رەسەيدىڭ ماسكەۋ وبلىسىنداعى كولومنا قالاسىندا ازاماتتىق بەلسەندى ۆالەنتين سوكولوۆتى الەۋمەتتىك جەلىدە "وشپەندىلىك قوزدىرعانى" ءۇشىن سوت ۇكىمىمەن ءۇش جىلعا باس بوستاندىعىنان ايىرىلعان. بەلسەندىنى سوت زالىندا قاماۋعا العان دەپ حابارلايدى Qamshy.kz اقپارات اگەنتتىگى azattyq.org سايتىنا سىلتەمە جاساي وتىرىپ. بۇل تۋرالى سوكولوۆتىڭ ايەلىنە سىلتەمە جاساپ Facebook الەۋمەتتىك جەلىسىندە رەسەيلىك بەلسەندى ۆياچەسلاۆ ەگوروۆ حابارلاعان.
الەۋمەتتىك جەلىلەردە جاريالاعان ۆيدەو جانە سۋرەتتەر ءۇشىن ۆالەنتين سوكولوۆتىڭ ۇستىنەن "وشپەندىلىك قوزدىرعان" جانە "ادامنىڭ ار-نامىسىن قورلاعان" دەگەن ايىپتارمەن قىلمىستىق ءىس قوزعالعانى تۋرالى قاڭتاردىڭ 10-ى كۇنى بەلگىلى بولعان. تەرگەۋشىلەر بەلسەندى "ودنوكلاسسنيكي" الەۋمەتتىك جەلىسىندە جاريالاعان سۋرەت پەن جازبانى «ورىستارعا قارسى وشپەندىلىكتى قوزدىرادى»، ال Facebook جەلىسىندەگى پاراقشاسىندا جاريالاعان ەكى ۆيدەوروليكتى «راسيستىك سيپاتتا» دەپ تاپقان.
سوكولوۆ بولسا "ودنوكلاسسنيكي" جەلىسىندەگى پاراقشاسىنا "مۇنداي ساندىراقتى ايتۋ ءۇشىن قانشالىقتى ەسۋاس بولۋ كەرەك دەسەڭىزشى. الدە ادەيى قوزدىرىپ وتىر. وقۋعا قورقاسىڭ" دەگەن كوممەنتاريي جازىپ، داۋلى سۋرەتتى باسقا بىرەۋدىڭ پاراقشاسىنان كوشىرىپ جاريالاعانىن ايتادى.
الايدا كوشىرىپ جاريالاعان كەزدە سۋرەت قولدانۋشىنىڭ پاراقشاسىندا جانە "ءارتۇرلى" پاپكاسىندا ساقتالىپ قالادى، تەرگەۋ ورىندارىنىڭ بەلسەندىگە ايىپ تاعۋىنا دا وسى سەبەپ بولعان دەپ حابارلايدى وۆد-ينفو سايتى.
