ساياسات قاشان دا ەر ادامداردىڭ اتقاراتىن ءىسى بولدى. زامان تالابىنا ساي ايەلدەر دە كوشتەن قالماي، بيلىك باسىندا ءجۇر. قايىرىمدىلىق پەن ادام قۇقىعىن باستى نىسان ەتىپ العاندار دا — ايەلدەر.  Qamshy.kz اقپارات اگەنتتىگى الەم تانىعان ايەلدەردىڭ ءتىزىمىن ۇسىنادى.

ءبىرىنشى ورىندا گەرمانيانىڭ كالسلەرى انگەلا مەركەل تۇر. مەركەل فوربستىڭ ەڭ ىقپالدى ايەلدەر تىزىمىندە سوڭعى جەتى جىلدا ءبىرىنشى ورىندا كەلە جاتىر.

انگەلا دوروتەيا كاسنەر – 1954 جىلى تۋعان. اكەسى – ءدىن ادامى، ول ليۋتەراندىق شىركەۋدە قىزمەت ەتكەن. ال اناسى ءمۇعالىم بولعان، مەكتەپتە لاتىن جانە اعىلشىن تىلدەرىنەن ساباق بەرگەن. كەي دەرەكتەرگە سۇيەنسەك، اتا-اناسى گەرمانيالىق پولياكتار.

بۇگىندە انگەلا مەركەل — گەرمانيانىڭ كانسلەرى.  ۇكىمەت باسشىلىعىنا العاش رەت 2005 جىلى كەلىپ، 2009، 2013 جىلدارداعى سايلاۋلاردا دا جەڭىسكە جەتكەن ا.مەركەل وسى­­مەن كەزەكتى مارتە ءوز ورنىن ساقتاپ قالدى، 2018 جىلى 4ء-شى رەت كانسلەر بولىپ سايلاندى.

گەرمانيادا ەلدى فەدەرالدىق پرەزيدەنت پەن فەدەرالدىق كانسلەر (ۇكىمەت ءتوراعاسى) باسقارادى. كانسلەردىڭ قۇ­زى­رەتى كۇشتىرەك. پرەزيدەنت ەكىنشى ورىندا جۇرەدى. كانسلەردىڭ كانديداتۋراسىن پرەزيدەنت ۇسى­نادى، ونى بۋندەستاگ دەپۋتاتتارى (ءقازىر وندا 630 دەپۋتات بار) بەكىتەدى. كانسلەر 4 جىلعا سايلانادى.

انگەلا مەركەل ەكى رەت تۇرمىستا بولعان. ءبىرىنشى كۇيەۋى – ۋلريح مەركەلمەن 3-كۋرسىندا تانىسىپ، 1977 جىلى وتباسىن قۇرعان. بەس جىلدان سوڭ اجىراسىپ كەتكەن. بۇل جايىندا انگەلا مەركەل:

— ءبىز بارلىعى ۇيلەنىپ جاتقاندىقتان وتباسى قۇردىق. بۇگىندە ول كۇلكىلى ەستىلۋى مۇمكىن، ءبىراق ءبىز ويلانباي نەكەلەستىك، - دەيدى.

انەگەلا مەركەل اجىراسقان كەزدە وزىنە ءبىرىنشى كۇيەۋىنىڭ فاميلياسىن قالدىرىپ، ونى الەمگە تانىتتى.

مەركەلدىڭ ەكىنشى كۇيەۋى – حيميك،  گۋمبولد اتىنداعى بەرلين ۋنيۆەرسيتەتىنىڭ پروفەسسورى.

تەرەزا مەري مەي – 1956 جىلى ۇلىبريتانيانىڭ يستبورن قالاسىندا تۋعان. بريتانيالىق ساياساتكەر، 2016 جىلدان بەرى ۇلىبريتانيا مەن سولتۇستىك يرلانديانىڭ بىرىككەن كورولدىگىنىڭ  پرەمەر-مينيسترى، ۇلىبريتانيا تاريحىندا وسى لاۋازىمعا بەكىگەن  مارگارەت تەچەردەن كەيىنگى ەكىنشى ايەل. 

ۇكىمەت باسشىلىعىنا كەلمەي تۇرىپ تەرەزا مەي 2010-2015 جىلدارى ەلدىڭ ىشكى ىستەر ءمينيسترى قىزمەتىن اتقارعان. جەرگىلىكتى باسىلىمداردىڭ مالىمەتىنشە، مەي ىشكى ىستەردى باسقارىپ تۇرعان ساتتە پوليسيا قىزمەتكەرلەرىنىڭ سانى قىسقارىپ، بيۋدجەتتىڭ دە ازايعانىنا قاراماستان،  ەلدەگى قىلمىستىڭ سانى ازايعان.

ىسكەرلىك پەن ايەلگە ءتان نازىكتىكتى ساقتاي بىلەتىن تەرەزا مەي كوپشىلىك الدىنا ادەمى اشەكەي مەن اڭ تەرىسىنەن جاسالعان بيىك وكشەلى تۋفليمەن شىعۋعا ەش قىسىلمايدى.

تەرەزا مەيدىڭ جەكە ومىرىنە كەلەر بولساق، «مەن ءوز جەكە ءومىرىمدى جۇرتقا جايعىم كەلمەيدى. ءبىز ءسابي سۇيە المادىق. ءسابي سۇيمەدى دەپ ەشكىم مەنى قامقورلىق پەن تۇسىنىستىكتى بىلمەيدى دەپ ويلامايتىن شىعار»،- دەيدى.

— كۇيەۋىم فيليپ ماعان گۇل سىيلايدى. ۇساق دۇنيەلەرگە قاتتى ءمان بەرەدى. مەن جۇمىس ىستەپ وتىرعاندا ماعان شاي اكەلىپ بەرۋى دە مۇمكىن، - دەيدى تەرەزا مەي ءوز كۇيەۋى جايلى.

مەلانيا ترامپ – اقش-تىڭ 45ء-شى پرەزيزەنتى دونالد ترامپتىڭ ايەلى، اقش-تىڭ ءبىرىنشى حانىمى. 1970 جىلى يۋگوسلاۆيانىڭ نوۆو-مەستو قالاسىندا دۇنيەگە كەلگەن.

مەلانيا ترامپ – امەريكالىق فوتومودەل، ساعات جانە قولونەر بۇيىمدارىنىڭ ديزاينەرى.

مەلانيا ليۋبليان ۋنيۆەرسيتەتىنە «ارحيتەكتۋرا جانە ديزاين» ماماندىعىنا وقۋعا تۇسەدى. وقۋدى ءبىرىنشى كۋرستان كەيىن تاستاپ، ميلانعا كوشىپ كەتەدى.

سانبيكەلىك جولىن 16 جاسىندا ميلان مەن پاريجدەگى كورسەتىلىمدەردەردە ءجۇرىپ باستاعان.

دونالد ترامپپەن 2005 جىلى وتباسىن قۇرادى. 2006 جىلى امەريكانىڭ ازاماتتىعىن الدى. 2006 جىلى بەررون ۋيليام ترامپ ەسىمدى ۇلدى دۇنيەگە اكەلدى. 2017 جىلى مەلانيا اقش-تىڭ ءبىرىنشى حانىمى اتاندى.

بۇگىندە مەلانيا ترامپ ساياسي ورتادا ءوزىنىڭ كۇيەۋىمەن ءجيى شىعادى.

مەليندا گەيتس — امەريكالىق كاسىپكەر، الەمدەگى ەڭ باي ادام بيلل گەيتستىڭ ايەلى، فيلانتروپ، بيلل گەيتس پەن مەليندا گەيتستىڭ قايىرىمدىلىق قورىنىڭ ءتوراعاسى. ال بيلل گەيتس – Microsoft كومپانياسىنىڭ نەگىزىن سالۋشىلاردىڭ ءبىرى.

مەليندا 1964 جىلى تەحاس شتاتىنىڭ داللاس قالاسىندا دۇنيەگە كەلگەن. وتباسىنداعى ءتورت بالانىڭ ەكىنشىسى بولعان. اكەسى – ينجەنەر رەيموندا دجوزەف فرەچ پەن ءۇي شارۋاسىنداعى ەلەين اگنەس ەمەرلاندتىڭ وتباسىندا تۋعان.

1994 جىلى بيلل گەيتسقا تۇرمىسقا شىققان. وتباسىلارىندا 3 بالا بار: ەكى قىز، ءبىر ۇل.

جىل وتكەن سايىن ادامزات تاريحىنداعى ەڭ كوپ قايىرىمدىلىق جاساعان قايىرىمدىلىق قورىن جۇرگىزىپ كەلە جەتقان مەلاندا گەيتس ايەلدەردىڭ قۇقىعىنا دا بەي جاي قارامايدى. ايەلدەر قۇقىعىن قورعاۋعا بايلانىستى ءتۇرلى جيىندار وتكىزىپ وتىرادى.

وسى ۋاقىتقا دەيىن بيلل مەن مەلاندا گەيتس 40 ملرد دوللاردى قايىرىمدىلىققا جۇمساعان.

ءىى ەليزاۆەتا (تولىق اتى: ەليزاۆەتا الەكساندرا ماريا) – 1926 جىلى ۇلىبريتانيانىڭ لوندون قالسىندا دۇنيەگە كەلگەن، 1952 جىلدان بەرى ۇلىبريتانيانىڭ پاتشايىمى.

II ەليزاۆەتا حانشايىم ۆيندزور اۋلەتىنەن شىققان. تاققا 1952 جىلدىڭ 6 اقپانىندا، ياعني 25 جاسىندا، اكەسى — VI گەورگتىڭولىمىنەن كەيىن وتىردى.تاريحتا ۇلىبريتانيانى ەڭ ۇزاق بيلەگەن جانە ەڭ ۇزاق ءومىر ءسۇرۋشى مونارح رەتىندە قالىپ وتىر.

ۇلتتار دوستاستىعىنىڭ باسشىسى، سونداي-اق II ەليزاۆەتا حانشايىم ۇلىبريتانيا پاتشالىعىنان بولەك اۆستراليا، انتيگۋا جانە باربۋدا، باگام ارالدارى، باربادوس، بەليز، گرەنادا، كانادا، جاڭا زەلانديا، پاپۋا — جاڭا گۆينەيا، سەنت-ۆينسەنت جانە گرەناديندەر، سەنت-كيتتس جانە نيەۆيس، سەنت-ليۋسيا، سولومون ارالدارى، تۋۆالۋ، يامايكا سياقتى 15 مەملەكەتتىڭ پاتشايىمى بولىپ سانالادى. سونىمەن قاتار، انگليكان شىركەۋىنىڭ باسشىسى جانە ۇلىبريتانيانىڭ قارۋلى كۇشتەرىنىڭ جوعارعى باس قولباسشىسىنىڭ قىزمەتىن اتقارادى.

سيۋزەن ديانا ۆويجيتسكي – امەريكالىق  كاسىپكەر، YouTube-تىڭ  اتقارۋشى ديرەكتورى. سيۋزەن 1968 جىلى 5 ماۋسىمدا كاليفونيا شتاتىنىڭ سانتا-كلارا قالاسىندا دۇنيەگە كەلگەن.

1990 جىلى گارۆارد ۋنيۆەرسيتەتىنىڭ تاريح فاكۋلتەتىن تامامداعان. 1998 جىلى ماگيستر اتانعان. ستەندفورد ۋنيۆەرسيتەتىندە ەكونوميكا ماماندىعىمەن اسپيرانتۋرانى وقىعان.

1999 جىلدان باستاپ google كومپانياسىندا جۇمىس ىستەيدى. ول اتالعان كومپانيانىڭ 16-شى نەمەسە 18ء-شى قىزمەتكەرى.

Google كومپانياسىندا ماركەتينگ بويىنشا العاشقى ديرەكتورى جانە ءار مەرەكە سايىن اۋىسىپ وتىراتىن Google-دىڭ العاشقى بەتىنىڭ ديزاينىن جاساۋشى.

2002-2014 جىلدارى گۋگل كومپانياسىنىڭ جارناما بويىنشا ۆيسە-پرەزيدەنتى قىزمەتىن اتقارعان. 2012 جىلى Google كومپانياسىنا قاراستى Adwords، AdSense، DoubleClick 43،5 ملرد دوللار كولەمىندە تابىس اكەلگەن. 2014 جىلدىڭ اقپانىنان باستاپ يۋتۋبتىڭ اتقارۋشى ديرەكتورى بولىپ قىزمەت اتقارادى. 

سيۋزەن ۆويجيتسكيدىڭ بايلىعى شامامەن – 410 ملن دوللار.

سونىمەن قاتار سيۋزان تۇرمىستا جانە بەس بالانىڭ اناسى.

داليا گريباۋسكايتە – ليتۆا رەسپۋبليكاسىنىڭ پرەزيدەنتى، ساياساتكەر. 1956 جىلى تۋعان.

2001-2004 جىلدارى ليتۆانىڭ قارجى ءمينيسترى قىزمەتىن اتقارعان. 2004-2009 جىلدارى ەۋروكوميسسيانىڭ قارجى سالاسى بويىنشا كوميسارى قىزمەتىن اتقارعان.

2009 جىلى ليتۆاداعى پرەزيدەنت سايلاۋىنا كانديدات رەتىندە قاتىسىپ، 69،05  پايىز داۋىس جيناعان. 2009 جىلدىڭ 12 ماۋسىمىنان باستاپ ەل پرەزيدەنتى قىزمەتىن اتقارىپ كەلەدى.

2014 جىلى وتكەن پرەزيدەنت سايلاۋىنا قاتىسىپ، 7 ۇمىتكەردىڭ اراسىندا جەڭىسكە قول جەتكىزەدى.

داليا گريباۋسكايتە ەشقاشان تۇرمىستا بولماعان جانە بالالارى جوق.

ەلەن دجونسون – سەرليف – ساياساتكەر، 2006 جىلدان بەرى ليبەريانىڭ 24ء-شى پرەزيدەنتى.

ول – افريكا ەلدەرىندەگى العاشقى ايەل پرەزيدەنت.

1972 جىلى گارۆارد ۋنيۆەرسيتەتىنىڭ Master of Public Administration بويىنشا ديپلومىن العاننان كەيىن ليبەريانىڭ قارجى مينيسترلىگىنە كومەكشى بولىپ قىزمەت اتقارۋعا جۇمىسقا شاقىرادى. 1980-85 جىلدارى ليبەريانىڭ قارجى ءمينيسترى قىزمەتىن اتقارادى. سول جىلى رەسپۋبليكا پرەزيدەنتى ەنگىزگەن اسكەري رەجيمگە ۇكىمەت وتىرسىندا سىن ايتقانى ءۇشىن قاماۋعا الىنادى. سودان كەيىن ەلەن ەلدەن قۋىلادى. تەك 1997 جىلى ۇلتتىق بانك پەن Citibankء-تىڭ ەكونوميستى رەتىندە ەلگە ورالادى.

2005 جىلعى پرەزيدەنت سايلاۋىنىڭ ءبىرىنشى كەزەڭىندە 192، 326 داۋىس جينايدى. ەكىنشى كەزەڭ قورىتىندىسى بويىنشا، ليبەريانىڭ پرەزيدەنتى بولىپ سايلانادى.