى، سوسىن تەلەديداردان كورگەنىن ىستەگىسى كەلەدى. سولاي وسى ايتىلعان ماقسقارالىق تۋىنداپ وتىر. سىزدەر ويلاڭىزدارشى، قالتاڭىزداعى ون مىڭ دوللاردىڭ شەتىن كورسەتىپ بازارعا شىقساڭىز، ونى كورگەن قانشا نيەتى جامان بۇزاقىلار سوڭىڭا تۇسەدى. ال قىز بالاڭىزدىڭ نە ايەلىڭىزدىڭ جالتىر سان كويلەك كيىپ كوشەگە شىعۋى نە مەكتەپكە بارۋى سول اقشاسىن كورسەتىپ كوشەدە جۇرگەن ادامعا قاتتى ۇقسايدى. سولاي قوعامدا قىلمىس تۋىندايدى، وتباسى ىدىرايدى، بولاشاق ءبۇلدىرشىننىڭ جولى قيىلادى. وتىرعانداردىڭ بارىنە بۇل ءسوز جەتسەدە ناپسىلەرى جىبەرمەي شاپالاق شالا الماي ءۇنسىز باس يزەكتەدى.
***
“مەن بىلەم شەرنيازدىڭ” ۇلكەن قىزى جازيرا بىلتىر “جاقسى بال” جيناپ مەملەكەتتىك گرانتقا وقۋعا ءتۇستى. اكەسى قۋانعاننان بەتىنە قاراپ وتىرعان ءبىر سيىرىن ساتىپ قىزىن جابىلىپ قالاعا وقۋعا اپارىپ سالدى. موماقان جۋاس قىز قالاعا بارىپ بۇزىلدى. “كورمەگەنگە كوسەۋ تاڭ” - دەپ وعان بارلىق نارسە وعان سىرلى بولىپ كورىندى. گۋرپپالاستارىمەن بىرگە ءبىر كۇنى تۇنگى كۋلبتىڭ دا ەسىگىن اشتى. اۋزىنا اششى سۋدى الدى سول ءتۇن، قىز ءوزىنىڭ ءومىرىن بوس وتكىزىپ جاتقانداي سەزىندى، سودان باستاپ تۇنگى كلۋبقا تەز-تەز باردى. ساباعى كۇننەن-كۇنگە ناشارلادى، اقىرى گرانتتان ايىرىلدى. اكەسىنە ايتاتىن بەتى جوق، اۋىلدا بارى جالعىز سيىر وعان قاراپ وتىرعان ءسىڭلىسى ءسابيرا بار، ول سونىكى دەيدى وزىنە ءوزى. اقىلى وقۋ وعان ارمان بولدى، ونداي سيىردان بەسەۋىن ساتسادا اقشاسى جەتپەيدى. ەكى جىل اكە-شەشەسىنە ايتپاي قالادا كافەدە ىدىس-اياق جۋىپ كۇنىن كوردى، سوڭعى كەزدە الىس اۋىلداعى ءبىر جىگىتتىڭ ەتەگىن ۇستاپ قاشىپ كەتتى. ەلشى كەلگەندە ءبىراق ءبىلدى اكەسى. “سونشا بارىمدى ساتىپ وقىتتىم، سوندا بىزگە كورسەتكەن راقمەتى وسى ما” - دەپ اكە قۇسادان ىشىنە ءۇنى ءتۇسىپ كوپ سوزدەن قالدى. ءوستىپ جۇرگەندە ءسابيرا بيىل ەمتيحان تاپسىردى جيناعانى ءجۇز قىرىقتان ەلۋ ءۇش بالل. دولدانىپ شاشىن جايىپ قۇددى اكە-شەشەسى وقۋعا وتكىزبەي قويعانداي تۇلان تۇتىپ جەر باۋىرلاپ جاتقانىنا تۋرا ءبىر جەتى بولدى. “مەنى وقىتپاساڭدار نەگە تۋدىردىڭدار” - دەپ باقىردى. اكەسى جالعىز سيىرىنا ءبىر قارايدى، قىزىنىڭ ەسىگىنە ءبىر قارايدى. كوللەدجدى وقى، ول تەگىن ەكەن دەسە “مەن ونداي تومەن جەردە وقىمايمىن، دوستارىمنان ۇيات” - دەپ اسپانداعى ايعا قولىن سوزىپ، ەڭكىلدەپ جىلادى...
مەن بارىمدى ساتىپ قارىزدانىپ - قاۋعالانىپ وقىتىپ - توقىتسام وقۋىن بىتىرەر - بىتىرمەس، “ەلمەن جاۋلاستىرىپ” ءبىر جىگىتتىڭ ارتىنان ەرىپ قاشىپ كەتسە الدىڭعىسى سياقتى. قىزدى وقىتقان ادام اقىماق، ول ءبارى ءبىر ساعان نانىن جەگىزبەيدى، تەرىڭدى اقتامايدى دەگەن وي وعان ساپ ەتە قالدى دا ارتىنشا، شەرنياز ءوز ويىنان ۇيالدى. پايعامبارىمىز “ەكى قىز باعىپ ونى جاقسى تاربيەلەپ، قۇتتى ورنىنا قوندىرعان اتا-انا ءجانناتتىق” - دەگەن پايعامبارىمىز قىز بالانىڭ تاربيەسى مەن ونىڭ باقىتى وتە ماڭىزدى ەكەنىن رۋحاني كوزبەن بىزگە ەسكەرتكەن ەكەن-اۋ جارىقتىق دەيدى قۋانىپ. ءبىراق مەن.... مەندە “قىزدارىم بىرەۋدىڭ قولىنا بارعاندا جەرگە قاراماسىن، ديپلومى بولىپ ءوز كۇنىن ءوزى كورەتىندەي دەڭگەيدە بولسا، بۇگىندە زامان باسقا”...
***
قازاق دالاسىندا اۋليەلەر تاريقاتتى مىقتى ۇستانىپ، تاساۋفتا بولدى، شاريعاتتاعى وڭاي جولداردى ەش ىزدەمەدى، تەك بارلىق ءىسىن ءبىر اللاعا تاپسىرىپ جۇرەكتەرى اللا دەپ سوقتى. قۇران: «ەي، جىندار مەن ادامدار» دەپ ەسكەرتسە، ەندى بىردە «ەي، يمان كەلتىرگەندەر» دەيدى، ەندى بىردە «ەي، مۇميندەر» دەپ بەس پارىزى تولىق مۇسىلمانداردى مەڭزەيدى، ارتىنشا «ەي، تاقۋالار» دەپ سويلەيدى، ەندى بىردە «ەي عالىمدار» دەسە، بىردە «مەنىڭ اۋليەلەرىم» دەيدى، ودان سوڭ «مەنىڭ پايعامبارلارىم» دەپ جالپىلاما ايتادى. ارتىنشا ءتورت ۇلكەن پايعامباردى ءوز اتتارىمەن شاقىرادى، ەڭ سوڭىندا ءبىزدىڭ سۇيىكتى پايعامبارىمىز مۇحاممەد مۇستافا (س.ع.ا)-عا بولەك ايتادى” دەمەك وسىدان ءوز دارەجەڭ بويىنشا قۇراندى باسشىلىققا الاسىڭ. ايتسەدە اللا تاعالا دىندە قيىندىق جوق دەيدى. كەز كەلگەن شارۋادا شاريعاتتىڭ شەڭبەرىن كورسەتەدى، ارتىنشا بۇلاي ىستەمەسەڭ وزىڭە جاقسى دەپ ەسكەرتەدى. بۇل مىنە تاريقاتتىڭ جولى... قارىز اقشا الۋدا شەرنياز وسى جولدى تاڭدادى...
***
ايەلى ەكى تىزگىن ءبىر شىلبىردى قولعا الىپ، وتباسىلىق كوشتى باستادى...
ول ءۇيدىڭ قۇجاتىن قويىپ ءوسىمقور بانكتەن قارىز اقشا الدى، ونى ۋاعىندا قايتارا الماي، ۇيىنەن ايرىلدى. بانك سوت ورىنداۋشىلارعا مىڭ دوللار بەرىپ ەدى ولار الاشتىڭ تۇياعىن ۇيىنەن ءبىر-اق تۇندە تىرقىراتىپ قۋىپ شىقتى. دەسە دە قىزى وقۋعا ءتۇستى. كەزىندە “قالانىڭ بىردەڭەسى ءتيىپ كەتەمە” دەپ ەلەۋسىز ەلدى مەكەندى پانالاعان شەرنيازدىڭ وتباسى ەندى امالسىز قالاعا كوشىپ كەلدى. قىزىنىڭ وقۋ ورنىنىڭ ماڭىنان ءۇي جالدادى، ەرىكسىز ايەلى كافەدە ىدىس-اياق جۋدى، ءوزى اربا سۇيرەۋدى باستادى...
