اعىمداعى جىلى اقش-تا مۇناي ءوندىرۋ كورسەتكىشى 9،6 ملن باررەلدى قۇراپ رەكوردتىق دەڭگەيگە جەتتى. بۇل جايىندا Qamshy.kz اقپارات اگەنتتىگى The Washington Post باسىلىمىنىڭ مالىمەتىنە سۇيەنە وتىرىپ حابارلايدى.

ايتا كەتەر بولساق، بۇل ەلدە مۇناي ءوندىرۋ كورسەتكىشى 1970 جىلدارى 10 ملن باررەلدەن اسقان بولاتىن.

جەرگىلىكتى باسىلىمنىڭ حابارلاۋىنشا، مۇنداي ءوندىرۋ كورسەتكىشىنىڭ ءوسۋى نەگىزىنەن بيتۋمدى سلانسوۆتاردى ءوندىرۋ تەحنولوگياسىن جەتىلدىرۋ ەسەبىنەن بولعان. مۇناي سلانسى وندىرىسىنەن ايتارلىقتاي پايدا تابۋ ءۇشىن الەمدىك مۇناي باعاسى ءبىر باررەلگە 55-تەن 60 اقش دوللارىنا دەيىن وزگەرۋى قاجەت. الەمدىك ەكونوميكانىڭ ءوسۋى جانە رەسەي مەن وپەك ەلدەرىمەن بەلگىلەنگەن شەكتەۋلەرى مۇناي باعاسىنىڭ 60 دوللاردان اسىپ كەتۋىنە سەبەپ بولدى.

مۇناي سلانسىلارىنىڭ ءىرى وشاقتارى تەحاس، مونتانا، سولتۇستىك داكوتا، وكلاحوما، كولورادو، ۆايومينگ جانە نەبراسكا شتاتىنىڭ كەيبىر اۋداندارى بولىپ تابىلادى. سونىمەن قاتار، وتكەن جىلدىڭ 22 جەلتوقسانىندا اقش پرەزيدەنتى دونالد ترامپ قول قويعان سالىقتىق رەفورماسى الياسكانىڭ اركتيكالىق ۇلتتىق قورىعىندا مۇناي ءوندىرۋ سالاسىن دامىتۋعا جول اشادى.

اقش-تا مۇناي ءوندىرۋ كورسەتكىشىنىڭ كۇنىنە 10 ملن باررەلگە دەيىن جەتۋى وسى ۋاقىتقا دەيىن مۇمكىن ەمەس جاعداي سەكىلدى كورىنگەن بولاتىن. سەبەبى، 2005 جىلدىڭ قىركۇيەك ايىندا كۇنىنە تەك 3،8 ملن باررەلگە دەيىن عانا جەتكەن.

جەرگىلىكتى باسىلىمداعى مالىمەتتەرگە سۇيەنەر بولساق، اقش-تىڭ كۇن سايىن مۇناي ونىمدەرىنە سۇرانىسى شامامەن 20 ملن باررەلدى قۇرايدى ەكەن. اقش-تا مۇناي ءوندىرۋ كورسەتكىشىنىڭ ءوسۋى ونىڭ مۇنايدى يمپورتتاۋدى قاجەت ەتپەيتىندىگىن بىلدەرمەيدى، الايدا قازىرگى ۋاقىتتا ول ەلدە كوپتەگەن ارزان تابيعي گازدار مەن مۇناي بار جانە دە گازدى ەكسپورتتاۋ ءىسىن باستاپ كەتتى.