قازاقستانعا كەلىن بولىپ تۇسكەن رەسەيلىك اننا قازاق وتباسىنا ابدەن سىڭىسكەن. ۆلاديۆوستوكتا ءتۋىپ-وسىپ، جاپونيادا جۇمىس ىستەپ، بۇگىندە قازاق جىگىتىنىڭ باعىنا اينالعان ارۋ Facebook جانە Instagram پاراقشالارىندا «ورىس كەلىن» دەگەن اتپەن تانىمال. جەلىدە باسىنان وتكەن ءتۇرلى وقيعالاردى بايانداپ وتىراتىن ول ورىستاردىڭ تويى جايلى دا بىرەر ءسوز جازىپتى. اتالمىش جازباسى ارقىلى قازاق ۇلتىنىڭ جوعارى مادەنيەتىن كورسەتكىسى كەلگەن بولار دەگەن ويمەن Qamshy.kz اقپارات اگەنتتىگى سايتتا جاريالاۋدى ءجون كوردى.
«كەلەسى تىلەك كۇيەۋ جىگىتتىڭ اعاسىنا بەرىلدى: «ءبىزدىڭ سەرەجا بالا كۇنىندە جۇيرىك ەدى، تەز جۇگىرەتىن. بىردە قۇلاپ قالىپ، تىزەسىن جارالاپ الدى. جىلادى... اششى... ». اناسى سەرەجانى اياپ، وعان سۋ بەردى. الايدا بوتەلكەلەردى شاتاستىرىپ العان بولۋى كەرەك، اراق قۇيىپ جىبەرىپتى. سەرەجا ءىشىپ الدى دا... «اششى!». سەرەجا ابدەن قىزىپ العان. ءار «اششى» سايىن جاستاردىڭ بىر-بىرىنە دەگەن قۇشتارلىعى دا ءسونىپ بارادى. كەلەسى تىلەكتە جاي عانا «چموك» بولدى. ىشكى ۇياتىم ويانىپ بارادى.
تىلەك اياقتالعان سوڭ تامادا سويلەدى: «جاستاردىڭ قۇشتارلىعىن-اي، ءسال سۋىتپاسا بولماس. ەركەكتەر قاۋىمى سىرتقا شىعىپ دەمالىپ قايتسىن»، - دەدى دە، كەتىپ قالدى.
ەكىنشى ۇستەل باستالىپ، ويىندارعا كەزەك كەلدى. بىرەۋىنىڭ بەلىندە قارىنداش، ەكىنشىسىندە بوتەلكە بايلانعان. شارت بويىنشا الگى قارىنداشتى بوتەلكەگە كىرگىزۋ كەرەك. ەندى ءبىرى اپەلسيندى قولدىڭ كومەگىنسىز ەكىنشى ادامعا بەرۋ كەرەك. سەرىگىنىڭ كوزى بايلاۋلى تۇر.
«جاستاردىڭ ءومىرى جەڭىل بولسىن دەسەك، ەنەلەر قۇشاقتارىڭدى اشىڭدار»، - دەپ ەدى تامادا، قۇدا-قۇداعيلار قۇشاقتاسا جونەلدى. «جار-جاردىڭ» ورنىنا الەگروۆانىڭ «سۆادەبنىە سۆەتى» ءانى ورىندالدى. «قىزىل ورىك» پەن «اسپانعا قارايمىننىڭ» ورنىنا حالىق سەرديۋچكانىڭ اندەرىنە سەكەڭدەپ بيلەپ ءجۇر. ءبىر ەر ادامنىڭ وتىرىپ بيلەگەنىنە قاراپ، كوز الدىما «قارا جورعا» ءبيى ەلەستەدى.
تويباستار تاراتۋدىڭ ورنىنا كوك جانە قىزعىلت جورگەككە اقشا جينادى. جورگەكتەگى جينالعان اقشاعا قاراپ، جاستاردىڭ ءبىرىنشى بالاسىنىڭ جىنىسىن انىقتاماق بولدى. قالىڭدىقتىڭ ىشىنە قاراساڭىز، بىرنەشە اپتادان كەيىن-اق بالاسىنىڭ جىنىسىن ۋزي ارقىلى دا انىقتاپ الۋىنا بولاتىنداي.
تويدان سوڭ قالىڭدىقتىڭ اياق كيىمىن ۇرلاپ كەتتى، كەيىن ءوزىن دە الىپ قاشتى. ءبىراق كۇيەۋ جىگىتتىڭ ۇيىنە ەمەس، شىلىم تارتاتىن ورىنعا اپارىپ، ءبىراز ۇستادى. كۇيەۋى جىگىتتىڭ دوسى قالىڭدىقتى قايتارىپ الۋ ءۇشىن، ستريپتيز بيلەدى.
قالىڭدىق گۇل لاقتىردى، ەندى كۇيەۋ جىگىتتىڭ دە كەزەگى كەلدى. ول ءجىپ لاقتىرۋ كەرەك (باتىستىڭ اسەرى). كۇيەۋ جىگىت قالىڭدىعىنىڭ بەلدەمشەسىن كوتەرىپ، تىسىمەن كوك ءجىپتى شەشىپ جاتىر. «قاسقاااا، قاي بەتىمدى شىمشيىن» دەدىم ىشىمنەن، ءوزىم ىزادان جارىلىپ كەتەردەي تۇرمىن. ال كۇيەۋ جىگىت الگى ءجىپتى دوستارىنا لاقتىرىپ جىبەردى.
توي بىتكەن سوڭ داستارحانداعى تاماقتى داياشىلار تۇگەل جيناپ الدى. ۇيگە سارقىت الىپ بارام دەگەن ءۇمىتىم ءۇزىلدى. ەت اسىلمادى، سۇتپەن شاي ىشىلمەدى.
جاستار تورت كەستى، سوسىن بىر-بىرىنە جەگىزدى.
توي توبەلەسسىز وتپەدى. كۇيەۋ جىگىتتىڭ جاقىن دوسى تۋىستاردىڭ بىرىمەن سوزگە كەلىپ، سىرتقا شىعىپ كەتتى.
جاستار تويىنا تەك ەڭ جاقىندارىن شاقىردى».
