مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىندا ايدانا الاماننىڭ «جۇرەگىمنىڭ يەسى» پسيحوفيزيكالىق قويىلىمىنىڭ پرەمەراسى ءوتتى دەپ حابارلايدى Qamshy.kz اقپارات اگەنتتىگى.
«جۇرەگىمنىڭ يەسى» – جاس بۋىننىڭ تۋىندىسى. جاس دراماتۋرگ ايدانا الاماننىڭ پەساسى بويىنشا جاس رەجيسسەر ءاريداش وسپانبايەۆا ساحنالاعان قويىلىمدا تەاتردىڭ جاس بۋىن اكتەرلەرى وينادى.
قويىلىمنىڭ ماعىناسىنا ۇڭىلسەك، جاستاردىڭ، اسىرەسە قىزداردىڭ وتباسىن قۇرا الماۋ سەبەبى مەن جار تاڭداۋ، ومىرلىك سەرىك تابۋدا الدىنان شىعاتىن ماسەلەلەردى قاراستىرادى.
قويىلىمدا ويناعان جاستاردىڭ ونەرىنە، ەموسيانى جەتكىزە ءبىلۋ قابىلەتىنە ءتانتى بولاسىڭ. سۇيەكتەن وتەتىن سوزدەرىن ەستىپ وتىرىپ، ءوزىڭدى ىزدەيسىڭ. ىشكى جان دۇنيەڭمەن ۇندەسەتىن، سىرت كەلبەتى دە نازاردان تىس قالمايتىن، قالتاسى دا جۇقا ەمەس جىگىتتىڭ تورەسىن نە سەرىسىن كەزىكتىرۋ، تاڭداۋ جولىندا «ەرتە تۋىپ، كەش قالىپ» قويعان جاننىڭ وكىنىشىن، ءۇمىتىن سەزەسىڭ. تەاتردىڭ از سوزبەن ادام ساناسىنا سيگنال بەرىپ، وي سالاتىنى بەلگىلى. ءمان-ماعىناسىنا كەلگەندە كوپشىلىككە بەرەرى بار قويىلىم.
دەگەنمەن تەاترعا تەك ءومىردى وزىنشە تانىپ، وڭى مەن سولىن اجىراتا بىلەتىن تۇلعالار عانا بارمايدى. جاسوسپىرىمدەر دە ونەردىڭ قۇدىرەتىن تانۋدا استە ارتتا قالعان ەمەس. قويىلىمنىڭ پرەمەراسىنا جينالعانداردىڭ ىشىندە جاستاردىڭ قاراسى قالىڭ بولعانىن ايتا كەتكەن دە ءجون بولار.
اتالمىش قويىلىم بۇرىن سوڭدى تەاتردا ساحنالانباعان جاڭا ستيلمەن كەلدى دەسەك تە بولادى. جالاڭاشتانعان، ىشكيىممەن جۇرگەن جاستاردى كينو، الەۋمەتتىك جەلىدە ماقساتتى تۇردە بولماسا دا، ءجيى كورەمىز. ال تەاتر ساحناسىندا بويجەتكەننىڭ شەشىنۋى، ىشكيىممەن عانا قالۋى كوزگە تۇرپىدەي تيەدى. ەل الدىندا شەشىنىپ ابىروي تاپقان ادامدى قايدان كوردىڭىز؟ جىگىتتىڭ قىز ۇستىندەگى كيىمىن تۇگەل شەشىپ تاستاۋى جاستاردى نەگە باۋليدى؟ قىز بەن جىگىتتىڭ بىر-بىرىنە دەگەن ىنتىق سەزىمىن ادەتتەگىدەن وزگەشە ەتىپ كورسەتۋ، ناقتىراق ايتساق، قۇشىرلانا ءسۇيدىرىپ، ءبىر-بىرىنىڭ ۇستىنەن وتكىزىپ، ارلى-بەرلى اۋناتىپ قويۋ قانداي تاربيە بەرەدى؟
تەاترعا بارعان كورەرمەن قاربالاس جۇمىستان دەمالىپ، تىنىعۋعا، رۋحاني بايۋ ءۇشىن بارادى. ال كوز الدىندا شەشىنىپ، ىشكيىممەن بيلەپ جۇرگەن بويجەتكەنگە بىرەۋ تىك قاراۋعا يمەنەدى. قويىلىمنىڭ بەرەرى مول ەكەنىن ءسوز باسىندا دا ايتىپ وتتىك، الايدا ساحناعا لايىقتالعان كيىمدى نەگە پايدالانباسقا؟ قويىلىم باستالعاننان-اق ءبىر توپ قىزدىڭ جالتىراعان سانى كوزىڭە جارق-جۇرق ەتەدى. باسى وسىلاي بولسا، سوڭى قالاي بولار ەكەن دەيسىڭ.
ارينە، ءبىزدىڭ ايتۋىمىز پارىز، شەشىم شىعارۋ اركىمنىڭ ءوز ەركىندە. قويىلىمعا كوزى قاراقتى كورەرمەن ۋاقىت وتە كەلە ءوز باعاسىن بەرەرى حاق. ول ءۇشىن تەاترعا بارىڭىز، قۇرمەتتى وقىرمان!
