پسيحولوگياعا قىزىعاتىن جاندار لۋيزا حەي دەگەن ەسىمدى جاقسى تانيدى. موتيۆاسيانى ماي شاممەن ىزدەپ جۇرگەندەر دە تۇبىندە لۋيزا حەيدىڭ جازعاندارىن شولىپ وتەدى. ءتان ازابىنان بۇرىن جان ازابىن تارتىپ جۇرگەنىمىز كوپ بولعاندىقتان لۋيزا حەيدىڭ كىتاپتارىن جاي عانا كوزبەن شالىپ وتپەي، كوڭىلگە توقىپ، ساناعا ءتۇيىپ، ون رەت قايتالاپ وقۋ قاجەت سياقتى. «قامشى» جاقسىلىقتىڭ جارشىسى بولعىسى كەلەدى. سوندىقتان دا جازۋشى مىرزاگەلدى كەمەلدىڭ اۋدارماسىنداعى لۋيزا حەيدىڭ «كوگىلدىر كىتابىن» بىرنەشە بولىمگە بولە وتىرىپ، تۇراقتى تۇردە وقىرماننىڭ نازارىنا ۇسىنىپ وتىرۋدى ءجون دەپ شەشتى. ءبىرىنشى ءبولىم سايت بەتىنەن شىعىپ ۇلگەرگەن بولاتىن. ەندىگى كەزەك ەكىنشى بولىمدە. اتالمىش ءبولىم ادامنىڭ ءوز-وزىن جاقسى كورمەۋ ماسەلەسىنە ارنالعان. قاتەرلى ىسىكتى نەبارى 6 ايدا جەڭىپ، بارشا دارىگەرلەرىن تاڭ قالدىرعان، 2017 جىلى 91 جاسىندا اۋىرماي-سىرقاماي كوز جۇمساعان لۋيزانىڭ وقيعاسى جىگەرىن جاسىتىپ العان جاستارعا ۇلگى بولسىن دەيمىز.
I تاراۋ. ءوز ءومىرىڭدى ساۋىقتىر
مەنىڭ كەيبىر ويلارىم:
ءبىز بارلىق ىس-ارەكەتىمىز ءۇشىن 100 پايىز جاۋاپكەرشىلىك ارقالايمىز.
ءبىزدىڭ ءاربىر ويىمىز ءبىزدىڭ بولاشاعىمىزدى قۇرايدى.
كۇش ءوز باستاۋىن ءارقاشان قازىرگى ساتتەن الادى.
بارلىعى دەرلىك وزدەرىن جەك كورەدى جانە وزدەرىن كىنالى سەزىنەدى.
بارلىعى وزدەرى تۋرالى: «مەن ونشا جاقسى ەمەسپىن» دەپ ويلايدى.
بارلىعى ويعا بايلانىستى، ال ويدى وزگەرتۋگە بولادى.
جاسىرىن رەنىش، اشۋ، ءوزىن جانە باسقالاردى سىناۋ، كىنالى سەزىنۋ – دەنساۋلىق ءۇشىن ەڭ زياندى كوڭىل-كۇي.
قوردالانعان رەنىش پەن اشۋدان تولىق ارىلۋ ماسكۇنەمدىك كەسەلىنەن ەمدەيدى.
ءبىز ءوزىمىزدى ءوزىمىز شىن مانىندە جاقسى كورگەن كەزدە، ءبىزدىڭ ءومىرىمىز دە جاقسارادى.
ءبىزدىڭ وتكەننەن ارىلۋىمىز جانە بارلىعىن دا (ءوزىمىزدى قوسا) كەشىرۋىمىز قاجەت.
ءبىز قازىرگى ساتپەن ءومىر ءسۇرۋدى ۇيرەنۋىمىز قاجەت.
ءوز-وزىڭدى قابىلداۋ مەن ءوز ىس-ارەكەتتەرىڭدى قولداۋ - ۇزاق وزگەرىستەر كىلتى بولىپ تابىلادى.
ءبىز، تەك قانا ءبىز، ءوزىمىزدىڭ تانىمىزدەگى «اۋرۋدى» قولدان جاسايمىز.
مەن نەگە سەنەمىن؟
ءومىر وتە قاراپايىم. ءبىز نە بەرسەك، سونى الامىز.
جۇرتتىڭ بارلىعىنىڭ، ونىڭ ىشىندە مەن دە، ءبىزدىڭ ومىرىمىزدەگى جاقسى-جامان وقيعالار ءۇشىن 100 پايىز جاۋاپكەرشىلىك ارقالايتىنىمىزعا سەنىمدىمىن. ءبىزدىڭ ءاربىر ويىمىز ءبىزدىڭ بولاشاعىمىزدى قۇرايدى. ءاربىر ادام ومىردە وقيعانى وي مەن سەزىمنىڭ قاتىسى ارقىلى جاسايدى. ءبىز ويلايتىن ويلار مەن سول ويلاردى بەينەلەيتىن سوزدەر ومىردە باسىمىزدان وتكىزەتىن جايلاردىڭ ءبارىن تۋىنداتادى. ومىردەگى سول نەمەسە باسقا جايلاردىڭ بارلىعىن دا ءبىز ءوزىمىز قالايمىز، سوسىن ءوزىمىزدىڭ باقىتسىزدىعىمىز بەن كەلەڭسىزدىگىمىز ءۇشىن باسقالاردى قارعاپ، كۇش جۇمساپ جاتامىز. ءبىز ءوزىمىز - ءوز ۋايىمىمىز، قورشاعان ورتا شىندىعى مەن ونداعى بارلىق نارسەلەردىڭ باستاۋى بولىپ تابىلامىز. ەكىنشى جاعىنان العاندا، ءوز سانامىزداعى ۇيلەسىمدىلىك پەن تەپە-تەڭدىكتى ۇستانا وتىرىپ، ءبىز ومىردە سول نارسەلەردى كەزدەستىرە باستايمىز.
ءسىزدى ءدال سۋرەتتەگەن قاي سويلەم؟
«بۇل ومىردە ادامدار ماعان جاماندىق جاسايدى».
«جۇرتتىڭ ءبارى مەنىڭ پروبلەمامدى شەشۋگە كومەكتەسەدى».
ءبىز نەگە سەنسەك، سول ءبىزدىڭ شىندىعىمىزعا اينالادى. ءبىز ءوزىمىز سەنەتىن نارسەلەر مەن ءوز ويلارىمىزدى ءوزىمىز تاڭدايمىز. ءبىزدىڭ سانامىزدان تىسقارى اقىلىمىز ءبىز سەنەتىن نارسەلەردىڭ ءبارىن قابىلدايدى. ءبىزدىڭ نەنى ويلاۋدى ميلليونداپ تاڭداۋعا مۇمكىندىگىمىز بار. ءبىز وسىنى سەزىنگەن كەزدە، «ادامدار ماعان جاماندىق جاسايدى» دەگەننىڭ ورنىنا «جۇرتتىڭ ءبارى ماعان كومەكتەسۋگە تىرىسادى» دەپ ويلاۋعا بولادى. جاراتىلىس كۇشتەرى ءبىزدى ەشقاشان سوتتامايدى دا، سىنامايدى دا. ولار ءبىز قانداي بولساق، سول قالپىمىزدا قابىلدايدى. سوسىن اۆتوماتتى تۇردە تانىمدى بەينەلەيدى. ەگەر ءسىز ىلعي دا جالعىزبىن، مەنى ەشكىم جاقسى كورمەيدى دەپ ويلاۋدى ءجون كورسەڭىز، وندا ءسىز سولاي ءومىر سۇرەسىز.
ءبىراق، ءسىز «دۇنيەدە ماحاببات بار، ال مەن ۇناتامىن جانە ۇنامدىمىن» دەپ ويلاساڭىز، جانە بۇل ءسوزدى ءجيى قايتالاساڭىز، وندا ءسىز بۇنى ءوز باسىڭىزدان وتكەرە دە الاسىز. ءسىزدىڭ ومىرىڭىزدە كۇتپەگەن جەردەن كوپتەگەن تاماشا ادامدار پايدا بولادى، ال ءسىزدى جاقسى كورەتىندەر ودان سايىن جاقسى كورەتىن بولادى.
ءبىز كىشكەنتاي كەزىمىزدە دە ءومىر تۋرالى تۇسىنىكتى ۇلكەندەردەن الامىز
ەگەر سىزگە اسا باقىتتى بولماعان، جەكسۇرىن نەمەسە وزدەرىن كىنالى سەزىنگەن ادامدارمەن ءومىر سۇرۋگە تۋرا كەلگەن بولسا، وندا ءسىز قورشاعان ورتا مەن ءوزىڭىزدى كەرىسىنشە قابىلداۋدى ۇيرەنگەنسىز. «مەن ەشقاشان ەشتەڭەنى دۇرىس جاسامايمىن»، «بۇل مەنىڭ كىنام»، «ەگەر مەن اشۋلانسام، وندا مەنىڭ جامان ادام بولعانىم» - مىنە، ءسىزدىڭ كەيبىر ويلارىڭىز. ءومىردى تۇڭىلۋلەردەن تۇراتىن وسىنداي ويلار قۇرايدى.
ءبىز وسكەن كەزدە بالالىق شاقتاعى كوڭىل-كۇي ورتاسىن جاڭعىرتۋ بەيىمدىلىگى بولادى
بۇل جامان دا ەمەس، جاقسى دا ەمەس، دۇرىس تا ەمەس، ءبىز تەك «ۇيدەگىدەي» ءسوزىنىڭ نەنى بىلدىرەتىنىن بىلەمىز. بىزدەر جەكە قارىم-قاتىناسىمىزدا اكەمىزبەن نەمەسە شەشەمىزبەن قالىپتاسقان قارىم-قاتىناستاردى جاڭعىرتامىز. ءسىزدىڭ اكەڭىزدى نەمەسە شەشەڭىزدى ءدال ەسكە تۇسىرەرلىكتەي ناقسۇيەرىڭىز نەمەسە باستىعىڭىز بولعانى تۋرالى ويلاڭىز. بىزگە اتا-انامىز قالاي قارىم-قاتىناس جاساسا، ءبىز وزىمىزگە سولاي قارىم-قاتىناس جاسايمىز. ءبىزدى اتا-انامىز قالاي سوگىپ، قالاي جازالاسا، ءبىز ءوزىمىزدى سولاي سوگىپ، سولاي جازالايمىز. ولاردىڭ وسىنداي جاعدايدا قولدانعان سوزدەرىن بىزدەر ەستيمىز دە. ەگەر ءبىزدى ءسابي كەزىمىزدە سۇيسە، ەسەيگەن كەزدە ءبىز دە ءوزىمىزدى ءدال سولاي سۇيەمىز.
«سەن ەشقاشان ەشتەڭەنى دۇرىس جاساي المايسىڭ». «سەن كىنالىسىڭ». ءسىز وزىڭىزگە وسىلاي قانشالىقتى ءجيى ايتاسىز؟
«سەن كەرەمەتسىڭ». «مەن سەنى سۇيەم». ال وسىنداي سوزدەردى ءسىز وزىڭىزگە قانشالىقتى ءجيى ايتاسىز؟
مەن بۇل ءۇشىن اتا-انامدى سوكپەيمىن
ءبىز ءبارىمىز قۇرباندىقتىڭ قۇرباندىعىمىز، جانە ءبىزدىڭ اتا-انالارىمىز دا وزدەرى بىلمەگەن نارسەگە ءبىزدى ۇيرەتە المادى. ەگەر اناڭىز ءوزىن قالاي جاقسى كورۋدى بىلمەسە، نەمەسە اكەڭىز ءوزىن قالاي جاقسى كورۋدى بىلمەسە، وندا ءسىز ءوزىڭىزدى قالاي جاقسى كورۋ كەرەك ەكەنىن ۇيرەنە الماۋىڭىز مۇمكىن نارسە. ەگەر اتا-اناڭىزدى وتە جاقسى تۇسىنگىڭىز كەلسە، ولاردىڭ بالالىق شاعى تۋرالى سۇراڭىز، ەگەر جان-جۇيەڭىزبەن بەرىلىپ تىڭداساڭىز، ولاردىڭ قورقىنىشى مەن ومىرگە دەگەن قاتىناسىنىڭ نەگىزىن تۇسىنەسىز. «سىزگە قينالۋ اكەلگەن» ادامداردىڭ وزدەرى دە قازىرگى ءسىز سياقتى قورقىنىشتا بولعان.
ءبىز اتا-انانى ءوزىمىز تاڭدايمىز دەگەنگە مەن سەنەمىن
وسى پلانەتادا، وسى نەمەسە باسقا ۋاقىتتا، وسى نەمەسە باسقا جەردە قايتا تۋۋ وعان كەرەك پە، ءاربىر ادام ءوزى شەشە الادى. ومىردەن ساباق الۋ ءۇشىن، ءوز كەزەگىندە ەۆوليۋسيالىق جولداعى ءبىزدىڭ ودان ءارى رۋحاني دامۋىمىزدى قامتاماسىز ەتۋ ءۇشىن ءبىز وسى جەردە تۋۋدى ءجون كوردىك. …سوسىن، ەسەيە كەلە، ءبىز ادەتتە ولارعا ساۋساعىمىزدى شوشايتىپ: «سەندەر كىنالىسىڭدەر» دەپ قىڭقىلدايمىز. شىندىعىندا، ءبىز ولاردى ءوزىمىز تاڭدادىق، سەبەبى ءبىزدىڭ وسى ومىردە ەڭسەرمەك بولعان تىلەگىمىزگە ولار ساي كەلدى.
ءبىز ءوز تانىمىمىزدى بالالىق شاقتا قالىپتاستىرامىز، ال سوسىن ومىردە ءبىزدىڭ تانىمىمىزعا ساي كەلگەن جاعدايلاردى تۋىنداتا وتىرىپ قيمىلدايمىز. وتكەن ءومىر جولىڭىزعا بۇرىلىپ قاراڭىز، سوندا ءسىز سول ءبىر عانا جاعدايدى قايتا-قايتا تۋىنداتىپ وتىرعانىڭىزدى كورەسىز. ءسىز نەگە سەنسەڭىز، سونى تۋىنداتىپ وتىرسىز، ويتكەنى سول سەنىمىڭىز ءسىز سەنىپ وتىرعان نارسەنى بەينەلەيدى، مەن بۇعان سەنىمدىمىن. بۇل جاعدايدا ءسىز بۇل پروبلەمانىڭ قاتىسىن، ونىڭ مولشەرى نەمەسە ونداعى ءقاۋىپتى قانشا ۋاقىت سەزىنەتىنىڭىز سونشالىقتى ماڭىزدى ەمەس.
كۇش باستاۋىن ءارقاشان قازىرگى كەزدەن الادى
وسى كەزگە دەيىن ومىرىڭىزدە بولعان وقيعالاردىڭ ءبارى دە وتكەن تاجىريبەلەرگە نەگىزدەلگەن ءسىزدىڭ تانىمدارىڭىزدان تۋىنداعان.
… ەڭ ماڭىزدىسى – ءقازىر ءسىزدىڭ نەنى ويلاپ، نەگە سەنۋدى ءوزىڭىزدىڭ تاڭداۋىڭىز. بۇل ويلار مەن سوزدەردىڭ ءسىزدىڭ بولاشاعىڭىزدى جاسايتىندىعىن ءارقاشان ەسىڭىزدەن شىعارماڭىز. ءسىزدىڭ كۇشىڭىز – وسى قازىرگى ءسات.
ءسىز جۇمىس ىستەۋگە ءتيىس جالعىز نارسە – ول ءسىزدىڭ ويىڭىز، ال ويدى سانالى تۇردە وزگەرتۋگە بولادى
ءسىزدىڭ پروبلەماڭىزدىڭ سيپاتى قانداي بولسا دا ءبارىبىر، ول – بار بولعانى ءسىزدىڭ ويىڭىزدىڭ بەينەلەنۋى. مىسالى، ءسىز: “مەن جامان اداممىن” - دەپ ويلايسىز. وي ءوزىنىڭ سوڭىنان ءسىز بەرىلەتىن سەزىمدى ەرگىزەدى. سىزدە بۇنداي وي بولماسا سەزىم بولماس ەدى. ويدى سانالى تۇردە وزگەرتۋ قيىن. مۇڭدى ويدى وزگەرتسەڭىز، مۇڭدى سەزىم دە وزگەرەدى. كەرتارتپا ويدى قانشا ۋاقىت ويلاعانىڭىز ءتىپتى دە ماڭىزدى ەمەس. كۇش وتكەندە ەمەس، ءارقاشان دا وسى ساتتە. سوندىقتان دا تۋرا ءقازىر ازاتتىققا شىعىڭىز!
ءسىز بۇعان سەنەسىز بە، جوق پا، ءبىراق ءبىز ءوز ويىمىزدى ءوزىمىز تاڭدايمىز
ءبىز قايتا-قايتا ءبىر نارسە تۋرالى ويلاي بەرۋگە بەيىمبىز، سوندىقتان بىزگە، ءوز ويلارىمىزدى ءوزىمىز تاڭدايتىنداي بولىپ كورىنەدى. ءبىزدىڭ بەلگىلى ءبىر نارسە تۋرالى ويلاعىمىز كەلمەيدى. ءبىز ءوزىمىز تۋرالى قانشالىقتى ءجيى جاقسى ويلاعىمىز كەلمەيتىنىن ەسىڭىزگە ءتۇسىرىڭىزشى. ال، ءقازىر ءوزىمىز تۋرالى جامان ويلاماۋدى ۇيرەنەيىك. وسى پلانەتاداعىلاردىڭ بارلىعى دا، مەن بىلەتىن، مەن بىرگە جۇمىس جاسايتىندار ارتىق-كەم دارەجەدە ءوزىن كىنالى سەزىنۋ مەن ءوزىن-وزى جەك كورۋدەن جاپا شەگىپ جۇرگەندەي كورىنەدى. ءبىز ءوزىمىزدى قانشالىقتى جەك كورسەك، سونشالىقتى ءبىزدىڭ جولىمىزدا ساتتىلىكتەر دە از بولادى.
ءبىزدىڭ ورتاق ىشكى تانىمىمىز: “مەن ونشا جاقسى ەمەسپىن”
ءبىز “بۇل ومىردە مەنىڭ قول جەتكىزگەندەرىم از” نەمەسە “مەن بۇعان تاتىمايمىن”… دەگەندى ءجيى-جيى ۇستەمەلەيمىز. سىزگە ۇقساي ما؟ “مەن ونشا جاقسى ەمەسپىن” دەپ ءسىز ءجيى ويلايسىز با، الدە ايتاسىز با؟ ءبىراق، كىم ءۇشىن؟ ونىڭ قانداي ولشەمى بار؟ سىزدە وسى سياقتى تانىم وتە كۇشتى بولاتىن بولسا، وندا قۋانىشتى، قامسىز، تولىققاندى ءومىردى قالاي جاسايسىز؟ ءسىزدىڭ ساناڭىزدان تىسقارىداعى تانىمىڭىز ىس-ارەكەتىڭىزدى ۇنەمى باسقارادى، سوندىقتان ول ءسىزدىڭ ومىرىڭىزدە ۇنەمى پايدا بولادى.
ءبىزدىڭ پروبلەمالارىمىزدى اشۋ-ىزا، باسقالاردى سىناۋ، ءوزىن كىنالاۋ مەن قورقىنىش تۋدىراتىنىنا مەن سەنىمدىمىن
بۇل سەزىمدەر ءوزىنىڭ پروبلەماسىنا وزگەلەردى كىنالايتىن ادامداردا بولادى. تۇسىنەسىز بە، ەگەر ءبىز ءوزىمىز باسىمىزدان ءوتىپ جاتقان جايلارعا ءوزىمىز 100 پايىز جاۋاپكەرشىلىكتى ارقالايتىن بولساق، وندا كىمدى سوگەمىز؟! ءسىزدىڭ ومىردە باسىڭىزدان وتكەرگەن جايلاردىڭ ءبارى - ءسىزدىڭ ءوز ىشكى ويىڭىزدىڭ بەينەلەنۋى. مەن كەيبىر ادامداردىڭ كەلەڭسىز قىلىقتارىن جاقتامايمىن، ءبىز ءۇشىن ماڭىزدىسى بىزگە وسىلاي قارىم-قاتىناس جاساعان ادامداردى ءبىزدىڭ تانىمىمىز وزىنە تارتاتىنىن ءتۇسىنۋ. ەگەر ءسىز: «بارلىعى مەنى سىنايدى، مەن ءۇشىن ەشكىم ەشتەڭە ىستەمەيدى، مەنىمەن ەدەن سۇرتكىسى كەلەدى» دەپ ويلاساڭىز، بۇل ءسىزدىڭ ويلاۋ قالىبىڭىز. ءسىزدىڭ بۇكىل ومىرىڭىزدە وسىنداي ادامداردى وزىنە تارتىپ تۇراتىن وي سىزدە تەرەڭ ساقتالعان، ەگەر ودان باس تارتساڭىز، ونداي ادامدار ءسىزدىڭ ومىرىڭىزدە وز-وزىنەن جوعالادى. ءسىز بۇدان بىلاي مۇنداي ادامداردى وزىڭىزگە تارتپايتىن بولاسىز.
مەن تومەندە ءتاني دارەجەدە كورىنىس تاباتىن وسىنداي ويلاۋ قالىبىنىڭ ناتيجەسىن كەلتىرەمىن: 1. ۇزاق ۋاقىت بويى جيناقتالعان اشۋ-ىزا، وز-وزىنە كوڭىل تولماۋشىلىق، رەنىش ءتاندى جەپ، قاتەرلى ىسىك (راك) اۋرۋىنا اينالادى. 2. باسقالاردى ۇنەمى سىناۋ ريەۆماتيزم سىرقاتىنا شالدىقتىرادى.
كىنالى سەزىنۋ ءارقاشان جازالانۋعا الىپ بارادى، ال جازالاۋ قينالۋدى تۋدىرادى. ول تۋدىراتىن قورقىنىش پەن تىعىرىق اسقازان جاراسى مەن اياق اۋرۋىنىڭ جانە شاشتىڭ ءتۇسۋىنىڭ پايدا بولۋىنا بىردەن ءبىر سەبەپكەر. مەن ءوز تاجىريبەمنەن رەنىش پەن اشۋ-ىزادان قۇتىلۋ ءتىپتى قاتەرلى ىسىكتى دە جوق قىلاتىنىن ءبىلدىم. سىرتتاي قاراعاندا بۇلاي تۇيىندەۋ قارابايىر بوپ كورىنۋى مۇمكىن، ءبىراق مەنىڭ ءوزىم ونى كوردىم جانە ءوز باسىمنان وتكەردىم.
ءبىز وتكەن ۋاقىتقا دەگەن ءوز قارىم-قاتىناسىمىزدى وزگەرتە الامىز
وتكەن ۋاقىت ماڭگىلىككە كەتتى. بۇل فاكت جانە بۇعان ەشتەڭە ىستەي المايسىڭ. ءبىراق وتكەن ۋاقىتقا دەگەن ءبىزدىڭ ويىمىزدى وزگەرتۋگە بولادى. ءسىزدى باياعىدا بىرەۋدىڭ رەنجىتكەنى ءۇشىن قازىرگى ساتتە ءوزىڭدى-وزىڭ جازالاۋ قانداي اقىماقتىق بولىپ كورىنەدى. مەن رەنىش سەزىمدەرى كەرنەگەن ءوز كليەنتتەرىمە: «سالىستىرمالى تۇردە جەڭىلدەۋ بولىپ تۇرعانىندا رەنىشتەرىڭىزدەن ءقازىر قۇتىلۋلارىڭىزدى وتىنەمىن. حيرۋرگتىڭ پىشاعىنىڭ ءسىزدىڭ ۇستىڭىزدەن ءتونىپ تۇرعانىن نەمەسە تابىتتا جاتقان ءساتىڭىزدى كۇتپەڭىز. وندا سىزگە ۇرەيمەن قوڭسى قونۋعا تۋرا كەلەدى. ۇرەي جاعدايىندا جازىلۋ تۋرالى ويعا كوڭىل ءبولۋ وتە قيىن بولادى. ءبىرىنشى ءبىز ءوز قورقىنىشىمىزدان قۇتىلۋىمىز كەرەك» دەپ كەڭەس بەرەمىن.
ەگەر ءبىز دارمەنسىز قۇربانبىز جانە ءبىزدىڭ ومىرىمىزدە بارلىعى دا بايانسىز دەگەن تانىمدى ۇستاناتىن بولساق، وندا جاراتۋشى ءبىزدىڭ تانىمىمىزدى قولدايدى دا، ءبىزدىڭ ءومىرىمىز قوقىسقا اينالادى. بۇلاردىڭ بارلىعى دا ەشكىمگە ەشقانداي پايدا اكەلمەيتىن، جارتىكەش كەرتارتپا پىكىر ەكەنىن ءتۇسىنۋ ءبىز ءۇشىن وتە ماڭىزدى. ءتىپتى قۇداي تۋرالى دا ول ءبىزدىڭ جاعىمىزدا، بىزگە قارسى ەمەس دەپ ويلاۋ كەرەك.
وتكەننەن ازات بولۋ ءۇشىن كەشىرۋگە دايىن بولۋىمىز كەرەك
وتكەننەن ءوزىڭدى ءوزىڭ ازات ەتۋ مەن جۇرتتىڭ ءبارىن، اسىرەسە ءوزىڭدى ءوزىڭ كەشىرۋ ءۇشىن ءبىز وزىمىزگە تاڭداۋ جاساۋىمىز كەرەك. ءبىز قالاي كەشىرۋدى بىلمەسەك تە، ءبىراق مۇنى قاتتى قاجەت ەتۋىمىز كەرەك.
كەشىرىم جاساۋعا قۇلىقتانۋ فاكتىسىنىڭ ءوزى ساۋىعۋعا ىقپال ەتەدى
«سەنىڭ مەن قالاعان بەينەدەي بولا الماعانىڭ ءۇشىن دە سەنى كەشىرەمىن. مەن سەنى كەشىرەمىن جانە سەنى تولىقتاي ازات ەتەمىن». وسىنداي توقتامعا كەلۋ ءسىز كەشىرىم ەتەتىن ادامدى دا، كەشىرىم ەتۋشىنى دە ازات ەتەدى. توقتامعا كەلۋ ءۇشىن وزىڭە-وزىڭ قايتالاي بەرۋ عانا ەمەس (ىشىڭنەن جانە داۋىستاپ)، جازۋ دا ماڭىزدى، اسىرەسە ماشينكادا – بۇل وتە جىلدام، 7 كۇن بويى، كۇنىنە 70 رەتتەن. ەگەر ءسىز بەلگىلى ءبىر ادامدى كەشىرگىڭىز كەلسە كەشىرىلۋشىنىڭ دە، كەشىرىم ەتۋشىنىڭ دە ەسىمىن ايتۋ كەرەك.
بارلىق اۋرۋ كەشىرمەگەننەن بولادى
قالاي ادام اۋىرا باستايدى، سولاي ول ءوز كەۋدەسىنەن كەشىرىم ەتىلۋى قاجەت ادامدى ىزدەۋى كەرەك. ەگەر ءسىز كەشىرىم جاسالۋى وتە قيىن ادامدى تاپساڭىز، وندا تاپ سول ادامدى كەشىرۋ كەرەك. كەشىرۋ – دەمەك، ازات بولۋ. سىزگە قالاي كەشىرۋدى ءبىلۋ قاجەت ەمەس. ەڭ كەرەگى – كەشىرۋگە قۇلىقتىلىق. ارى قاراي سىزگە جاراتۋشىنىڭ ءوزى كومەككە كەلەدى. ءبىز ءوز قينالىسىمىزدى جاقسى تۇسىنەمىز. ءبىراق كەشىرىم جاساۋعا ءتيىستى ادامداردىڭ دا قينالىستى باسىنان وتكەرەتىنىن قابىلداۋ بىزگە قالاي قيىن. سول ساتتە ولاردىڭ وزگەشە ءىس-قيمىل جاساي الماعاندىعىن ءتۇسىنۋ قاجەت.
ماعان ادامدار كەڭەس الۋعا كەلگەن كەزدە، ولاردىڭ پروبلەماسىنىڭ شىعۋ نەگىزىنە باسىم اۋىرمايدى، بۇل دەنساۋلىقتىڭ ناشارلىعى ما، اقشانىڭ جەتىمسىزدىگى مە، قارىم-قاتىناستىڭ ناشارلىعى نەمەسە دامىماعان تالانت پا – مەن بىردەن تەك قانا ءبىر نارسەمەن، ءوز-وزىڭدى جاقسى كورۋدى قالاي دامىتۋ كەرەكتىگىمەن جۇمىس جاساي باستايمىن.
ءوزىڭدى جاقسى كورۋدى دامىتۋ
مەن مىناداي قورىتىندىعا كەلدىم: ءبىز ءوزىمىزدى جاقسى كورگەن كەزدە، ءوز ىس-ارەكەتىمىزدى ماقۇلداعان كەزدە جانە وز-وزىمىزبەن قالعان كەزدە ءبىزدىڭ ءومىرىمىز جايناي تۇسەدى، ءتىپتى سوزبەن ايتىپ جەتكىزە المايسىڭ. بارلىق جەردە - كىشكەنتاي عاجايىپتار. دەنساۋلىق جاقسارادى، قولعا اقشانىڭ ءوزى كەلەدى، ءبىزدىڭ باسقالارمەن قارىم-قاتىناسىمىز گۇلدەنە تۇسەدى، ءبىز ءوزىمىزدىڭ تۇلعالىق قاسيەتىمىزدى شىعارماشىلىق نەگىزدە بىلدىرە باستايمىز. ءبىز ءوزىمىزدى بار جان-تانىمىزبەن جاقسى كورىپ، قۇرمەتتەگەن كەزدە جانە ءوز ىس-ارەكەتىمىزدى ماقۇلداعان كەزدە ءبىز اقىلدىڭ بەلگىلى ءبىر ۇيىمىن جاسايمىز. وسىدان – قورشاعاندارمەن عاجايىپ قارىم-قاتىناس، جاڭا جۇمىس: ءبىز تىپتەن جۇدەيمىز، ءوزىمىزدىڭ قالىپتى سالماعىمىزعا ورالامىز.
ءوزىڭدى ماقۇلداۋ مەن ءوزىڭدى قابىلداۋ – ءبىزدىڭ ومىرىمىزدەگى وڭ وزگەرىستەردىڭ كىلتى
ءوزىڭدى بۇلاي جاقسى كورۋ ەشقاشان، ەشبىر جاعدايدا دا ءوزىڭدى سىناۋعا بولمايتىنىن سەزىنۋ فاكتىسىنەن باستالادى. ءوز باسىمىزدى سىناۋ ءبىزدىڭ قۇتىلۋعا تىرىسقان ويدىڭ بەينەسىنە اسەر ەتەدى. ءوز-وزىڭدى ءتۇسىنۋ سيقىرلانعان قۇرساۋدان شىعىپ كەتۋگە كومەكتەسەدى.
ءسىز جىلدار بويى ءوزىڭىزدى سىنادىڭىز، سوندا دا بۇدان ەشقانداي جاقسىلىق شىقپاعانىن ەستەن شىعارماڭىز
ءوزىڭىزدى جاقسى كورۋگە تىرىسىپ كورىڭىز، جانە بۇدان نە شىعادى ەكەن، بايقاڭىز.
ءوزىڭدى جاقسى كورۋ دەپ ەشقانداي ەگويستىك جاقسى كورۋدى نەمەسە «ءوزىن جاقسى كورۋدى» نىسانا ەتۋ ەمەس. ءوزىن جاقسى كورۋ – دەمەك، ءوز باسىڭنىڭ تىرلىك كەشۋ فاكتىسىن مەرەكەلەۋ مەن ومىردەگى سىيى ءۇشىن قۇدايعا شۇكىرلىك ەتۋ.
ءوزىڭدى جاقسى كورۋ – دەمەك، بارىنەن بۇرىن، ءوز باسىڭدى قۇرمەتتەۋ.
مەن جاقسى كورۋدى سەزىنەمىن:
*ءومىر پروسەسىنىڭ وزىنە دەگەن؛
*ءتىرى بولعانىما قۋانامىن؛
*ءوزىم كورىپ تۇرعان سۇلۋلىققا؛
*باسقا ادامعا دەگەن؛
*بىلىمگە دەگەن؛
*ويلاۋ پروسەسىنە دەگەن؛
*ءبىزدىڭ دەنەمىزگە جانە ونىڭ قۇرىلىمىنا؛
*جانۋارلارعا، قۇستارعا جانە بارلىق ءتىرى قۇبىلىسقا دەگەن؛
*جاراتىلىسقا جانە ونىڭ قالاي قۇرىلۋىنا دەگەن.
ءسىز جەكە ءوزىڭىز بۇل تىزىمگە نە قوسا الار ەدىڭىز؟
ال ەندى، ءبىز ءوزىمىزدى قالاي جاقسى كورەتىنىمىزدى بايقايىق: *ءبىز ۇنەمى وزىمىزگە ۇرسامىز جانە ءوزىمىزدى سىنايمىز؛
*ءبىز ءوزىمىزدى تاماقپەن، ىشىمدىكپەن جانە ەسىرتكىمەن ۋلايمىز؛
*ءبىزدى ەشكىم جاقسى كورمەيدى دەگەن سەنىمدى تاڭدايمىز؛
*ءبىز تولىق حاوس پەن بەرەكەسىزدىكتە ءومىر سۇرۋدەمىز؛
*ءبىز وزىمىزگە قارىز بەن توزگىسىز اۋىرتپالىقتى جاسايمىز؛
*ءبىز قادىر-قاسيەتتى اياققا باساتىن اشىنالار مەن كۇيەۋدى (ايەلدى) وزىمىزگە تارتامىز.
قانداي جاعداي دا، ەگەر ءسىز ءوزىڭىزدىڭ جەتىستىگىڭىزدى جوققا شىعارساڭىز، بۇل ءسىزدىڭ ءوزىڭىزدى جاقسى كورمەيتىنىڭىزدى بىلدىرەدى. مەنىڭ ەسىمە كوزىلدىرىك كيگەن ءوزىمنىڭ ءبىر پاسيەنتكام تۇسەدى. ءبىر ساباق بويىنا ول ءوزىن ءتۇپ نەگىزى بالالىق شاقتا جاتقان ءبىر قورقىنىشىنان ازات ەتتى. كەلەسى كۇنى ول ويانادى دا، كوزىلدىرىكتىڭ وزىنە ەندى قاجەتى جوق ەكەنىن تۇسىنەدى. ونىڭ جانارى 100 پايىز كورەدى. ءبىراق ۇنەمى وزىنە: «مەن بۇعان سەنبەيمىن، مەن بۇعان سەنبەيمىن»، دەپ ايتىپ بۇكىل كۇندى وتكىزەدى. ءسويتىپ، ول كەلەسى كۇنى تاعى دا كوزىلدىرىك كيەدى. ءبىزدىڭ سانامىزدان تىسقارى ويىمىزدا يۋمور سەزىمى جوق. ول وزىندە 100 پايىز كورەتىن جانار پايدا بولعانىنا ءتىپتى دە سەنە المايدى.
كىشكەنتاي بالالاردىڭ مىنسىزدىگى
ءسابي بولعان كەزدەرىڭىزدە سىزدەر قانداي ءمىنسىز ەدىڭىزدەر! بالالارعا ءمىنسىز بولۋ ءۇشىن ەشتەڭە ىستەۋدىڭ قاجەتى جوق. ولار مىنسىزدىكتىڭ ءوزى. جانە دە بىلەدى، ولار – جاراتىلىس اياسى. ولار نەنى كەرەك ەتسە سونى سۇراۋدان قورىقپايدى. وزدەرىنىڭ ەموسياسىن ەركىن بىلدىرەدى. ءسابي رەنجىگەن كەزدە، بۇل تۋرالى كورشىلەردىڭ ءبارىنىڭ بىلەتىنىن ءسىز بىلەسىز. سونداي-اق ءسىز ءسابي شاتتانعان كەزدە ونىڭ كۇلكىسى بۇكىل دۇنيەنى نۇرعا بولەيتىنىن دە بىلەسىز. بالالار ماحابباتقا تولى. كىشكەنتاي بالالار ماحابباتتىڭ جوقتىعىنا توزە المايدى. وسە كەلە، ءبىز ماحابباتسىز ءومىر ءسۇرۋدى ۇيرەنەمىز. سونداي-اق بالالار دەنەسىنىڭ ءاربىر بولشەگىن جاقسى كورەدى، ءتىپتى ءوزىنىڭ قالدىعىن دا.
سىزدەر دە سونداي بولعانسىزدار! ال سوسىن سول ۋاقىتقا دەيىن قورقۋعا ۇيرەنىپ العان ۇلكەندەردى تىڭداي باستادىڭىزدار، ءسويتىپ سىزدەر بىرتىندەپ ءوز مىنسىزدىكتەرىمىزدى جوققا شىعارا باستادىڭىزدار.
اينا الدىنداعى جاتتىعۋ
مەن پاسيەنتىمنەن اينانى الىپ، ءوز كوزىنە قاراۋدى، جانە ەسىمىن اتاپ، «مەن سەنى جاقسى كورەمىن جانە سەن قانداي بولساڭ دا سول كۇيىڭدە قابىلدايمىن»،-دەپ ايتۋدى وتىنەمىن. بۇل كەيبىرەۋلەر ءۇشىن مۇمكىن ەمەس! ادامداردىڭ قالاي ءارتۇرلى قارايتىنىن مەن كورىپ وتىرامىن – كەيبىرەۋلەرى جىلاي باستايدى، ەكىنشىسى اشۋلانادى، ال ءۇشىنشىسى ەشقاشان بۇلاي ىستەي المايتىنىن مالىمدەيدى: مەنىڭ ءبىر پاسيەنتىم اينانى ماعان لاقتىرىپ، قاشىپ كەتتى. وعان اينالىپ كەلگەندە جاعىمسىز ەموسياعا بەرىلمەي ءوزىن اينادان كورۋ ءۇشىن بىرنەشە اي قاجەت بولدى.
ءبىزدىڭ ويىمىزداعىداي ەلەستەتكەن «پروبلەمانىڭ» ناعىز پروبلەما بولىپ شىعۋى سيرەك كەزدەسەدى
مىسالى، ارتىق سالماقتى الايىق. ادامدار جىلدار بويى ارتىق سالماقپەن كۇرەسەدى، ءبىراق ءبارىبىر سەمىز كۇيىندە قالادى. سوندا ولار ومىرلەرىندەگى بارلىق پروبلەما – ولاردىڭ تولىقتىعىنان دەپ ايتا باستايدى. ارتىق سالماق – تەرەڭىرەك ىشكى پروبلەمانىڭ سىرتقى كورىنىسى. مەنىڭ پىكىرىمشە، - بۇل ءارقاشان دا قورقىنىش پەن قورعانىسقا دەگەن قاجەتتىلىك. ءبىز قورقىنىش پەن وزىمىزگە سەنىمسىزدىكتى سەزىنگەن كەزدە ءبىز سونشالىقتى «جاقسى» ەمەسپىز دەپ ويلايمىز، كوبىمىز ءبىزدىڭ اعزامىزدا قورعانىس قىزمەتىن اتقاراتىن مايلارمەن قاپتالامىز.
سەمىز بولعانىڭ ءۇشىن ۇنەمى ءوزىڭدى تۇقىرتۋ، ارتىق جەلىنگەن كەسىكتەر ءۇشىن ءوزىڭدى كىنالى سەزىنۋ – ۋاقىتتى بوسقا وتكىزۋ. 20 جىل وتكەننەن كەيىن دە ءسىز سەمىز بولاسىز، ويتكەنى ءسىز ناعىز پروبلەماعا ءتىپتى دە ماڭايلاعان جوقسىز. سوندىقتان مەن جەكە ءوز باسىم ءارتۇرلى ديەتالاردان باس تارتامىن. ديەتا كومەكتەسپەيدى. جالعىز عانا ۇسىنىسىم - بۇل جامان ويلار ديەتاسى. مەنىڭ كليەنتتەرىم سەمىز بولعاندىقتان وزدەرىن جاقسى كورمەيمىز دەپ ايتادى. ال، مەن تۇسىندىرەمىن: ولار وزدەرىن جاقسى كورمەگەندىكتەن سەمىز.
ءبىز ءوزىمىزدى جاقسى كورىپ، قۇرمەتتەي باستاعان كەزدە بارلىعى دا اۆتوماتتى تۇردە عايىپ بولادى…
ناعىز پروبلەما
سونىمەن زيانسىز، قۇرتاقانداي ايناعا قارايدى دا، پاسيەنتتىڭ كوڭىلى بۇزىلادى. مەن ماساتتانىپ كۇلىپ: «تاماشا، ەندى ءبىز ناعىز پروبلەمانى كورەمىز» دەيمىن. مەن ونىمەن وزىڭە دەگەن ماحابباتتىڭ ماڭىزدىلىعى تۋرالى قاجەتتىلىكپەن اڭگىمەلەسەمىن. ەشقاشان، ەشقانداي سىلتاۋمەن ەشتەڭە ءۇشىن ءوزىڭدى مىنەۋگە بولمايدى، سودان وزىڭە دەگەن ماحاببات باستالادى دەيمىن مەن. مەن ءوز پاسيەنتتەرىمنەن نە ءۇشىن ولار وزدەرىن سىنايدى دەپ سۇرايمىن دا، سونىڭ ۇزىن ءتىزىمىن جاسايمىن. ولار وتە سەمىز نەمەسە وتە ارىق، وتە اقىلدى نەمەسە وتە اقىماق، وتە كورىكسىز (بۇنى وتە ادەمىلەرى ايتادى) نەمەسە وتە ادەمى. اڭعارساڭىز - ءارقاشان «وتە». اقىرىندا، ءىستىڭ انىعىنا جەتەمىز: «مەن سونشالىقتى جاقسى ەمەسپىن». ۋرا! مىنە، ءبىز ناعىز پروبلەماعا جەتەمىز. ولار وزدەرىن سىنايدى، سەبەبى ولار جاقسى ەمەسپىن دەگەنگە سەنۋگە ۇيرەنگەن. ءبىز بۇكىل ەنەرگيامىزدى ءبىر پروبلەمانى شەشۋگە جۇمساۋىمىز كەرەك: ماحاببات جەتىمسىزدىگى جانە وزىڭە قۇرمەت!
وي تازالىعى
ەندى وتكەنگە قايىرىلىپ قارايىق، ءبىز نەگە سەنەمىز. كەيبىر جاندارعا وتكەننىڭ اسەرىنەن ارىلۋ وتە قيىنعا تۇسەدى. ءسىز ءوز پاتەرىڭىزدى جيناۋداسىز دەلىك. ونداعى كەيبىر زاتتارعا سۇيىسپەنشىلىكپەن قاراپ، ودان سايىن ادەمىلەۋ ءۇشىن ونىڭ شاڭىن سۇرتەسىز. باسقا زاتتار جوندەۋدى قاجەت ەتەدى. بۇل فاكتىنى ءسىز ويىڭىزعا ءتۇيىپ قوياسىز. ءسىزدىڭ پاتەرىڭىزدەگى كەيبىر زاتتاردىڭ ەسكىرگەنى سونشالىق، ولاردان تەزىرەك قۇتىلۋ كەرەك. ەسكى جۋرنالدار مەن گازەتتەردى، كەرەك ەمەس كىتاپتاردى ءسىز لاقتىراسىز. جانە بۇعان بولا رەنجۋدىڭ جانە اشۋلانۋدىڭ ءجونى جوق.
ءبىز ويىمىزدى تازارتقان كەزدە دە ءدال سولاي بولادى. كەيبىر تانىمدارىمىز ەسكىرىپ، بىزگە ولاردان قۇتىلۋ كەرەك بولسا، وعان بولا رەنجۋگە بولمايدى. ولار ءبىزدىڭ ومىرىمىزدە ءوتىپ كەتكەن. ءبىز وزىمىزگە بۇگىن تۇستىك جاساۋ ءۇشىن كەشەگى جۋىندىنى قوپارمايمىز عوي. بولاشاق ءومىردى جاساۋ ءۇشىن وي جۋىندىسىن قوپارۋدىڭ دا قاجەتى جوق.
ءبىزدىڭ كەيبىر شەكتەۋلى تانىمدارىمىزدى قاراپ كورەلىك: شەكتەۋلى تانىم: «مەن ونشا جاقسى ەمەسپىن». ونىڭ ءتۇبىرى، اكەسىنىڭ ءوز سابيىنە ۇنەمى سەن اقىماقسىڭ دەپ ايتۋىندا جاتىر.
شەكتەۋلى تانىم: «مەن ءوزىمدى ونشا جاقسى كورمەيمىن». ونىڭ نەگىزى مىنادا: قىزى اكەسىنە ۇناعان نارسەنى جاساۋعا تىرىسقان. ولار ەشنارسەگە كەلىسپەي، ۇنەمى ۇرسىسا بەرەدى. قىز اكەسىنىڭ قولداۋىن كۇتتى، ءبىراق ونىڭ ورنىنا قاتال سىنعا ۇشىرىپ وتىردى. قىز اكەسىنىڭ جانىن اۋىرتقان ونىڭ رەنىشتەرى ەكەنىن تۇسىنگەن جوق، سول سياقتى اكەسىندەگى رەنىشتەر دە ونىڭ ءوزىنىڭ جانىن اۋىرتتى.
شەكتەۋلى تانىم: «ءومىر ءقاۋىپتى». ونىڭ شىعۋ نەگىزى: ۇرەيلى اكە… مەنىڭ باسقا ءبىر ايەل كليەنتىمە ءومىر قاتال دا قيىن بولىپ كورىندى. وعان كۇلۋ قيىنعا ءتۇستى، كەيدە بۇلاي ىستەسە وسىدان كەيىن جامان ءبىر نارسە بولارداي قورقىنىش پايدا بولدى. ونى: «كۇلمە، ەگەر كۇلسەڭ ودان ەشقاشان جاقسى بولمايدى»،- دەپ قايتالاي وتىرىپ تاربيەلەگەن ەكەن.
جاتتىعۋ
ءبىر پاراق قاعازدى الىڭىز دا ءسىز تۋرالى اتا-اناڭىز ايتقان كەلەڭسىزدىكتەردىڭ ءتىزىمىن جاساڭىز. قاز-قالپىندا ەسكە ءتۇسىرۋ ءۇشىن ەڭ از دەگەندە جارتى ساعات كەرەك. ولار اقشا تۋرالى نە ايتتى؟ ولار ءسىزدىڭ دەنەڭىز تۋرالى نە ايتتى؟ ادامدار اراسىنداعى قارىم-قاتىناستار مەن ماحاببات تۋرالى شە؟ ءسىزدىڭ قابىلەتىڭىز تۋرالى شە؟ ەگەر قولىڭىزدان كەلسە تىزىمگە ادىلدىكپەن قاراڭىز جانە وزىڭىزگە: «ماعان بۇل ويلار قايدان كەلگەن» دەپ ايتىڭىز. تازا پاراق الايىق تا، ودان ءارى ازداپ جۇرەيىك. تاعى كىمنەن ءسىز ۇنەمى تەرىس پىكىر ەستىدىڭىز؟
- تۋىستاردان؛
- مۇعالىمدەردەن؛
- دوستاردان؛
- بيلىككە يەلىك ەتۋشىلەردەن.
ءبارىن جازىڭىز. بۇنىڭ ءبارىن جازعان كەزدە، بايقاڭىز، ءسىز ءوزىڭىزدى قالاي سەزىنەسىز. ءسىزدىڭ قولىڭىزبەن جازىلعان ەكى پاراق قاعاز – بۇل ءسىز تەز ارادا قۇتىلۋعا ءتيىس ويلار! بۇل سىزگە ءومىر سۇرۋگە كەدەرگى جاساپ جۇرگەن ويلاردىڭ ءدال ءوزى.
ءوزىڭدى ءسابي ەتىپ ەلەستەتۋ
ەگەر ءبىز ءۇش جاسار ءسابيدى الىپ، ونى بولمەنىڭ ورتاسىنا قويىپ، وعان بار كۇشىمىزبەن ايقايلاساق، وعان اقىماق دەپ جانە وعان نە ىستەۋ كەرەكتىگىن ايتساق (ءتىپتى بىر-ەكى رەت ۇرا دا الامىز)، وندا قورىققان ءسابي بۇرىشتا تىنىش وتىرادى، نەمەسە ءوزىن ءتارتىپسىز ۇستاي باستايدى. بۇنداي سابيلەردە بار بولعانى تاڭداۋدىڭ ەكى-اق مۇمكىنشىلىگى بولادى. ءبىراق ءبىز بۇنداي سابيلەردىڭ شىن مانىندە قولىنان نە كەلەتىنىن بىلمەيمىز.
ەگەر سول بالانى الىپ، وعان ءبىز سەنى جاقسى كورەمىز، قاستەرلەيمىز، ول اقىلدى، زەرەك، ونىڭ ويناعانى بىزگە ۇنايدى، ونىڭ قاتە ىستەگەنىندە تۇرعان تاڭقالارلىق ەشتەڭە جوق (ونى بارلىعى دا ىستەيدى)، جانە ءبىز ەشتەڭەگە قاراماستان ونى ءارقاشان جاقسى كورەمىز دەسەك، - وندا
بۇنداي بالانىڭ مۇمكىنشىلىك الەۋەتىن ءتىپتى دە كوزگە ەلەستەتە الماس ەدىك!
ءبىزدىڭ ءارقايسىمىزدىڭ (جاسىمىزعا قاراماستان) كوڭىلىمىزدە وسىنداي ءۇش جاسار بالا بار…
ءبىزدىڭ ءومىرىمىزدىڭ سەناريىنىڭ نەگىزى – ءبىزدىڭ ەرتە كەزدەگى «باعدارلامامىزدا» جاتىر. ءبىزدىڭ ءبارىمىز دە «ولاردىڭ» بىزگە ايتقاندارى مەن «شىندىق» تۇرىندەگى ۋاعىزدارىن ازىرلىكپەن قابىلداعان ءتارتىپتى ۇلگىلى بالالارمىز. ءبىراق تاعى دا بۇل ءۇشىن وتباسىن كىنالاپ ەمەس، تۇسىنىكتىڭ ەڭ جوعارعى دەڭگەيىنە جەتۋ ماڭىزدى. وتكەندى وزگەرتۋگە بولمايدى، ءبىراق ءبىز وزىمىزگە تاماشا بولاشاق جاسايمىز. ءبىز مۇندا، مىنا جەرگە ءبىزدىڭ شەكتەۋلەرىمىزدى جەڭۋ ءۇشىن كەلگەنبىز. ءبىز مۇندا «ولاردىڭ» بىزگە ايتقاندارىنا قاراماستان، ءوزىمىزدىڭ ەرەكشەلىكتەرىمىزگە قايران قالۋ ءۇشىن كەلگەنبىز. سوندىقتان سىزدەرگە شەكتەۋلەرىڭىزدى جەڭۋ كەرەك، ال ماعان وزىمدىكىن جەڭۋ كەرەك.
وزگەرۋگە دەگەن شەشىم
ومىرگە دەگەن ءبىزدىڭ كوپشىلىگىمىزدىڭ قاتىناسىمىز – بۇل، بارىنەن بۇرىن، دارمەنسىزدىك سەزىمى. ءبىز بايانسىز ومىرگە باياعىدا-اق قول سىلتەگەنبىز، ودان ءۇمىت ەتە بەرمەيمىز. وعان، بىرەۋلەر ءۇشىن – سانسىز ءتۇڭىلۋ، ال بىرەۋلەر ءۇشىن – تۇراقتى قينالىس ت.س.س. كىنالى. ءبىراق ءبارى ءۇشىن ءبىر-اق ناتيجە -ومىردەن تولىق ءتۇڭىلۋ مەن ءوزىن جانە ءوز ءومىرىن مۇلدەم باسقا نەگىزدە كورۋگە دەگەن قۇلىقسىزدىق. جاقسى، ەگەر ءسىز وزىڭىزگە سۇراق قويساڭىز: «مەنىڭ ومىرىمدە ۇدايى تۇڭىلۋلەر نەدەن تۋىندايدى؟». باسقالاردى ءسىزدى اشۋلاندىرۋعا ماجبۇرلەيتىن نە، نەنى ءسىز سونشالىقتى مول ۇلەستىرەسىز؟ ءسىز نە ىستەسەڭىز، سونى قايتارا الاسىز. ءسىز نەعۇرلىم كوبىرەك اشۋلانساڭىز، سىزگە اشۋ تۋعىزاتىن جاعدايلاردى ءسىز سوعۇرلىم تۋىنداتاسىز. ءبىزدىڭ بارلىعىمىز، ءبىزدىڭ ءومىرىمىزدىڭ وزگەرگەنىن قالايمىز، ءبىراق ءبىزدىڭ ءوزىمىز وزگەرگىمىز كەلمەيدى. باسقا بىرەۋلەر وزگەرسىن، «ولار» وزگەرسىن، ال مەن كۇتە تۇرامىن. باسقا بىرەۋدى وزگەرتۋ ءۇشىن، الدىمەن ءسىزدىڭ ءوزىڭىز وزگەرۋىڭىز كەرەك. جانە ءسىز ىشتەي وزگەرۋىڭىز كەرەك. ءبىز ويلاۋ ءادىسىمىزدى، قالاي سويلەۋدى، نەنى ايتۋدى وزگەرتۋىمىز كەرەك. تەك سوندا عانا ناعىز وزگەرىس باستالادى…
«مەن وزگەرگىم كەلەدى» جاتتىعۋى
«مەن وزگەرگىم كەلەدى» دەگەن ءسوز تىركەستەرىن مۇمكىندىگىنشە ءجيى قايتالاڭىز. وسى تىركەستەردى ايتا وتىرىپ، تاماعىڭىزعا قولىڭىزدى تيگىزىڭىز. تاماق – بۇل وزگەرۋگە قاجەتتى ەنەرگيالاردىڭ بارلىعى جيناقتالعان ورتالىق. وزگەرىس ءسىزدىڭ ومىرىڭىزگە ەنگەن كەزدە ءسىز وعان دايىن بولىڭىز. سونداي-اق ءسىز كەي جەرلەردە وزگەرتۋگە دارمەنسىزبىن دەپ ەسەپتەسەڭىز، تۋرا سول جەردە سىزگە وزگەرۋ قاجەت ەكەنىن ءبىلىڭىز. مەنىڭ وزگەرگىم كەلەدى، مەنىڭ وزگەرگىم كەلەدى. جاراتىلىس كۇشى ءسىزدىڭ نيەتىڭىزگە اۆتوماتتى تۇردە كومەكتەسەدى، ال ءسىز ءوز ومىرىڭىزدەگى كوپتەگەن وزگەرىستەردى تاڭقالا وتىرىپ تاپ باساسىز.
وزگە جاتتىعۋ
ايناعا جاقىنداپ، وزىڭىزگە: «مەنىڭ وزگەرگىم كەلەدى» دەڭىز. وسى كەزدە ءوزىڭىزدى قالاي سەزىنەتىنىڭىزگە كوڭىل ءبولىڭىز. ەگەر ءسىز قارسىلاسىپ نەمەسە قوبالجىپ تۇرعانىڭىزدى بايقاساڭىز، وزىڭىزدەن سۇراڭىز – نەگە؟ قۇداي ءۇشىن، وزىڭىزگە ۇرىسپاڭىز، كوڭىلىڭىزگە ءتۇيىپ قويىڭىز. قانداي پىكىر نەمەسە وي ءسىزدى بۇلاي سەزىنۋگە ءماجبۇر ەتەدى. ونىڭ قايدان كەلگەنىن ءسىز بىلەسىز بە، جوق پا، وعان قاراماستان ونى ءسىز جوق قىلىپ جىبەرۋىڭىز كەرەك. تاعى دا ايناعا جاقىن كەلىپ، كوزىڭىزگە تەسىلە قاراپ، قولىڭىزبەن تاماعىڭىزدى ۇستاڭىز جانە 10 رەت: «مەن بارلىق قارسىلىقتاردان قۇتىلۋىم كەرەك» دەپ ايتىڭىز. اينامەن جۇمىس ىستەۋ جاقسى كومەكتەسەدى. ءوزىڭنىڭ كوزىڭە قاراپ ءوزىڭ تۋرالى جاقسى پىكىر ايتۋ – جاقسى ناتيجەلەرگە جەتۋدىڭ ەڭ جىلدام ءادىسى.
