كورشىلەس رەسەيدە اكە تۋعان بالاسىن قاتىگەزدىكپەن ۇرىپ ءولتىردى. بۇرىن اتا-انا بالالارىن الەمدە بولىپ جاتقان جاماندىق پەن قاتىگەز ادامداردان قورعاۋ ءۇشىن بارىن سالاتىن. ءقازىر كەرىسىنشە بالالاردى كەيبىر اتا-انادان جىراقتا ۇستاۋ كەرەك. سەبەبى اتا-اناسىمەن وتكىزگەن ءار ۋاقىت بالانىڭ ومىرىنە، دەنساۋلىعىنا ءقاۋىپ توندىرەدى. باۋىر ەتى بالاسىنا قول جۇمساۋ، مۇگەدەك ەتۋ، اۋىر جاراقات سالۋ، پسيحولوگيالىق، ەموسيونالدىق تۇرعىدا قىسىم كورسەتۋ بەلەڭ العان.

كەيدە اتا-انا بالاسىن تاربيەلىك ماندەگى ساباق بولسىن دەگەن نيەتپەن قول جۇمساپ سوڭى قايعىلى وقيعاعا ۇلاسىپ جاتادى. يركۋتسكىدەگى حاداحان اۋىلىندا بولعان جاعداي ءدال وسى سەناريي بويىنشا وربىگەن.

التى بالانىڭ اكەسى ءتورت جاستاعى بالاسى بۇتىنا جىبەرىپ قويعانىن مويىنداماعانى ءۇشىن جۇدىرىق جۇمساعان. بالا العان جاراقاتى سالدارىنان كوپ ۇزاماي كوز جۇمدى. سوت قاتىگەز اكەنى قاتاڭ رەجيمدەگى كولونياعا 13 جىلعا توعىتۋعا شەشىم شىعاردى.

«مەن ونى ۇرا باستادىم. بەلدىكپەن جانباسىنان 10 رەت، 4 رەت كەۋدەسىنەن، ودان كەيىن جۇدىرىقپەن 7،8 رەت، باسىنان، بەتىنەن شاپالاقپەن ۇردىم»، - دەيدى 28 جاستاعى ەر ادام.

قايعىلى وقيعا 24 ناۋرىزدا كەشكە حاداحان اۋىلىندا بولعان. بارلىعى بالانىڭ اناسى مەن 5 بالاسىنىڭ كوز الدىندا بولدى. ولار اشۋعا مىنگەن اكە مەن بالانىڭ اراسىنا اراشا تۇسۋگە تىرىسقانىمەن بۇل ارەكەتىنەن ەشتەڭە شىقپاعان. ەر ادام بالاسىن تاربيەلەۋگە بوگەت جاساماۋعا بۇيرىق بەرىپ، بالانى ۇرۋىن توقتاتپاعان.

قاتىگەز اكە 4 جاستاعى بالاسىن جىلى سۋ قۇيىلعان تەگەنەگە وتىرعىزىپ، ءوزى اپكەسىنىڭ تەلەديدارىن جوندەۋگە كەتىپ قالعان. قايتىپ كەلگەندە بالاسىنىڭ ءولى دەنەسىن كورەدى. ءتورت جاستاعى قوزعالماستان سول كۇيى جان تاپسىرعان. 

پسيحولوگتار بالاعا قول كوتەرۋ ارقىلى ونى تاربيەلەۋ قاتە ەكەنىن تالاي مارتە ايتىپ تا، جازىپ جاتىر. بالانى ۇرۋ ارقىلى ونى ءتۇرلى پسيحولوگيالىق، فيزيكالىق اۋرۋعا دۋشار ەتەتىنىن، ونىڭ كەلەشەكتە ادامدارمەن قارىم-قاتىناسىنا كەرى اسەرىن بەرەتىنىن  عىلىمي تۇردە دالەلدەسە دە، وزىنەن فيزيكالىق تۇرعىدا ءالسىز، جاۋاپ بەرۋگە قاۋقارى مەن كۇشى جەتپەيتىن بالاعا الىمجەتتىك جاساۋ توقتار ەمەس.

جاقىندا بۇكىل قازاقستاندى شۋلاتقان وسىعان ۇقساس جاعداي بولدى. بالاسىن «ءولسىن» دەپ اعاشتىڭ تۇبىنە تاستاپ كەتكەن اكەنىڭ ارەكەتى كوپتىڭ شىمبايىنا ءتيدى. بالاسىنىڭ باسىن تاسپەن جارىپ، وعان مەديسينالىق كومەك كورسەتۋدىڭ ورنىنا شىمىرىكپەستەن جۇمىستارىمەن كەتە بەرگەن.

بالانى مەيىرىم، ماحابباتقا بولەۋ، وعان قامقور بولىپ، بالانىڭ ءومىرىن، دەنساۋلىعىن كوزىنىڭ قاراشىعىنداي ساقتاۋ ءار اتا-انانىڭ باستى پارىزى. ناعىز ومىرگە دايىنداپ، ساپالى ءبىلىم مەن تاربيە بەرىپ، اياعىنان تىك تۇرعىزىپ ۇياسىنان ۇشىرۋ – اتا-انانىڭ تىكەلەي مىندەتى. الايدا كەيبىر اتا-انا «ءوزىمنىڭ بالام. نە ىستەسەم دە ءوزىم بىلەمىن» دەگەنگە سالىنىپ، بالانىڭ بولاشاعىنا بالتا شاۋىپ جاتادى. ونىڭ بالالىعىنا، بالالىق قاتەلىكتەرىنە، ومىرگە ەندى عانا ءتاي-تايلاپ اياق باسقان قادامىنداعى شالىنىسۋىنا، تاجىريبەسىزدىگىن كەشىرە الماي جاتادى. وسى رەتتە ساراپشىلاردىڭ، «ماحابباتقا بولەنىپ وسكەن بالادان مەيرىمدى، جاقسى ادام شىعادى» دەگەنى اتا-انالار جادىنان شىقپاسا ەكەن.