2005-2006 جىلدارى كۆن ويىندارى ەڭ العاش كورسەتىلە باستاعاندا جۇرتشىلىقتىڭ نازارىنا ىلىگىپ، جاس بۋىننىڭ كوڭىلىنەن شىعىپ، ۇلكەن اۋقىمدى جوباعا اينالعان بولاتىن. كۆن ويىندارى سول كەزدەگى ءبىراز جاستارعا ونەر سالاسىنا جول اشىپ بەرگەن ەدى. شىعارماشىلىق جولىن ەڭ العاش ءدال سول كۆن-نەن باستاپ، بۇگىندە كينو سالاسىنا، رەجيسسەرلىققا بەت بۇرعان اكتەر شاپاعات ورىنبايەۆ جاس بۋىنعا ەڭ الدىمەن كۆن ويىنشىسى، كەيىننەن جالپاق جۇرتقا رەجيسسەر، اكتەر ءارى ءانشى بولىپ تانىلعان. «25 تەڭگە»، «25 تەڭگە 2»، «ءومىر-اي»، «زور» جانە ت.ب. كينوتۋىندىلاردىڭ رەجيسسەرى، ءتۇرلى الەۋمەتتىك، ونىڭ ىشىندە اسىرەسە جەمقورلىق ماسەلەسىنە قاتىستى قىسقاشا تانىمدىق ۆيدەوروليكتەردىڭ اۆتورى بۇگىندە نەمەن اينالىسىپ ءجۇر؟ Qamshy.kz اقپارات اگەنتتىگىنىڭ ءتىلشىسى كوپتەن بەرى كورىنبەي كەتكەن شاپاعات ورىنبايەۆپەن سۇحبات قۇرعان بولاتىن.

– قايىرلى كۇن، شاپاعات مىرزا! ءبىرازدان بەرى كوگىلدىر ەكراننان كورىنبەي كەتتىڭىز. ءقازىر نەمەن اينالىسىپ ءجۇرسىز؟ حالىقتى قانداي جاڭالىقتارمەن قۋانتا الاسىز؟

– قايىرلى كۇن! قازىرگى ۋاقىتتا مەن باسقا سالاعا اۋىسىپ كەتپەدىم، تەك وسى 2007 جىلدان بەرى كينو الەمىنە كىرگەننەن بەرى سودان قول ۇزبەي كەلەمىن. «كوزدەن تاسا بولىپ كەتتى» دەگەن سوزدەردى ءجيى ەستيتىن بولدىم. نە ءۇشىن؟ جالپى، مەن كينورەجيسسەر رەتىندە جۇمىسىمدى باستاعان كەزدە كوبىنە ءوزىم تۇسەتىن ەدىم، ءوزىم تۇسىرگەن كينولاردا دا كەيبىر ەپيزودتارىن وينايمىن. سودان بولار، كينوعا ءوزىم تۇسپەسەم، شاپاعات كينو ءتۇسىرىپ جاتقان جوق دەگەن تۇسىنىك قالىپتاسىپ قالعان. بۇكىل قازاقستان بويىنشا ەمەس شىعار، ارينە، دەگەنمەن شىمقالاداعى نەمەسە الماتىداعى مەنى سىرتىمنان تانيتىن كورەرمەندەر سولاي ويلاپ قالادى. الايدا مەن ەشقايدا كەتكەن جوقپىن، تەك كينوعا تۇسپەي قويدىم.

2009 جىلى رەجيسسەرلىق پوستقا وتىرعاننان بەرى 14 شاقتى فيلم ءتۇسىردىم. اراسىندا ەلگە تانىلعاندارىن قىسقاشا اتاپ وتەيىن: 2009 جىلى «25 تەڭگە» ، «25 تەڭگە 2» بولعاننان كەيىن «ءوزىمىز» دەگەن كينو تۇسىردىك، كەيىن اراعا ۋاقىت سالىپ «ءومىر-اي» دەگەن كينو ءتۇسىرىلدى نۇرجان كەرمەنبايەۆتىڭ قاتىسۋىمەن. سونان سوڭ «ءومىر-اي» فيلمىنەن كەيىن مەندە، ورىسشا ايتقاندا، «پروۆالنىي پروەكت» بولدى «شىمكەنتشە توناۋ» دەگەن. ول فيلم مەنىڭ رۇقساتىمسىز يۋتۋب جەلىسىنە تاراپ كەتتى، بىتپەگەن كينو ەدى، ءبىراق سوتتاسقان جوقپىن. شيكى دۇنيە كورەرمەنگە تارالىپ كەتكەن سوڭ ءبىراز سىندار ايتىلدى. ودان كەيىن «ويتكەنى شىمكەنتتىك» دەگەن جانىبەك شانقارايەۆتىڭ تۇسىرگەن فيلمىندە باستى ءرولدى ويناپ، كوزگە ءبىر كورىندىم. ول كينو كينوتەاترعا شىققانىمەن، يۋتۋب جەلىسىندە جانە تەلەارنالاردان كورسەتىلمەدى. سوندىقتان دا بولار، حالىق ول كينونى شىقپاي كەتتى دەپ ويلايدى، سەبەبى «ويتكەنى شىمكەنتتىك» ءفيلمىن «شىمكەنتشە توناۋ» فيلمىمەن شاتاستىرادى. سونىڭ سالدارىنان قاتتى-قاتتى سىندار ايتىلىپ، كۇيزەلىسكە تۇسكەن جاعدايىم بار. كەيىن ءوزىم ەكى كەمەنىڭ باسىن ۇستاعان سۋعا كەتەدى دەمەكشى، ەگەر مەن تەك رەجيسسۋرا مەن سەنارييمەن اينالىساتىن بولدىم، ال كينوعا ءوزىم تۇسپەيمىن. كەيىن «Hello، اۋىل» دەگەن كينو ءتۇسىردىم، يۋتۋب جەلىسىندە 2 ميلليوننان استام كورىلىم جيناعان، تەلەارنالاردان كورسەتىلدى. سونىمەن بىرگە «اسىل ارنادان» كورسەتىلگەن  جاندوس قۇسايىنوۆ باۋىرىمىز تۇسىرگەن «كوكە» فيلمىنە ءتۇستىم.

ءبىرشاما ۋاقىتتار وتكەننەن كەيىن سەرىك تالاسوۆ ەسىمدى رەجيسسەرمەن بىرلەسىپ الەۋمەتتىك جەلىلەردە تارالعان تانىمدىق، تاربيەلىك ءمانى بار، كوررۋپسياعا قارسى، حالىققا ءبىر وي سالاتىن قىسقا مەتراجدى فيلمدەر تۇسىرە باستادىق. سول ارالىقتا ءبىراز ۋاقىت ءوتىپ، مەن وتباسىممەن الماتى قالاسىنا كوشىپ كەلدىم. 2017 جىلى ەركەبۇلان مولداشوۆ دەگەن ءىنىم، «BN» توبىنىڭ پروديۋسەرىمەن «زور» دەگەن كينو ءتۇسىردىم، بۇل فيلم حالىق اراسىندا ءبىراز تارالدى. بۇل فيلمنەن كەيىن، ءقازىر «باس پروداكشن»، ياعني  نتك تەلەكانالىنىڭ تاپسىرىسىمەن «چۋجيە گرەحي» اتتى ۋكرايندار سەنارييىن جازىپ جاتقان تەلەسەريالدىڭ ءتۇسىرىلىمىن جۇرگىزۋدەمىز. بۇل — 70 مينۋتتان تۇراتىن 120 سەريالى تەلەسەريال. ءتۇسىرىلىم جۇمىستارى ءالى التى ايعا جۇرگىزىلەدى. ەلىمىزدە بۇل العاشقى ەڭ كوپ سەريالى تەلەحيكايا بولماق. بۇل ۋاقىتقا دەيىن بۇعان ۇقساس سەريال تۇسىرىلمەگەن، ەڭ كوبى «ايمان-شولپان» اتتى 100 سەريادان تۇراتىن تەلەحيكايا بولدى.

– ءسىزدى حالىق ەڭ ءبىرىنشى كوڭىلدى تاپقىرلار كلۋبىنىڭ (ءارى قاراي كتك) ويىنشىسى رەتىندە تانىدى. سول جونىندە اڭگىمە ايتساق. بۇگىندە جايدارمان ويىندارىن كورەسىز بە؟ بۇرىنعى قالجىڭ مەن قازىرگى قالجىڭنىڭ ايىرماشىلىعى، ازىلدەردىڭ ساپاسى قانداي؟

– ءقازىر جايدارمان كورەمىن. قازىرگى كتك مەن بۇرىنعى كتك-نىڭ ايىرماشىلىعى: بۇرىن ءبىز ويناعان كەزدە ازىلدەرىمىز تازا ەمەس ەدى، ءبىز ساياساتتى دا قوزعاۋعا مۇمكىندىك بولدى، الايدا سايقىمازاق، جەڭىل ازىلدەرمەن حالىقتى كۇلدىردىك. ال ءازىلدىڭ ساپاسىنا كەلەر بولساق، مەنىڭ ويىمشا، قازىرگى ازىلدەر كتك سترۋكتۋراسىنا كەلگەندە وتە دۇرىس. تەك ءقازىر كوماندا كوپ. نەگە ءبارى بۇرىنعى كتك كوماندالارىن جاقسى دەيدى؟ ويتكەنى وسىدان بىرنەشە جىل بۇرىن كوماندالار از ەدى. بەس-التى كوماندانىڭ باقتالاستىعىن كورگەن كورەرمەن سول كەزدەگى ويىندى جاقسى دەپ ەسەپتەپ، كوماندالاردى ەستە ساقتاپ قالاتىن. ال ءقازىر حالىق جايدارمانشى كوماندالار كوپ بولعاندىقتان بارلىعىن بىردەي ەستە ساقتاپ قالا المايدى، تەك قانا ۇزدىكتەردى قاراپ، قالعاندارىن ساپاسى تومەن كوماندالار دەپ ەسەپتەيدى. مەن بۇل پىكىرمەن كەلىسپەيمىن. قازىرگى جايدارماننىڭ ساپاسى جوعارى دەپ سانايمىن. 

وزىمە كەلەر بولساق، ماعان «نازار اۋدار»، «ارالا-اس»، «بولاشاق» كومانداسى، سونىمەن قاتار، ءوزىمىزدىڭ شىمكەنت قالاسىنىڭ بىرنەشە جايدارمانشىلارى «شىمكەنت جاستار قۇراماسى»، «ارىستىڭ جىگىتتەرى» سەكىلدى كوماندالاردىڭ ازىلدەرى قاتتى ۇنايدى. سونىمەن بىرگە الدىڭعى بۋىننان «ونەر قىراندارى»، «اگراركا ساربازدارى» مەن ءۇشىن وتە كەرەمەت كوماندا. ال وزىمىزبەن قاتار ويناعان «تەحاس» كومانداسى جانە باسقا بىزبەن قاتار ويناعان كوماندالاردىڭ ءبارىن جاقسى كورەمىن.

– شىعارماشىلىق جولىن بىرگە باستاعان جىگىتتەرمەن بۇگىندە قارىم-قاتىناسىڭىز قانداي؟

– بارلىعىمەن كورىسكەن جەردە سالەمىمىز ءتۇزۋ، كەيبىرەۋلەرىمەن ءالى كۇنگە دەيىن جۇمىس ىستەسىپ كەلەمىز، كەيبىرەۋلەرىمەن دوس رەتىندە ارالاسامىز، ونەر جولى بىزدەردى توعىستىرىپ جاتىر. دەگەنمەن اركىم ءار سالاعا كەتكەننەن كەيىن ءدال بۇرىنعىداي تىعىز بايلانىستا ەمەسپىز.

«كوز تيمەسىن» كۆن كومانداسىنىڭ جىگىتتەرىمەن ءالى كۇنگە دەيىن جاقسى ارالاسامىز، وتباسىمىزبەن جاقسى قارىم-قاتىناستامىز. ونەردە دە، ومىردە دە دوستىعىمىز اجىرامادى. مارات دوستايەۆ ءقازىر اكتەر، كينواكتەر، شوۋمەن، ايبەك باينازاروۆ دجەكسون اتىمەن تانىلعان ول ءقازىر ايبا ەسىمدى لاقاپ اتپەن ءوزى ءان جازادى، ەرلان ايتپايەۆ – ەرالاش ول مەملەكەتتىك جۇمىسقا كەتتى، شىمكەنتتەگى جاستار ورتالىعىنىڭ باستىعى بولدى، دانيار ءالجانوۆ دەگەن جىگىت ءانشى بولىپ كەتتى، جالپى، ونەردەن ەشقايسىسى دا الىستاپ كەتپەدى. سونىمەن قاتار، كەزىندە بىرگە ويناعان «تەحاس» كۆن كومانداسى بۇگىنگى «نىسانا» تەاترىنىڭ جىگىتتەرىمەن وتە جاقسى ارالاسامىز، كەز كەلگەن قۋانىشتا بىرگەمىز.

– تەاترعا بەت بۇرۋ ويىڭىزدا جوق پا؟

– شىنىمدى ايتسام، جوق. مەن تەاتر اكتەرى ەمەسپىن، جانىم كينونى سۇيەدى. تەاترلىققا بۇرىن دا كەلە الماعانمىن. مەنىڭ تابيعاتىم سەناريي جازۋ، رەجيسسەرلىق ەتۋ جانە كينودا اكتەر بولۋعا ارنالعان دەپ ويلايمىن.

– جوعارىدا اتاپ وتكەن «باقىتسىزدار باعى» تەلەحيكاياسىنا تولىعىراق توقتالساڭىز. سەنارييىن كىم جازدى؟ كينو نە جايىندا؟ قانداي بەلگىلى تۇلعالاردى كورە الامىز بۇل سەريالدان؟ اكتەرلىق ۇجىم قالاي جاساقتالدى؟

سەريال نتك ارناسىنىڭ تاپسىرىسىمەن «ۆۋزەرى»، «ايجان» دەگەن سەريالداردى تۇسىرگەن «باسپرو» دەگەن پروداكشننىڭ ورىنداۋىمەن وسى سەريالعا مەنى اقىلبەك دوسجان رەجيسسەر رەتىندە شاقىردى. جوعارىدا ايتىپ وتكەندەي، بۇل سەريالدىڭ سەنارييىن ۋكراين ازاماتتارى جازعان ورىس تىلىندە، 120 سەريادان تۇرادى، ءبىراق ارنايى قازاقتىڭ مەنتاليتەتىنە لايىقتاپ جازىپ جاتىر. ورىسشا اتاۋى «چۋجيە گرەحي»، ەفيرگە شىعاتىن كەزىندە اتاۋىن وزگەرتەمىز، ازىرگە «باقىتسىزدار باعى» دەپ قويدىق. دانا كەنتاي اتتى ءانشىنىڭ «باقىتسىزدار باعى» اتتى ءانى ءفيلمنىڭ ساۋندترەگى بولادى. ءفيلمنىڭ ءوزى ءۇش-تورت جانۇيا جايىندا بولماق. سول باياعى اۋىلدان كەلگەن قىز، قالادان بارعان جىگىت دەگەن سياقتى جاتتاندى دۇنيەلەر بار. جالپاق تىلمەن ايتقاندا، ءوزىمىز جەك كورىپ تۇرىپ، الايدا حيت بولىپ كەتەتىنىن ىشتەي سەزىپ تۇرعان تەلەحيكايا. الايدا، شەتەلدىڭ «كەلىن»، «قىز عۇمىرى» دەگەن سياقتى سەريالدارعا قاراعاندا سەنارييى الدەقايدا مىقتى دەپ ايتا الامىن. نەگىزىنەن قوزعالاتىن ماسەلەلەر بايلىق، ساتقىندىق، جەمقورلىق جانە باسقا دا ومىرلىك ماسەلەلەر قوزعالادى. اكتەرلىق قۇرام – ەلۋ پايىز جاستار، ەلۋ پايىز ۇلكەن جانە ورتا جاستاعى كىسىلەر. باس پروداكشنمەن كەلىسىم بويىنشا، سەريالدا وينايتىن ەلگە تانىلعان ازاماتتاردىڭ ەسىمىن اتاي المايمىن. ال جاس بۋىن مەن جاڭا تالانتتار وتە كوپ.

– بۇل فيلم قاشاننان باستاپ كورەرمەنگە جول تارتادى؟

– نتك تەلەارناسىنان كورسەتىلىمى قاراشا ايىنان باستاپ كورسەتىلەدى. العاشقى سەريالارى تەلەديداردا كورسەتىلىپ جاتسا دا، ءبىزدىڭ ءتۇسىرىلىم جۇمىستارى اياقتالمايدى. جوعارىدا اتاپ وتكەنىمدەي، قاڭتار ايىنىڭ سوڭىنا دەيىن ءتۇسىرىلىم جۇمىستارى جالعاسادى. ال ونىڭ باستالعانىنا بۇگىن ەكى اي بولدى، العاشقى ءبىر اي كاستينگ، ياعني اكتەرلار ۇجىمىن جاساقتاۋ ءارى تۇسىرىلىمگە دايىندىق كەزەڭى بولسا، كەيىنگى ايدا بىردەن ءتۇسىرىلىم جۇمىستارى باستالدى.

– بۇگىندە قازاق كينولارى پروكاتقا كوپتەپ شىعىپ جاتىر. ارينە، قۋانتارلىق جاعداي. الايدا ولارعا قاتىستى ايتىلاتىن سىن مەن ءمىن ءالى دە تولاستار ەمەس. كينو سالاسىندا ۇزاق ۋاقىتتان بەرى ەڭبەك ەتىپ جۇرگەن رەجيسسەر رەتىندە قازاق كينولارىنا بەرەر باعاڭىز نەمەسە ايتار سىني پىكىرىڭىز بار ما؟

– ايتارلىقتاي سىن بار دەي المايمىن، سەبەبى ءوزىم سول سىناقتارعا ءتۇسىپ قالاتىن ازاماتتاردىڭ ءبىرىمىن. حالىقتىڭ سىنىنا تۇسكەن كەزدە ارنايى دالەلدەرمەن ءوزىڭدى اقتاپ شىعا المايسىڭ. ەندى عانا دامىپ جاتقان ەل بولعاندىقتان دا حالىقتان سىن ەستىلەدى، ول قالىپتى جاعداي دەپ ويلايمىن. مىسالى، بۇرىن «جارالى سەزىم» اتتى فيلم شىققاندا حالىق ونىڭ ساپاسىنا قاراعان جوق، ول بىردەن حيت بولىپ كەتتى، ال ءقازىر ساپالى دۇنيەلەر كوپ شىعىپ جاتىر، ءبىراق ايتىلاتىن سىن دا كوپ.

ماعان ۇنامايتىنى – كوپتەگەن كينولار ورىسشا شىعادى. كينوتەاتردان شىعاتىن كەز كەلگەن كوممەرسيالىق فيلمدەر ورىس تىلىندە تۇسىرىلەدى. بۇل – تولىقتاي كينوشنيكتەردىڭ كىناسى ەمەس، وعان حالىقتىڭ دا كىناسى بار. مىسالى، ءوزىم تالاي رەت كوردىم، كينوتەاترعا كەلىپ تۇرعان ادامدار پالەن دەگەن قازاقشا كينو دەسە، «وي قويشى، ترانسفورمەرگە كىرەيىكشى، قازاقشا ءفيلمدى يۋتۋبتان كورە سالامىن»، - دەيدى. ياعني، حالىقتىڭ ءوزى قازاقتىڭ كينوسىنا اقشا تولەپ كىرگىسى كەلمەيدى. شەتەلدىڭ كينوسىنا اقشاسىن ايامايدى دا، "قازاقتىڭ كينوسىن ينتەرنەتتەن كورە سالامىز"، - دەيدى. كەيىننەن ءبىز كينودان ءوزىمىزدى اقتاي الماعاننان كەيىن سپونسورلار دا كەلەسى دە كولەمدى قاراجات بولمەيدى، ال مۇنداي جاعداي ساپاعا كەرى اسەرىن تيگىزەدى. دەگەنمەن ءقازىر دە مەملەكەتتىڭ قارجىسىنا تۇسىرىلگەن جاقسى، ساپالى كينولار شىعىپ جاتىر. دەگەنمەن كينو سالاسىندا جۇرگەندەردىڭ اتىنان حالىققا ايتارىم ءوزىمىزدىڭ كينونى قولدامايىنشا بىزدە ساپا وسپەيدى.

كورشى وزبەك ەلىن مىسال رەتىندە الايىق، ولار نەگە بىزدەن كينو سالاسىندا وزىپ كەتتى؟ ونىڭ قىسقاشا تاريحى: مەن ءوز كوزىممەن ولاردىڭ زاڭدارىن وقىدىم، 90 جىلدارى كەڭەس ۇكىمەتى قۇلدىراي باستاعاندا بىزدەگى كوپ قازاقفيلم ماماندارى رەسەيگە قاشىپ كەتىپ قالدى. ال وزبەكستاننىڭ مارقۇم پرەزيدەنتى يسلام كاريموۆ «ەگەر وزبەكستاننان ءبىز تاۋەلسىزدىك العاننان كەيىن بىرەۋ كەتەتىن بولسا، قايتىپ كىرگىزىلمەيدى» دەگەن زاڭ شىعاردى. ال بۇگىندە وزبەكستاننىڭ مەديسيناسى دا، ولاردىڭ كينوسى دا بىزدەن مىقتى. سەبەبى، سول كەزدەگى بىلىكتى ماماندار ءوزىنىڭ ەلىندە قالىپ، جاستاردى تاربيەلەي باستادى. ال بىزدەگى دوسەنت، دوكتورلاردىڭ بارلىعى شەتەلگە كەتىپ قالدى. سونىمەن قاتار وزبەكستاندا «ەگەر تاشكەنت قالاسىنداعى كينوتەاترلاردا ءبىر ايدا 3 ۇلتتىق فيلمدەر كورسەتىلمەسە ول كينوتەاتر جابىلىپ قالادى» دەگەن زاڭ شىق.  مىنە، قانداي مىقتى زاڭ! سوندا كينوتەاترلار وزدەرىنىڭ كاسىبى توقتاپ قالماس ءۇشىن وزبەكفيلمدى وزدەرى قارجىلاندىرىپ وتىردى. از ۋاقىتتىڭ ىشىندە وزبەك ءفيلمى سونشالىقتى دامىپ كەتتى دە، ءتىپتى ءبىز وزبەكتەردىڭ ءفيلمىن كورە باستادىق.

كەيىننەن ءاليا نازاربايەۆا وسى كينو سالاسىنا بەت بۇرىپ كومەكتەسكەلى بەرى بىزدە اقان ساتايەۆتىڭ، راشيد سۇلەيمەنوۆتىڭ جانە باسقا دا مىقتى رەجيسسەرلاردىڭ ساپالى دۇنيەلەرى شىعا باستادى. الايدا جوعارىدا اتاپ وتكەن وزبەك ەلىنىڭ زاڭىن بىزگە دە ەندىرسەك ءالى دە كەش ەمەس دەپ ويلايمىن. ال بۇل زاڭ ەنگىزىلسە بىزگە ءۇش-اق جىل جەتەدى، حالىق ءوزى قازاقفيلمگە اعىلىپ كەلە باستايدى. سونان كەيىن ءوزارا باقتالاستىقپەن ىشىنەن ساپالى مەن ساپاسىز دۇنيەلەر بەلگىلى بولادى. بىزدەگى جاس رەجيسسەرلار دا، ءبىزدىڭ سەناريي دە، ساپا دا وزبەكستانمەن سالىستىرعاندا ون ەسە مىقتى دەپ ايتا الامىن، تەك قولداۋ از.

– ەندى ءسىزدىڭ جەكە ومىرىڭىزگە قاتىستى بىرەر ءسوز قوزعاساق. وتباسىلىق جاعدايىڭىز قانداي؟ قانشا بالا-شاعاڭىز بار؟

–  جەكە ومىرىمە كەلەر بولساق، مەن وتە كەش ۇيلەنگەن ازاماتتاردىڭ ءبىرىمىن، 28 جاسىمدا ۇيلەندىم، وتاۋ قۇرعانىما 4 جىل بولدى، ءۇش جاسار ۇلىم بار. جاقىندا وتباسىممەن الماتىعا كوشىپ كەلدىك، ەكى بولمەلى پاتەردى جالعا الىپ تۇرامىز، بۇگىندە اقشا جيناپ ءجۇرمىن.

– بولاشاققا جوسپارلارىڭىز قانداي؟

– «باقىتسىزدار باعى» تەلەحيكاياسىن اياقتاعاننان كەيىن الدا «مويا حايپوۆايا ماحاببات» دەپ اتالاتىن جوبا كۇتىپ تۇر. بۇگىنگىنىڭ ەڭ اتاقتى تەرمينى «حايپ» تۋرالى كوممەرسيالىق باعىتتا رومانتيكالىق، فانتاستيكالىق كومەديا تۇسىرمەكپىن. فيلم حايپقا جاقىن قىزعا عاشىق بولاتىن وزىنە سەنىمسىز جىگىت جايىندا بولماق فانتاستيكا بار بۇل فيلمدە. العاشىندا باستى رولگە ايجان بايزاقوۆا نەمەسە ماقپال يسابەكوۆا تۇسەدى دەپ ويلاعانمىن، ال جىگىتتىڭ ءرولى ءبىر پەرسوناجدىڭ ءۇش ءتۇرلى كەيىپكە اينالۋىنا قاتىستى ايبەك باينازاروۆ، «نازار اۋدار» كۆن كومانداسىنداعى اقبولات جانە ۆاينەر سەكا وينايدى دەگەن جوسپار بار.

– تانىمدىق قىسقا مەتراجدى فيلمدەردى ءتۇسىرۋدى قايتادان قولعا الاسىز با؟ سول ۆيدەوروليكتەرىڭىزدى سپونسورلارعا ۇسىنىپ كوردىڭىز بە؟

– مىندەتتى تۇردە، بۇل جوبانى قايتادان قولعا الاتىن بولامىز. جوعارىدا اتاپ وتكەن جوبالارىمدى ءبىر رەتتەپ العاننان سوڭ بۇل ىسكە قايتادان كىرىسەمىن. ءقازىر مەندە 20-دان استام قىسقا مەتراجدى فيلمدەردىڭ سەنارييى جازىلىپ تۇر. ال دەمەۋشى قاتىستى ايتاتىن بولسام، شىنى كەرەك، مەن دەمەۋشىلەرگە بارىپ ابدەن شارشاعان، اۋزى كۇيگەن اداممىن. 

– بۇگىنگى جاستارعا، جالپى قوعامعا ايتارىڭىز بار ما؟

– قوعامعا ايتارىم – قازاق كينوسىن 50-60 جىلدان استام تاريحى بار گولليۆۋدپەن سالىستىرماي، وتاندىق تۋىندىلارعا قولداۋ كورسەتەيىك. كينو سالاسى – دا تاۋەلسىزدىگىن 27 جىل بۇرىن العان ءدال قازاق ەلى سياقتى جاس، ەندى دامىپ كەلە جاتقان سالا.

– كوپ راحمەت! كينو سالاسىنا قاتىستى تۇششىمدى سۇحبات قۇردىق دەپ ويلايمىن. الداعى ىستەرىڭىز بەرەكەلى بولسىن!