بۇگىن قازاقستاننىڭ حالىق جازۋشىسى، مەملەكەتتىك سىيلىقتىڭ لاۋرەاتى، قازاق ادەبيەتىندە سوعىس سۇراپىلىن باستان كەشىپ كەلگەن قالامگەر مۇزافار الىمبايەۆ 94 جاسىندا دۇنيەدەن ءوتتى. 

اكەدەن 8 جاستا، شەشەدەن 13 جاسىندا ايىرىلىپ، «تۋار-تۋماستان تونالعان ۇرپاقتىڭ وكىلى…». سول تۇستا جەتىمەكتىڭ نە ەكەنىن، جەتىمدىكتىڭ ءزىل مەن مۇڭ ەكەنىن انىق تا تولىق سەزدى. 1932-33 جىلعى الاپات اشتىقتى كولدەنەڭ كوزبەن كورىپ ەمەس، ءوز باسىنان وتكەرگەن. 1937 جىلدىڭ ستاليندىك سويقانىندا حالىقتىڭ زيالى ۇل-قىزدارىن زورلىق-زومبىلىقپەن وققا بايلانعانىن ءوز كوزىمەن كورىپ، ۇرەيى ۇشقان ۇرپاق. 

سوعىس باستالعاندا ون سەگىزگە تولار-تولماستا بولعان م.الىمبايەۆتىڭ پەدۋچيليششەنى ەندى بىتىرگەن كەزى ەدى. كالينين مايدانىندا رجيەۆتىڭ تۇبىندە 1942 جىلدىڭ قاراشاسىنان ۇرىسقا كىرىسىپ، 1943ء-تىڭ شىلدەسىنە دەيىن سوعىستى. سول كەزدە ساياسي قىزمەتكەرلەر ينستيتۋتىن جويىپ، جاۋىنگەر كوماندير ەتىپ دايارلانىپ، تانك باتارەياسىنىڭ كومانديرى بولدى. 

سوعىس بىتكەسىن مۇزافار الىمبايەۆتى شىعىس گەرمانيا جەرىندە اسكەري قىزمەتكە الىپ قالىپ، ودان ەلگە 1948 جىلى ورالادى. 

اقىننىڭ «تۋ تىككەن» داستانىندا رەيحستاگقا العاش تۋ قاداعان قازاق باتىرى راحىمجان قوشقاربايەۆتىڭ جان-دۇنيەسىن، قاھارمان ەرلىگىن شابىتپەن جىرلايدى. بۇل داستاندا سوۆەتتىك قازاقستاننىڭ ساڭلاق پەرزەنتىنىڭ سۇيكىمدى بەينەسى نانىمدى مۇسىندەلگەن. 

مۇزافار الىمبايەۆ اقىندىق باقىتى تۋرالى ايتقاندا ونىڭ قازاق بالالار ادەبيەتىنە سىڭىرگەن ەڭبەگىنە توقتالۋ شارت. ۇزىنا تاريحى قىرىق جىلعا جۋىقتاعان «بالدىرعان» جۋرنالىن مۇزافار الىمبايەۆ قولىمەن قۇرىپ، 25 جىل باس رەداكتور رەتىندە باسقارۋى قازاق بالالار ادەبيەتى ءۇشىن ىرىس-قۇت بولدى. «بالدىرعان» جۋرنالى ارقىلى دۇنيەجۇزى بالالار ادەبيەتىندەگى بار داستۇرلەر مەن ەكسپەريمەنتتەر قازاق توپىراعىنا اعىتىلدى. قازاق توپىراعىندا بويىنداعى بار جۇپارىن بالالارعا ارنايتىن شىن مانىندەگى بالالار قالامگەرى «بالدىرعان» ارقىلى قالىپتاستى. 

م. الىمبايەۆ قازاق بالالار ادەبيەتىنىڭ قاتارداعى قالامگەرى عانا ەمەس. اقىن، پروزاشى، اۋدارماشى، سىنشى، جيناقشى، ۇيىمداستىرۋشى. ادەبيەتتە تالانت بەيىمى بولماي، ەشتەڭە دە ونبەيدى، ادەبيەت زورلىقپەن جاسالمايدى. مۇزاعاڭنىڭ دا بالالار پوەزياسىنا تۋا ءبىتتى بەيىمى بولعانى انىق. م.الىمبايەۆ قازاق بالالار ادەبيەتىن دامىتۋعا كوپ ەڭبەك ءسىڭىردى. «مەنىڭ ويىنشىعىم»، «وتپەن ويناما»، «وراق - ولاق»، «شىنىقساڭ - شىمىر بولارسىڭ» تاعى باسقا كىتاپتارى قازاق بالالار ادەبيەتىنە قوسىلعان ەلەۋلى ۇلەس بولدى. «اسپانداعى اپكە» جيناعى ءۇشىن قازاقستاننىڭ مەملەكەتتىك سىيلىعى بەرىلگەن. م.الىمبايەۆ ماقال - ماتەلدەردى جيناۋ، زەرتتەۋ، باسقا حالىقتار ماقالدارىن قازاق تىلىنە اۋدارۋ جۇمىستارىمەن دە اينالىسىپ كەلەدى. «666 ماقال مەن ماتەل»، «ماقال - ءسوزدىڭ مايەگى»، «ورنەكتى ءسوز - ورتاق قازىنا»، ت.ب. جيناقتار مەن زەرتتەۋ ەڭبەكتەرى بار. سىن - زەرتتەۋ سالاسىندا ەڭبەكتەرى جارىق كوردى. الەم ادەبيەتىنىڭ كەيبىر ۇزدىك شىعارمالارىن قازاق تىلىنە اۋداردى. جازۋشىنىڭ ولەڭدەرى 38 تىلگە اۋدارىلعان.