اۋىر ناۋقاسقا شالدىققان قازاقستاندىق كىشكەنتاي بوگدان كورەيادا ەمدەلىپ جاتقان ەدى. الايدا قاتەرلى ىسىك بالادان مىقتى بولىپ شىقتى، 23 قىركۇيەك كۇنى بوگدان ماڭگىلىك ساپارعا اتتانىپ كەتتى. بالاسىنىڭ ەمىنە قوماقتى قارجى جيناپ جانتالاسىپ جۇرگەن اتا-انانىڭ ءۇمىتى ءۇزىلدى. انانىڭ جۇرەگىنە قانجارداي تيگەن اۋىر سوققى - بوگدان قايتىس بولسا دا، ەلىنە، ۇيىنە بالانىڭ مۇردەسىن قايتارا الماۋى. سەبەبى اتا-اناسى كورەياداعى اۋرۋحاناعا $98 000 قارىز ەكەن. قايعىسى مەن كۇيىنىشى ارالاسقان انا ۇلىنىڭ ءولى دەنەسىن اۋرۋحانادان شىعارىپ، قازاقستانعا قايتارۋ ءۇشىن وتانداستارىنان كومەك سۇرايدى.
«قىمباتتى دوستارىم، سىزدەرگە ۇلىنان، جۇرەگى مەن جانىنان ايىرىلعان انا رەتىندە جازىپ وتىرمىن. ايتارعا ءسوز تابا المايمىن... كوڭىلىمدى مۇڭ باستى، ويىم سان-ساققا ۇشىرادى، ءۇمىتىم دە قالمادى. بوگدان – مەنىڭ ءومىرىم، جانىم، ەرتەڭ اتپايتىن جارىق كۇنىم. ەندى ول ماعان «اناشىم، مەن سەنى جاقسى كورەمىن» دەپ ايتپايدى. ءوزىنىڭ كىشكەنتاي عانا ءالسىز قولدارىمەن مەنى قۇشاقتامايدى. ءتىپتى بالامنىڭ جانىنا بارىپ، ءسۇيىپ، ونى قۇشاعىما باسا الماي وتىرمىن. باسىنا بارىپ، جىلاي دا المايتىندايمىن. قۇدايىم-اي، بار ءۇمىتىم سولدى. ەندى پەرىشتەمنىڭ، بالاپانىمنىڭ دەنەسىن الىپ كەتۋ ءۇشىن ماتەريالدىق قارىزدى وتەۋىم كەرەك. جۇرەگىم قارس ايىرىلدى، الايدا «بالاپانىڭ ءۇشىن كۇرەس» دەپ تۋلاپ جاتىر. ول قۇددى ءبىر لومباردتاعى نەمەسە بانكتاعى كەپىل سەكىلدى. نەسىن ايتايىن، كىشكەنتاي ءومىر – قوماقتى اقشا. سول قوماقتى اقشا بالامدى ەمدەپ-جازۋ ءۇشىن كەرەك ەدى. ال ەندى بالامنان ايىرىلسام دا قوماقتى اقشاعا ءزارۋمىن. كلينيكا الدىنداعى قارىزىم $98 000 ەكەن. بالام و دۇنيەلىك بولسا دا مىنا اۋرۋحانا مەن مىنا ەلدەن كەتە الماي وتىر. بوگدان ءوز ۇيىنە، ويىنشىقتارىنا، اناسى مەن اكەسىنە ەركەلەيتىن باقىتتى مەكەنىنە بارعىسى كەلدى. الايدا تاعدىردىڭ جازۋى ما، قۇدايدىڭ قالاعانى ما، بالامنىڭ قالاعانى ورىندالمادى. دوستار، بالامنىڭ، ەندىگى پەرىشتەمنىڭ ارمانىن ورىنداۋعا سىزدەر كومەكتەسىڭىزدەرشى. بوگدانىمدى ۇيگە الىپ كەتەيىك. بالاپانىمنىڭ جانى، ەڭ قۇرىعاندا، كوكتە تىنىش بولسىن. بالاسىنان ايىرىلعان انا رەتىندە سۇراپ وتىرمىن، جۇرەگىمدى ۇيگە قايتارۋعا كومەكتەسىڭىزدەرشى. پەرىشتەلەر ولمەيدى، ولار قاشان دا بىزبەن بىرگە... وتىنەمىن، كومەكتەسىڭىزدەر!» - دەپ جان سىرىن اقتاردى اناسى.
سوڭعى دەرەكتەرگە سايكەس، قازاقستان ەلشىلىگىنىڭ كومەگىمەن قارجى سوماسى $90 000-عا ازايعان. ونىڭ $15 671-ى وتەلدى. قالعانى – $74 381. ال ەلشىلىك بالانى ەلگە قايتارۋ ءۇشىن كومەك كورسەتىەتىنىن جەتكىزىپتى. تولىق اقپاراتپەن INSTAGRAM جەلىسىندەگى @ svetlyachok_bogdan پاراقشاسى ارقىلى تانىسا الاسىزدار.
