«قازكونتەنت» اق ديرەكتورلار كەڭەسىنىڭ تاۋەلسىز ديرەكتورى كونستانتين گوروجانكيننىڭ Facebook الەۋمەتتىك جەلىسىندە قازاق ۇلتى تۋرالى جازعان پىكىرى قىزۋ تالقىلانىپ جاتىر. ول 6 تامىزدا تۇركىستان وبلىسى، اباي اۋىلىندا زورلانعان 7 جاستاعى بالانىڭ ىسىنە قاتىستى جازىلعان جازبانىڭ استىندا پىكىر قالدىرعان.

«ماسەلە گەندە. 19 عاسىردا قازاقستاندا ساياحاتتاعان ساياحاتشىلاردىڭ جازباسىندا جەرگىلىكتى تۇرعىندار مالمەن جىنىستىق قاتىناسقا تۇسەتىنى جانە گوموسەكسۋاليزم تۋرالى ءجيى ايتىلدى» دەپ جازعان.

جەلى قولدانۋشىلارى ونى ءبۇتىن ءبىر قازاق ۇلتىنىڭ نامىسىنا تيگەنىن ايتىپ، جازبا اۆتورىن جاۋاپقا تارتۋدى تالاپ ەتىپ وتىر.

زاڭگەر رۋسلان تۇسىپبەكتىڭ ايتۋىنشا، گوروجانكيندى جاۋاپقا تارتۋ ءۇشىن ونىڭ ۇستىنەن ارىز ءتۇسىرۋ كەرەك. زاڭگەر ءقازىر قوعام بەلسەندىلەرمەن اقىلداسىپ، 1-3 كۇننىڭ ىشىندە گوروجانكيننىڭ ۇستىنەن ارىز جازۋ ماسەلەسىن شەشەتىنىن ايتادى.

- كونستانتين گوروجانكيندى ق ر قىلمىستىق كودەكستىڭ 174 بابى بويىنشا جاۋاپقا تارتۋعا بولادى. ەگەر ونىڭ كىناسى دالەلدەنسە، ول 3، 5 نەمەسە 7 جىلعا دەيىن باس بوستاندىعىنان ايىرىلۋى مۇمكىن. ونى 3 جىلعا دەيىن باس بوستاندىعىنان ايىرا وتىرىپ، قىلمىستىق ايىپپۇل دا سالۋى ابدەن مۇمكىن.

بۇل تۇستا ماسەلە ونى اباقتىعا وتىرعىزۋ ەمەس، سول باپ بويىنشا ونى جاۋاپقا تارتۋ. سوت ونى مىندەتتى تۇردە سوتتايدى دەپ ايتا المايمىن. سوت قانداي شەشىم شىعاراتىنى بەلگىسىز. ءبىزدىڭ مىندەتىمىز ارىز جازىپ، ونى قىلمىستىق جاۋاپقا تارتۋ، ال سوڭعى ۇكىمدى سوت شەشەدى، دەيدى زاڭگەر. 

ايتا كەتەيىك، كونستانتين گوروجانكيننىڭ جازعان پىكىرى قوعامدىق تالقىلاۋعا ۇلاسىپ، حالىق اراسىندا نارازىلىق تۋدىرعاننان كەيىن، ول  Facebook پاراقشاسى ارقىلى حالىقتان كەشىرىم سۇرادى. وندا وكىنەتىنىن جانە زورلاۋ، پەدوفيلدەرگە قاتىستى ماسەلەنى تۇسىندىرگىسى كەلگەنىن ايتقان.  

«مەنىڭ جازباما رەنجىگەندەردىڭ بارلىعىنان كەشىرىم سۇرايمىن. بىرەۋدى رەنجىتۋ ويىمدا بولعان جوق. اسىرەسە ۇلتى بويىنشا، دەپ جازىپتى گوروجانكين.

كونستانتين گوروجانكين قىزمەت ەتەتىن «قازكونتەنت» اق باسقارما ءتوراعاسى ەۆگەنيي كوچەتوۆ قىزمەتكەرىنىڭ ارەكەتىنە قاتىستى پىكىر ءبىلدىردى. وندا كونستانتين گوروجانكيننىڭ جازباسى كومپانيانىڭ ۇستانىمىن بىلدىرمەيتىنىن جازىپتى.

«ارداقتى اعايىندار، كونستانتين گوروجانكيننىڭ پىكىرى ونىڭ جەكە كوزقاراسى، بۇل – Qazcontent كومپانياسىنىڭ ۇستانىمىن بىلدىرمەيدى. 
قازىرگى ۋاقىتتا بۇكىل ءمان-جاي انىقتالۋدا، قازاقستان رەسپۋبليكاسىنىڭ زاڭناماسىنا ساي ارەكەت جاسايتىن بولامىز» دەيدى ەۆگەنيي كوچەتوۆ.

ساراپشى رۋسلان تۇسىپبەكوۆ «قازكونتەنت» كومپانياسى مەملەكەتتىڭ اقشاسىنا «كۇن كورىپ»، مەملەكەتتىك يدەولوگيامەن اينالىسىپ وتىرعاندىقتان، ءوز قىزمەتكەرلەرىنىڭ ارەكەتىنە جاۋاپ بەرۋى ءتيىس» دەگەن ويدا.

- ەۆگەنيي كوچەتوۆ قانداي شارا قولدانادى، ماسەلە سوندا. ول گوروجانكيندى جۇمىستان شىعارۋ كەرەك.  كوچەتوۆتىڭ جەكەسىنە جازدىم، ءبىر تاۋلىك ءوتتى، ەشقانداي جاۋاپ جوق.

ەستەرىڭىزگە سالا كەتەيىك، بۇعان دەيىن دە جەلىدە قازاق ۇلتىنىڭ نامىسىنا تيەتىن جازبا قالدىرعان بىرنەشە جاعدايلار بولدى. قازاقتارعا ءتىل تيگىزۋىنە جول بەرىلۋىن اركىم ءارتۇرلى توپشىلايدى. ءبىرى مۇنى قازاقتاردىڭ جۋاستىعىنان دەسە، ەندى ءبىرى زاڭنىڭ السىزدىگىنەن دەگەن پىكىردە. رۋسلان تۇسىپبەكوۆتىڭ بۇل تۋرالى ءوز پىكىرى بار.

- ونىڭ ەكى سەبەبى بار. رەسەيدىڭ اسەرى جانە ۇلتتىق يدەولوگيانىڭ دۇرىس جۇمىس ىستەمەۋى. رەسەيدىڭ جۇرگىزىپ وتىرعان سىرتقى ساياساتى حالىقتىڭ كوز الدىندا. ماسەلەن، ۋكراينا، قىرىم ماسەلەسى. ءپۋتيننىڭ ءاربىر ايتقان ءسوزى قازاقستاندا بەيبىت، تىنىش جۇرگەن ەتنيكالىق ورىستارعا اسەر ەتەتىن بولۋ كەرەك.

ەكىنشىدەن، ءبىزدىڭ يدەولوگيالىق جاعدايدىڭ مۇشكىل ەكەندىگىندە. ءار اكىمشىلىكتىڭ يدەولوگيا ءبولىمى بار. الايدا ولاردىڭ جۇمىسى ءماز ەمەس سياقتى. قاۋىپسىزدىك قىزمەتى ساياساتقا كەلگەندە جاقسى جۇمىس ىستەيدى. ال ماسەلە يدەولوگياعا تىرەلگەندە نەگە وسالدىق تانىتاتىنىن تۇسىنبەيمىن. يدەولوگيا دەگەن ءبىز ءۇشىن ەڭ وزەكتى ءارى كۇردەلى ماسەلە عوي. قازاق حالقىنا، تاۋەلسىزدىگىنە قارسى شىعۋ، سەپاراتيستىك ماندەگى پىكىر ءبىلدىرۋ دۇرىس ەمەس. ءبىزدىڭ قۇزىرەتتى ورگاندار مۇنداي جاعدايلاردى قاداعالاپ، بىردەن قارسىلىق تانىتۋ كەرەك.

ساراپشى كىم دە كىم ۇلتقا بىرەۋدىڭ ءتىل تيگىزگەنىنە كۋا بولسا قىزۋ قاندىلىققا سالىنباي، زاڭ اياسىندا عانا ارەكەت ەتۋ كەرەك ەكەنىن ەسكەرتەدى.

- بىردەن ارىز جازىپ، قۇزىرەتتى ورگاندارعا شاعىمدانۋ كەرەك. ۇلتتىق قاۋىپسىزدىك قىزمەتى، پروكۋراتۋرا، سوت، ىشكى ىستەر مينيسترلىگى بار. ماسەلە كەيدە اكىمشىلىك، كەيدە قىلمىستىق ءىستىڭ شەڭبەرىندە شەشىلەدى. ولارعا زاڭسىز جاۋاپ بەرسەك، ولار دا زاڭ شەڭبەرىنەن شىعىپ جاۋاپ بەرۋگە قۇقىلى. مەن پىكىر جازعاننىڭ وزىندە گوروجانكين سەكىلدىلەرگە «ءسىز» دەپ جازامىن. جەكە باسىنا تيىسپەيمىن. مادەنيەتتى تۇردە، ادەپتەن وزبايمىن. ولار وزدەرى تۇسىنەدى، ولار دا ءبىزدىڭ ازاماتتارىمىز.

رۋسلان تۇسىپبەكوۆ حالىق سوتقا سەنىم بىلدىرگەنى ءجون دەگەن ويدا.

- حالىقتىڭ كوبى «قازاقستاندا زاڭ ورىندالمايدى. بارلىعىن جەمقورلىق جايلاپ العان» دەگەن پىكىردە. دەسەك تە، ەشكىمدى مەنسىنبەي، «مىقتى» بولىپ جۇرگەندەر ءوز ءىسى ءۇشىن سوتتىڭ الدىندا جاۋاپ بەرۋگە كەلگەندە وزگەرىپ كەتەدى. سول ۋاقىتتا سوتتىڭ قۇدىرەتىن سەزىنەسىڭ.

بۇكىل ۇلتتىڭ شامبايىنا تيەتىن سوزدەردى اشىق تۇردە، اشىق دەرەككوزدەردى «ايقايلاتىپ» جازۋى ماسەلەنىڭ قانشالىقتى ۋشىققانىنان حابار بەرەدى. بۇعان دەيىن دە جەكە ادامنىڭ ەمەس، بۇكىل حالىقتىڭ، ۇلتتىڭ نامىسىنا تيگەندەر «زاڭ»، «سوت»، «جازا»، «شارا» سەكىلدى سوزدەردى ەستىگەننەن كەيىن، بىردەن ەسىن جيىپ، ءتۇرلى سەبەپتەردى ايتىپ، سىلتاۋراتادى. جەكە پاراقشاسىنا بەلگىسىز بىرەۋ بۇزىپ كىرىپ، پىكىر قالدىرعانىن ايتىپ، كەشىرىم سۇراپ قۇتىلىپ كەتەدى. بارلىعى ۇمىتىلادى. كوپ ۋاقىت وتپەي ەكىنشىسى قازاقتاردى قورلايدى. حالىق تاعى شۋ ەتەدى دە، باسىلادى. مۇنداي جاعداي قايتالانباۋى ءۇشىن ماسەلەنىڭ اق، قاراسىن، ناقتى كىمنىڭ جەرگىلىكتى ۇلتقا ءتىل تيگىزگەنىن انىقتاپ، زاڭدى بەلشەسىنەن باسقانداردى ق ر قىلمىستىق كودەكسىندە كورسەتىلگەن باپ بويىنشا جاۋاپقا تارتۋ قاجەت. بۇل وزگەلەرگە دە ساباق بولادى. سەبەبى ۇلتتىڭ نامىسىنا تيۋ – زاڭدى بۇزۋ. ال زاڭدى بۇزعاندار اركەز جاۋاپقا تارتىلۋى ءتيىس.