دينا سۇلەيمەنوۆا ەسىمدى الماتى قالاسىنىڭ تۇرعىنى شاراسىزدىقتان بۇقارالىق اقپارات قۇرالدارىنان قولداۋ كۇتەدى. پاتەر الامىن دەپ باسى بالەگە قالعان جالعىزباستى انانىڭ جانايقايى ءبىزدى بەيجاي قالدىرا المادى. ەركىن وي-پىكىر الاڭى ەكەندىگىمىزدى ەسكەرتە وتىرىپ، ەكىنشى تاراپتىڭ دا تۇسىنىكتەمەسىن جاريالاۋعا دايىنبىز دەگەن اقپاردى وقىرمانعا جەتكىزگىمىز كەلەدى. جوعارعى سوت قانداي شەشىم شىعاراتىنىن بىلمەيمىز، الايدا ادامگەرشىلىك سوتىنا سالساق، جالعىزباستى انانىڭ كوز جاسىنا قالۋ بارىپ تۇرعان قىلمىس ەكەندىگىن ايتپاساق سىن بولار. دينا سۇلەيمەنوۆا ءوز حاتىندا بىلاي دەپ جازادى:

"ق ر جوعارعى سوتىنىڭ ءتوراعاسى جاقىپ اسانوۆتان، ق ر باس پروكۋرورى قايرات قوجامجاروۆتان جانە اقپارات قۇرالدارىنان كومەك سۇرايمىن!

پاتەر الامىن دەپ ريەلتورلاردىڭ الداۋىنا ءتۇستىم. الماتى قالاسى مەدەۋ اۋداندىق سوتىنىڭ سۋدياسى س. جولمانوۆا دا ريەلتور جاعىنا شىقتى. قىسقاشا باياندايىن.

2016 جىلدىڭ قىركۇيەك ايىنان باستاپ الماتى قالاسىنان 2 بولمەلى پاتەر ىزدەدىم. پاتەردى تەك ريەلتور ارقىلى عانا كورە الاسىڭ، ءۇي يەسىمەن كەزدەسۋ مۇمكىن ەمەس. كەيبىر ريەلتورلار قاعازعا قول قويماي، پاتەردى كورسەتۋدەن باس تارتادى، ول نە قاعاز ەكەنىن سۇراعانىمدا، «پاتەردى كورسەتكەنىم تۋرالى ەسەپ» دەدى. كۇنىنە قانشاما پاتەر كورىپ جۇرگەن سوڭ، كەيدە قاعازدارىنا ءۇڭىلىپ، وقىپ تا قارامايسىڭ، سولاردىڭ سوزىنە سەنىپ، قول قويا سالاسىڭ. ءسويتىپ ءجۇرىپ ريەلتورلاردىڭ ءبىرىنىڭ قۇيتىرقى ارەكەتىنە كەز بولىپ، اۋرە-سارساڭعا ءتۇستىم.

2017 جىلى ناۋرىز ايىندا «كرىشا» سايتىنان ءۇي ىزدەپ ءجۇرىپ «يمپەريا نەدۆيجيموستي» اگەنتتىگى ارقىلى مەدەۋ اۋدانىنان قۇرقىلتايدىڭ ۇياسىنداي 2 بولمەلى ەسكى پاتەر كوردىم. ءۇي يەلەرى كوكشەتاۋ قالاسىندا تۇرعاندىقتان ولار وسى اگەنتتىككە كىلتىن قالدىرىپ، ساتۋعا رۇقسات بەرگەن جانە بۇرىنعى كورشىلەرىنە دە كىلت قالدىرعان ەكەن. ءبىراق پاتەردى قىمباتسىندىم. ريەلتور كومپانيا پاتەر يەسى الماتىعا كەلەتىنىن، كەلىسۋگە بولاتىنىن ايتتى. ءسويتىپ سول اگەنتتىكپەن كەلىسىم-شارتقا وتىردىم، ولار ءۇي يەلەرى كەلگەن كەزدە حابارلايتىنىن جانە ءوزىم ءۇي تاپقان جاعدايدا ولارعا ەسكەرتىپ، كەلىسىمشارتتى بۇزۋ كەرەكتىگىن ەسكەرتتى. ءبىراز ۋاقىت ءوتىپ، حابارلاسپاعان سوڭ، سول كەزدە دوللاردىڭ قۇلدىراۋىنا بايلانىستى قايتادان پاتەر ىزدەۋگە كىرىستىم.

«كرىشا» سايتىنان قاراپ ءجۇرىپ، ەربول دەگەن ريەلتورعا كەز بولدىم. ەربول پاتەر كورسەتپەس بۇرىن، ەشتەڭە تولتىرىلماعان قاعاز ۇسىندى، قول قويماسام پاتەردى كورسەتپەيتىنىن ايتتى. پاتەردى كورسەتكەنى جايلى ەسەپ بەرەتىن قاعاز دەگەن سوڭ وقىماستان قول قويدىم. كەيىن سول قاعاز باسىما پالە بولاتىنىن بىلمەدىم. كەلىسىمشارت ەكەنىن ايتپاعان ەدى. كەلىسىمشارت بولسا 1 داناسىن ماعان بەرۋى كەرەك ەمەس پە؟ ونى دا بەرگەن جوق. كەشكە جۇمىستان شىعىپ، پاتەردى كورۋگە بارعاندا سول باياعى كورگەن پاتەر ەكەنىن ءبىلدىم.

ەربول پاتەر باعاسىن 13 ملن 700 مىڭ دەدى، ونىڭ ۇستىنە قىزمەتى 1 مىڭ دوللار ەكەنىن ايتتى. وعان شاما كەلمەگەندىكتەن ەربولدىڭ ريەلتورلىق قىزمەتىنەن باس تارتتىم. سونىمەن ءبارى قالدى.

ءسويتىپ جۇرگەندە مامىر ايىندا، الدىندا ءوزىم سويلەسكەن «يمپەريا نەدۆيجيموست» ريەلتور كومپانياسىنىڭ ديرەكتورى زۆونداپ، ءۇي يەلەرىنىڭ كەلگەنىن جانە ولاردىڭ مەنىمەن كەزدەسكىسى كەلگەنىن ايتتى. ءسويتىپ باعاسىن كەلىسىپ، كەلىسىمشارت جاساپ، قارىزدانىپ، قاۋعالانىپ پاتەردى ساتىپ الدىم.

ارادا ءتورت اي وتكەندە سوتقا شاقىرۋ كەلدى. باياعى ەربول دەگەن ريەلتور جۇمىس ىستەيتىن «گيگانت» كومپانياسى سوتقا بەرىپتى. ەربول قول قويدىرعان قاعاز «مەنىڭ سول كومپانيامەن وتىرعان كەلىسىمشارتىم ەكەن، مەن كەلىسىمشارتتى ورىنداماعان ەكەنمىن. ەربول كورسەتكەن پاتەردى بۇل كومپانيانىڭ قىزمەتىنە اقشا تولەمەي ساتىپ الىپ، بۇل كومپانياعا 858 مىڭ تەڭگە شىعىن كەلتىرىپپىن».

بارىنەن تاڭعالىپ وتىرعانىم، ءالى سوت شەشىمى شىقپاسا دا جەكە سوت ورىنداۋشىسى حابارلاسىپ، كولىگىم مەن پاتەرىمدى ارەستكە قوياتىنى تۋرالى حات جىبەرىپتى. تەلەفون سوعىپ، زىركىلدەپ ەسكەرتەدى تاعى. سوندا، ءالى شىقپاعان سوت شەشىمىن سوت ورىنداۋشىسى قايدان بىلەدى؟

سوت بارىسىندا «گيگانت» ريەلتور كومپانياسى وسى پاتەردىڭ ساتىلىمعا قويىلعانىن «كرىشا» سايتىنان كورىپ، كورشىدەن كىلتتى الىپ، كليەنتتەرگە پاتەردى كورسەتە باستاعانى بەلگىلى بولدى. كەيىن، ولار مەن باس تارتقان سوڭ دا وسى پاتەردى بىرنەشە ادامعا ساتپاقشى بولعانىن قازىرگى كورشىلەردەن بىلدىك.

«گيگانت» كومپانياسىنىڭ پاتەر يەلەرىمەن ەشقانداي كەلىسىمشارتى بولماعان. ونى راستاپ، ءقازىر كوكشەتاۋداعى پاتەر يەلەرى دە حات جىبەرىپ وتىر.

مەن ريەلتورلارعا مۇلدە تولەمەيمىن دەپ وتىرعانىم جوق. سول پاتەردى ەڭ باسىندا تاۋىپ بەرگەن، پاتەر يەسىمەن ارامىزدا دەلدالدىق ەتكەن «يمپەريا نەدۆيجيموستي» اگەنتتىگىنە ريەلتورلىق قىزمەتى ءۇشىن كەلىسىلگەن سومانى تولەدىم. بۇكىل قۇجاتى، چەگى تۇر. ول كومپانيا دا راستاپ وتىر.

ولاي بولسا ايدالاداعى «گيگانت» دەگەن ريەلتور كومپانياعا نە ءۇشىن تولەۋىم كەرەك؟ سوت اياقتالماي تۇرىپ ءۇيىم مەن جەكە كولىگىم نەگە ارەستتە تۇرۋى قاجەت؟ راس، ولار دا پاتەردى كورسەتتى، ءبىراق باعاسىنا كەلىستىرە الماعان سوڭ قوش ايتىسىپ كەتتىك ەمەس پە؟ ەسەپ-قيساپ دەپ ىلدىم-جىلدىم كورسەتكەن قاعازى كەلىسىمشارت بولسا، ونى زاڭدى تۇردە تولتىرىپ، ادامشا كورسەتپەي مە، ءبىر داناسىن بەرمەي مە؟

ءوزىم الماتىدا ون جىلدان استام جاتاقحانادا تۇرىپ كەلە جاتقان جالعىزباستى انامىن. مەكتەپ بىتىرۋگە جاقىنداعان ۇلىم ەكەۋمىز اقىرى پاتەر العانىمىزعا شەكسىز قۋانىپ ەدىك. ءبىراق مىناداي وزبىرلىقتى كورىپ، كۇيزەلدىك. ءوزىمنىڭ دە دەنساۋلىعىم جوق (ونكولوگيالىق وتا جاساتىپ، ءار 3 اي سايىن دارىگەردىڭ قاراۋىندامىن)، ماعان جىعىلعانعا جۇدىرىق بولدى.

وسىعان دەيىن ادۆوكات قىزمەتىن اتقارعان زاڭگەرىممەن قوسا، تاياۋدا كاسىبي ادۆوكات جالداۋعا تۋرا كەلدى. مەن ريەلتورلىق قىزمەت تۋرالى زاڭنىڭ بۇگە-شىگەسىن بىلمەيمىن. ادۆوكات ولاردىكى زورلىق ەكەنى انىق دەپ وتىر. ءبىراق ۋاقىت وتكەن سايىن سوتتا ءوزىمىزدى اقتاپ الارىمىزعا سەنىمىم ازايىپ بارادى. ول از دەسەڭىز «گيگانت» كومپانياسىنىڭ قىزمەتكەرى ەربول ەسىمدى جىگىت، كورشىمە كەلىپ، ەگەر مەنى قازىرگى كورشىڭىزبەن، ياعني مەنىمەن، ەكى رەت كورگەنىڭىزدى سوتتا ايتساڭىز، ءبىز سوتتى جەڭىپ تۇرمىز،-دەپ سەنىمدى تۇردە ايتىپ كەتكەن. ول سەنىمدىلىكتىڭ ارتىندا نە تۇر؟

اقىرى تاياۋدا «گيگانت» كومپانياسىنىڭ تالاپ ارىزىن قاناعاتتاندىرعان سوت شەشىمى شىقتى، ءسويتىپ بارلىعى 803260 تەڭگە تولەۋگە مىندەتتەدى، ول از بولسا سوت ورىنداۋشىنىڭ قىزمەتى ءۇشىن 45380 تەڭگە تولەۋىم قاجەت ەكەن. وسى دا ادىلەت پە؟

اپەللياسيالىق شاعىم ءتۇسىردىم. ءسويتىپ ول سول سوت ماعان سالىنعان اقشا شىعىن ەكى ەسەگە ازايتىپ بەردى. سوتتان شارشاعاندىقتان، تولەپ قۇتىلايىن دەپ كەلىستىم جانە تولەدىم. تولەمدى العانى جونىندە قاعاز بەرىپ، ءىس وسىمەن جابىلدى دەگەن. ەندى جوعارعى سوتقا شاعىم ءتۇسىرىپ، مۇنىمەن دە توقتامايمىز دەپ وتىر".