ونەر دەيتىن الاماندا قاشاندا الدىنا جان سالمايتىن، جولىندا كەزدەسكەن كەدەرگىلەردەن كىدىرمەي وتەتىن قايسار مىنەزدى قازاقتىڭ دارىندى قىزدارى از ەمەس. «ءوزىن ونەردەن تاپقان، ونەردەن ءومىر تاپقان» ايگۇل يمانبايەۆانىڭ بويىنداعى دارىندى بىلاي قويعاندا ونىڭ ەر ادامعا بەرگىسىز ءور مىنەزىن، تاباندىلىعىن، ەڭبەكقورلىعىن ايتپاۋ مۇمكىن ەمەس. تاۋلىگىنە 20 ساعات جۇمىس ىستەپ، 4 ساعات ۇيىقتايتىن ايگۇلدىڭ تالماي ەڭبەك ەتۋىنىڭ سىرى نەدە؟ ەفيردە دە، ساحنادا دا ءجۇزى جارقىراپ تۇراتىن ايگۇل شىنايى باقىتتى ما؟ وسى ساۋالدى ايگۇلدىڭ وزىنەن سۇراپ كورگەندە...

كۇنى كەشە «ا.ي» تەاترى ءوزىنىڭ V ماۋسىمىن «تەمىر قاتىن» كومەديالىق قويىلىمىمەن اشتى. تالايدان بەرى تەاتر ساحناسىندا كورەرمەنمەن قاۋىشۋعا مۇمكىندىگى بولماي كەتكەن ايگۇل يمانبايەۆانىڭ تەاترى كوپشىلىك ساعىنىپ قالسا كەرەك، زالدا بوس ورىن بولمادى.

ەستەرىڭىزدە بولسا «ا.ي» تەاترى «تەمىر قاتىن» كومەدياسىنىڭ پرەمەراسىن وسىدان بىرنەشە جىل بۇرىن قويعان ەدى. وزبەك دراماتۋرگى شاراف بوشبەكوۆتىڭ «تەمىر قاتىن» قويىلىمىندا تەاتر اكتەرلەرى ايگۇل يمانبايەۆانىڭ، قادىرعازى قۋاندىقوۆ، جۇلدىزبەك جۇمانبايدىڭ، اسەت يمانعالييەۆتىڭ، گۇلجامال قازاقبايەۆانىڭ ءوز رولدەرىن شەبەر ويناعاندىعىن ب ا ق وكىلدەرى جارىسا جازعان بولاتىن. كورەرمەن ءارقاشاندا ايگۇلدەن ەرەكشە جاڭالىق كۇتەدى. ايگۇل دە ءوزىنىڭ كورەرمەنىن ءاردايىم جاڭالىعىمەن تاڭعالدىرۋدان جالىققان ەمەس. العاش «ا.ي» تەاترى شىمىلدىعىن جان ءانۋيدىڭ «مەدەيا» سپەكتاكلىمەن اشقانى دا ەسىمىزدە. بەلگىلى رەجيسسەر قۋاندىق قاسىموۆتىڭ رەجيسسەرلىعىمەن قويىلعان «مەدەيا» سپەكتاكلى سوڭعى ەكى جىلدا بىرنەشە حالىقارالىق بايقاۋلاردا باس جۇلدەنى يەلەندى. قانجىعالارى مايلانعان تەاتر ۇجىمى الداعى ۋاقىتتا دا ۇلكەن حالىقارالىق بايقاۋلاردا ب ا ق سىناۋدى جوسپارلاپ وتىر. ناۋرىز ايىندا «ا.ي» تەاترى دۋلات يسابەكوۆتىڭ «اپكە» سپەكتاكلىن قويماق. بۇگىندە تەاتر ۇجىمى پرەمەراعا قىزۋ دايىندالىپ جاتىر. ايگۇل يمانبايەۆا تەاتر ساحناسىندا ءوزىنىڭ بولمىسىن اشاتىن، وڭ جامباسىنا كەلەتىن ءرول ويناۋدى ارماندايتىنىن ءجيى ايتادى. «اپكە» قويىلىمىندا باستى ءرولدى وينايتىن ايگۇل يمانبايەۆانىڭ «اپكەسى» ءساتتى شىعاتىنىنا كۇمانىمىز جوق.

وتكەن جىلدىڭ سوڭىندا ايگۇل يمانبايەۆا استانا قالاسىندا «سەن عانا...» دەپ اتالاتىن جەكە كونسەرتىن بەردى. بۇل كونسەرت تاياۋدا تەلەارنالاردان كورسەتىلدى. ونەر يەسىنىڭ بالالىق شاعىنان بۇگىنگى كۇنىنە دەيىن قامتىلعان شىعارماشىلىق كەشتە كورەرمەن ايگۇلدىڭ ءان الەمىنە بىرگە ساياحات جاسادى، ادەمى ءان، اسەرلى پوەزيا، كوركەم ءسوز تىڭداپ قايتتى.

youtube.com

«ا.ي» تەاترىن ءبىر ءوزى سۇيرەپ جۇرگەن ايگۇل شوۋ-بيزنەستە اتاق-ابىرويدان كەندە ەمەس. ەفيردە كامەراعا ەركەلەپ، سانقىرلى وبرازدا كورىنەتىن ايگۇل بولاشاقتا «سۇلتان سۇلەيمەن» سەريالىنداعى حيۋرەم سۇلتانداي كەيىپكەردىڭ ءرولىن ويناۋدى ارماندايدى. ارمانىن ماقساتقا اينالدىرا بىلەتىن، ماقساتىن جۇزەگە اسىرا بىلەتىن اكتريسا بۇل ارمانىنا دا جەتەدى...

youtube.com

ايگۇلدىڭ كۇن دەمەي، ءتۇن دەمەي اتقارىپ جۇرگەن ەڭبەگىن شەكسىز تىزە بەرۋگە بولادى. تەليەۆيدەنيەدەگى تۇسىرىلىمدەر، تەاترداعى ۇزدىكسىز دايىندىقتاردان شارشامايتىن ايگۇل ومىرىندەگى ەڭ قىمبات جاندار اناسى مەن بالاسىنا كوڭىل بولۋگە دە ۋاقىت تابادى. وسىنداي كۇندەلىكتى سانسىز تىرلىكتەن اكتريسا ءوزىنىڭ جەكە ومىرىنە ۋاقىت تابا الماي جۇرگەندەي.

ءوزىنىڭ قۇربىسى بەلگىلى پروديۋسەر بايان ەسەنتايەۆا ايگۇلدى «گيپەرتالانت يەسى» دەپ باعا بەرگەن ەدى. ەندەشە وسىنداي گيپەرتالانتتى جان ومىردەگى ۇلكەن باقىتقا لايىق ەكەنى داۋسىز. بۇعان ايگۇلدىڭ ءوزى نە دەيدى؟

– ءومىردىڭ زاڭدىلىعى بولار، ومىردە ايەلدىڭ ءبارى وزىنشە اكتريسا. وكپەلەسەك تە، وتىرىك كۇلىپ، وزەگىمىزدى وكىنىش ورتەسە دە، ءوزىمىزدى باقىتتى ەتىپ كورسەتۋگە تىرىسامىز. ال ومىردە قانداي اكتريساسىز، باقىتتىسىز با؟

– مەن ومىردە اكتريسا بولا المايدى ەكەم، ءوزىمدى-وزىم الداپ ءومىر سۇرە المايمىن. وسى ۋاقىتقا دەيىن ومىردە قيلى-قيلى بەلەستەردەن ءوتتىم. سونداعى تۇيگەنىم، ادام ءۇشىن ەڭ ۇلكەن باقىت – جاننىڭ تىنىشتىعى ەكەن. جۇرەكتە كەك ساقتاماي، كەشىرە ءبىلۋ باقىت، جۇرەگىڭنىڭ قالاۋىن تىڭداپ، دەر كەزىندە شەشىم قابىلداي ءبىلۋ دە باقىت. وزدەرىڭىز بىلەسىزدەر، اكەم ەكەۋمىزدىڭ ارامىزداعى قارىم-قاتىناستى جۋرناليستەر اسىرا سىلتەپ كورسەتىپ، ءتۇرلى الىپقاشپا اڭگىمەلەردى سان-ساققا جۇگىرتتى. ءبىراق مەن بۇعان دا سابىرلىلىقپەن قاراۋعا تىرىستىم. وتكەن ومىرىمە، تاعدىرىما، ەشكىمگە وكپەم جوق. ەگەر ونەر ادامى ومىردە باقىتسىز بولسا، ول ساحنادا، ەفيردە كورەرمەندى الدايدى. كەيدە باقىتتى بولۋ ءۇشىن ءوز تاعدىرىڭا قارسى شىعۋعا دا تۋرا كەلەدى. مەن دە ءوز تاعدىرىنا قارسى باعىتتا جۇرگەندەردىڭ ءبىرىمىن. ەگەر مەن ولاي ەتپەسەم، باقىتسىز ايەلدەردىڭ ءبىرى بولار ەدىم. ءوزىڭىز ايتقانداي، باقىتتى كورىنگىسى كەلەتىن ايەلدىڭ ءبارى بىردەي باقىتتى ەمەس. ويتكەنى ءومىر تەك باقىتتان عانا تۇرمايدى. ەڭ باستىسى، باقىتتى ساتتەرىمىز كوپ بولسىن! جۇرتتىڭ ءبارى ايگۇل نەگە جالعىز ءجۇر دەپ ويلاۋى مۇمكىن. ءبىراق ماعان ءدال ءقازىر بالام ەرجەتكەن شاقتا بىرەۋگە عاشىقپىن، جىگىتىم بار دەگەن سوزدەر جاراسپايدى دا. سوندىقتان جۇرەگىمە جول تاپقان ادام تۋرالى ەشتەڭە ايتا المايمىن. "الاش ايناسى"