قازاق تۇڭعىش كاسىبي تەاترىنىڭ شىمىلدىعى  1926 جىلى 13 قاڭتاردا قىزىلوردا قالاسىندا ءتۇرىلدى دەپ حابارلايدى Qamshy.kz اقپارات اگەنتتىگى م.اۋەزوۆ تەاترىنىڭ باسپا ءسوز قىزمەتىنە سىلتەمە جاساي وتىرىپ.

العاشقى قويىلىمدارى ق.كەمەڭگەر ۇلىنىڭ «التىن ساقينا» پەساسى مەن م.اۋەزوۆتىڭ «ەڭلىك-كەبەك» پەساسىنان ءۇزىندى بولدى.  تەاتر شاڭىراعىن كوتەرۋگە س.قوجامقۇلوۆ، ق.قۋانىشبايەۆ، ە.ءومىرزاقوۆ،  ق.بادىروۆ،  ق.جانداربەكوۆ، تاعى دا باسقا «سامورودوك سارى التىن» اكتەرلەر ات سالىستىتوكپە اقىن ي.بايزاقوۆ، اتاقتى ءانشى ءا.قاشاۋبايەۆ، پالۋان ق. مۇڭايتپاسوۆتار دا وسى قاتاردان تابىلدى. سونداي-اق تەاتر ومىرىنە ز.اتابايەۆا، م.شاموۆا، ا.ابدۋللينا، ش.بايزاقوۆا، و.قاشاۋبايەۆا،  ج.شانينا، د.وڭعاربايەۆالار بەلسەنە ارالاستى. تەاتردىڭ ەڭ العاشقى رەجيسسەرلەرى س.قوجامقۇلوۆ، ج.شانين، ق.قۋانىشبايەۆ ەدى.

1928 جىلى تەاتر الماتىعا قونىس اۋدارسا، 1937 جىلى اكادەميالىق اتاققا يە بولدى.

1961 جىلى 10 تامىزدا قازاق كسر مينيسترلەر كەڭەسىنىڭ قاۋلىسىمەن قازاقتىڭ مەملەكەتتىك اكادەميالىق دراما تەاترىنا ۇلى سۋرەتكەر مۇحتار ومارحان ۇلى اۋەزوۆتىڭ ەسىمى بەرىلدى. 

1981 جىلى تەاتر جاڭا عيماراتقا كوشتى (اباي داڭعىلى، 103)

قازاق ونەرىنىڭ قاراشاڭىراعى –م.اۋەزوۆ اتىنداعى قازاق مەملەكەتتىك اكادەميالىق دراما تەاترى 92 جىلدىق تاريحىندا تالاي اسۋلاردان ءوتىپ، تالاي كەزەڭدەردى تاريح قويناۋىنا قالدىردى. بۇل تەاتردىڭ كيەلى ساحناسىندا قازاق تەاتر ونەرىنىڭ وركەندەۋىنە ۇلەس قوسقان  ساحنا مايتالماندارى ەڭبەك ەتتى. بۇگىندە تەاتردىڭ اقساقالدارىنا اينالعان قازاقستاننىڭ ەڭبەك ەرى، كسرو جانە قازاقستاننىڭ حالىق ءارتيسى ءاسانالى ءاشىموۆ، قازاقستاننىڭ حالىق ارتيستەرى: ءسابيت ورازبايەۆ، تورعىن تاسىبەكوۆا، نۇكەتاي مىشبايەۆا، ەسمۇحان وبايەۆ جانە ت.ب. سول كەزەڭدەردەگى ابىزداردىڭ ءىزىن جالعاپ، تەاتر ونەرىنە ادال قىزمەت ەتىپ كەلەدى.

تەاتر ۇجىمى 92 جىلدىق تاريحىندا الەمنىڭ الپاۋىت ەلدەرىندە ونەر كورسەتىپ، الىس-جاقىن شەتەلدەردە ۇيىمداستىرىلعان تەاتر فەستيۆالدەرىنەن جۇلدەلى ورىندارعا يە بولىپ ءجۇر.

1995 جىلى تەاتردا ۇيىمداستىرىلعان «تەاتر كوكتەمى» فەستيۆالى داستۇرگە اينالىپ، جىل سايىن وتكىزىلىپ كەلەدى.

تەاتر رەپەرتۋارىنان ۇلتتىق، الەمدىك كلاسسيكا مەن زاماناۋي دراماتۋرگيا جانە اۋدارما شىعارمالار ورىن العان.

قازاقستاننىڭ حالىق ارتيستەرى ەڭبەك ەتەتىن تەاتر ۇجىمىندا، ەلىمىزگە ەڭبەگى سىڭگەن ونەر قايراتكەرلەرى مەن جاس بۋىن وكىلدەرى باقيعا اتتانعان الىپتاردىڭ ءىزىن جالعاپ قىزمەت ەتۋدە.

تەاتردا 1968 جىلى مۋزەي جۇمىس جاساسا، تەاتردىڭ ۆەب-سايتى ونەر ورداسىنداعى جاڭالىقتاردى كورەرمەندەرىمەن تۇراقتى تۇردە ءبولىسىپ وتىرادى. سونداي-اق، الەۋمەتتىك جەلىلەردەگى تەاتر پاراقشالارىن اقپاراتپەن قامتاماسىز ەتۋ جولعا قويىلعان.

قاراشاڭىراقتا باسشىلىق، شىعارماشىلىق جانە تەحنيكالىق قۇرام، اكتەرلەردى قوسقاندا 300-گە جۋىق ادام قازاق مادەنيەتىنە، تەاتر ونەرىنە قىزمەت ەتىپ ءجۇر.

2016 جىلدىڭ 27-ناۋرىزىندا تەاتردىڭ 90 جىلدىق مەرەيتويى ۇلكەن دەڭگەيدە اتالىپ ءوتتى. مەرەيتويعا ەلباسى ن.نازاربايەۆتىڭ ارنايى قۇتتىقتاۋ جولداپ، «ۇلى مۇحتار اۋەزوۆتىڭ ەسىمىن يەلەنەتىن بۇل تەاتردىڭ تاريحى تەرەڭ ءارى تاماشا داستۇرلەرگە باي جانە ۇلت رۋحانياتىن دامىتۋدا الاتىن ورنى وزگەشە بيىك» دەپ اتاپ كورسەتتى. تەاترعا بەرىلگەن بۇل ۇلكەن باعا ۇلكەن جاۋاپكەرشىلىك جۇكتەيدى.

تەاتردىڭ 92 ماۋسىمشارىندا تۇڭعىش رەت الماتى قالاسىنداعى 8 تەاتردىڭ باسىن قوسقان «تەاتر الەمىندەگى رۋحاني جاڭعىرۋ» اتتى كورمە ۇيىمداستىرىلسا، تەاتر ۇجىمى ءبىر جىلدىڭ ىشىندە لوندون، توكيو قالالارىندا ونەر كورسەتىپ، قازاق ساحنا ونەرىن شەتەلدە سويلەتتى.

 م.اۋەزوۆ اتىنداعى قازاق مەملەكەتتىك اكادەميالىق دراما تەاترى ۇلت رۋحانياتىنا، ۇلتتىق تەاتر ونەرىنىڭ وركەندەۋىنە ءارى قاراي قىزمەت ەتە بەرەدى.