مەملەكەت باسشىسى نۇرسۇلتان نازاربايەۆ قازاقستاندىقتاردى العىس ايتۋ كۇنىمەن قۇتتىقتادى، دەپ حابارلايدى Qamshy.kz اقپارات اگەنتتىگى.

ايتا كەتەيىك، 2016 جىلعى 14 قاڭتاردا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ قازاقستان حالقى اسسامبلەياسىنىڭ قۇرىلعان كۇنى 1 ناۋرىزدى ەلىمىزدە العىس ايتۋ كۇنى دەپ جاريالاپ، № 173 جارلىققا قول قويعان بولاتىن. ەلباسىنىڭ قۇتتىقتاۋى:

قۇرمەتتى وتانداستار!

بۇگىن ءبىز بارشامىزعا ورتاق مەرەكە – العىس ايتۋ كۇنىن اتاپ ءوتىپ وتىرمىز.

وسىناۋ ايتۋلى كۇنى قيىن-قىستاۋ سىناق جىلدارىندا ادامگەرشىلىك پەن يماندىلىق ۇستەمدىگىنىڭ جادىمىزدا بولۋى  قازاقستان حالقىن بىرىكتىرەدى.

مەيىرىمدىلىك، ءوزارا كومەك جانە بىر-بىرىنە دەگەن قۇرمەت قازاقتىڭ كيەلى توپىراعىندا كۇللى قازاقستاندىقتار كوزدىڭ قاراشىعىنداي ساقتايتىن ءارى ماقتان تۇتاتىن دوستىق پەن ءوزارا تۇسىنۋشىلىكتىڭ بىرەگەي اتموسفەراسىن قالىپتاستىرۋعا مۇمكىندىك بەردى.

ءوز وتانداستارىمىزعا جانە تۋعان ولكەگە دەگەن كىرشىكسىز العىس سەزىمى بۇل مەرەكەگە ەرەكشە تەرەڭ ماعىنا بەرەدى.

سوندىقتان العىس ايتۋ كۇنىنىڭ باستى ءمانى – تاريحي جادىنى ساقتاۋ، ۇرپاقتار ساباقتاستىعى مەن ىرگەسى بەرىك نەگىزدەگى ەل بىرلىگىن نىعايتۋ بولىپ تابىلادى.

بۇكىل قازاقستاندىقتاردى العىس ايتۋ كۇنىمەن شىن جۇرەكتەن قۇتتىقتايمىن!

سىزدەرگە باق-بەرەكە، بەيبىت ءومىر جانە تابىس تىلەيمىن!