ەگەر ەلدەن شىقپاي جاقسى دەمالعىڭىز كەلسە، Qamshy.kz اقپارات اگەنتتىگى ۇسىناتىن قازاقستانداعى الدىڭعى قاتارى دەمالىس ورىندارىنا نازار سالىڭىز.  

الاكول

«جەر ءجانناتى — جەتىسۋدا» وزەن مەن كولدىڭ قاراسى قالىڭ. سونىڭ ىشىندە كولەمى جاعىنان بالقاشتان كەيىنگى ەكىنشى كول – الاكول. تۇزدى اعىنسىز كول الماتى مەن شىعىس قازاقستاننىڭ شەكاراسىندا ورنالاسقان.

الاكول — ەمدىك قاسيەتى وتە مول اعىنسىز سۋ قويماسى. مۇنداعى ارقانىڭ قۋاڭ دالاسىنداعى قۇرعاق اۋا تەڭىز بەتىندەگى دىمقىل اۋامەن ارالاسىپ جاعاسىنداعى ادامعا جاعىمدى اسەر بەرەدى. كول سۋى دا مينەرالدى رەسۋرستارعا، يودقا، تۇزعا، حيميالىق ەلەمەنتتەرگە باي بولعاندىقتان، سۋدىڭ دەنساۋلىققا پايداسى مەديسينادا دالەلدەنگەن. جەرگىلىكتى جەردىڭ اۋاسى دەرتكە شيپا بولادى.

بالقاش

بالقاش – جارتىلاي اششى، جارتىلاي تۇششىلىعىمەن ەرەكشە تۇيىق كول.

كەرەمەت قۇمدى جاعاجاي، ەمدىك بالشىقتىڭ تابيعي كوزدەرى بار ەرەكشە دەمالىس ورنىنىڭ اسەمدىگىن سوزبەن ايتىپ جەتكىزۋ مۇمكىن ەمەس.

نەنى نازار اۋدارۋىم كەرەك؟ كولدىڭ جاعاسىندا بالقاش قالاسىندا تاۋ-كەن مەتاللۋرگيالىق كومبيناتى جۇمىس ىستەيدى. سوندىقتان وسى ەلدى مەكەننەن الىس دەمالىس ايماعىن تاڭداڭىز.

بۋراباي

كوكشەتاۋداعى بۋرابايدى كوپشىلىك قازاقستانداعى شۆەيساريا دەپ اتايدى. ونىڭ وزىندىك سەبەبى دە بار. بۇل جەرگە تەك قازاقستاندىقتار عانا ەمەس شەتەلدىكتەر دە ءجيى كەلەدى. دەمالىس ورنى ورمان مەن بيىك  تاۋلاردىڭ جانە اشىق كولدەردىڭ اسەم كومبيناسياسىمەن ەرەكشەلەنەدى.

بۇل ايماقتا جاسى جۇزدەن اسقان كونە قاراعايلى ورمان بار. تاۋ اۋاسى مەن   قىلقان جاپىراقتى ورمان قالانىڭ قىم قۋىت تىرشىلىگىنەن شارشاعان اعزاعا ەمدىك قاسيەتىمەن كومەكتەسەدى.

كۋرورتتا اتپەن جۇرۋگە، ۆەلوسيپەدتەردى جالعا الۋعا بولادى جانە جەرگىلىكتى باعىتتاۋشىلار دا قىزمەت كورسەتەدى.  

بۇقتىرما سۋ قويماسى

 ەرتىس وزەنىندە، شىعىس قازاقستان وبلىسى اۋماعىندا، قالبا، نارىن، كۇرشىم جوتالارى ارالىعىندا ورنالاسقان قازاقستانداعى ەڭ ءىرى بوگەن.

بۇقتىرمانىڭ وڭتۇستىك جانە سولتۇستىك جاعالاۋلارى تۋريستەردىڭ سۇيىكتى ورنى، سوندىقتان دەمالىس ايماعى بولىپ تابىلادى. سول جاعالاۋى ەنجار تۋريزمگە ارنالسا، وڭ جاعالاۋى بەلسەندى دەمالىس ءۇشىن وتە ىڭعايلى.

التاي تاۋلارىندا ورنالاسقان بۇقتىرما تەڭىزىنىڭ سۇلۋلىعى  تۋريستەردى وزىنە تارتادى. ال رەكرەاسيالىق ايماقتاردىڭ باسىم بولىگى قاراعايلى ورماندارمەن قورشالعان. كوز قۋانتارلىق سۇلۋلىقپەن قاتار دەنساۋلىققا پايدالى دەمالىستى قالاساڭىز، بۇقتىرماعا بارىڭىز.  

باياناۋىل

باياناۋىل ەلدى مەكەنى – كۋرورتتى ايماق، ول 1985 جىلى ۇلتتىق تابيعي ساياباق ستاتۋسىنا يە بولدى. ساياباق تابيعاتى وتە ەرەكشە جارالعان تابيعاتىمەن ايگىلى: باياناۋىل تاۋلارى باتىستان شىعىسقا قاراي 40-50 شاقىرىم، سولتۇستىكتەن وڭتۇستىككە قاراي 20-25 شاقىرىم.

ەڭ بيىك نۇكتەسى – اقبەت تاۋى، ول 1026 مەرت بيىكتىكتە. تاۋلى-ورماندى وازيس 450 شارشى شاقىرىمدى الىپ جاتىر، ونىڭ نەگىزگى ەرەكشەلىگى – جارتاستار (كەمپىرتاس، كوگەرشىن، بۋلكا (نايزاتاس)، اتتىڭ باسى، تاس جاستىقتار جانە ت.ب.)، سابىندىكول (اۋدانى 7،4 شارشى شاقىرىم) جانە جاسىباي (اۋدانى 4 شارشى شاقىرىم) كولدەرى، ۇڭگىرلەر (اۋليەتاس 22 م) جانە دراۆەرتا ۇڭگىرى (تاستاعى جازۋلار)، قۇمىرا (سارقىراماسى بار 3 م)، تاس شاتقالدارى جانە ت.ب. كورىكتى جەرلەردىڭ بولۋى.

جاسىباي، سابىندىكول جانە تورايعىر كولدەرى جىل سايىن مىڭداعان تۋريستەردى قارسى الادى، بۇل ءۇشىن كول جاعالاۋلارىندا دەمالىس ۇيلەرى مەن پانسيوناتتار كوپتەپ ورنالاسقان.