بالا كەزىمىزدە «ءبۇيتىپ» جىبەرۋ دەگەندى بۇزاقى بالالاردان ۇيرەنىپ، ۇيگە كەلگەندە قايتالاپ، اكەمىزدەن وڭباي شاپالاق جەگەنىم بار. ول اركىمنىڭ-اق باسىنان وتكەن شىعار... بىلمەيمىن، قازاق بالاسى ءۇشىن ەڭ ازعىن، ەڭ ۇياتسىز يشارات /جەست/ -وسى «ءبۇيتىپ جىبەرۋ». «اناۋ انانى ءبۇيتىپ جىبەرىپتى»، «بۇيتەم دەپتى»، «مەن سەنى ءبۇيتىپ جىبەرەمىن» دەپ الاقانىمەن جۇدىرىعىن ۇرعىلاعان ازعىندىق ەندى كينوعا جەتىپتى. 
ءوز باسىم ءانشىسى بار، ءانشى ەمەسى بار، جالپى ءوزىم تۇراتىن ەلدە تۇسىرىلگەن فيلمدەردى كورۋگە تىرىسامىن. ءوزىم ءۇشىن. كوڭىلىم تولماسا دا، كوركەمدىگى ونشا بولماسا دا... ول وتە قاجەت! بۇگىنگى كورەرمەن قانداي كينونى ۇناتادى، اقشاسىن قانداي تۋىندىدان ايامايدى دەگەندەي...وتكەندە ەركە ەسماحاننىڭ «ماحاببات كافەسىن» كورگەنمىن. كەرەمەت دەي المايمىن، ءبىراق ءبىر كورۋگە بولاتىن كينو. اكتەرلارى دا ءتاپ-تاۋىر. سيۋجەتى جاقسى، وقيعاسى جىلى. 
كەشە نۇرلان قويانبايەۆتىڭ ايگىلى «بيزنەس پو-كازاحسكييىنىڭ» ۇشىنشىسىنە باردىم. اشەيىندە ءۇش-تورت ادام شوقيىپ وتىراتىن زال لىق تولدى. كوپشىلىگى بالالارىن جەتەكتەگەن قازاقتار. سەناريي مۇلدەم جوق، بولسا سول كۆن-دا جىرتىڭداپ ايتىلعان ارزان ازىلدەردىڭ ءوڭىن اينالدىرا سالعان ۇزىندىلەرى. وقيعاسى ەشقانداي لوگيكاعا كەلمەيدى. كەلسە، ايدالادا تانىسقان نەگردىڭ سوزىنە الدانىپ ەكى قازاق سومكە ارقالاپ...ءيا، سومكە ارقالاپ افريكا اسىپ كەتەر مە ەدى؟ ديالوگتارىن تىڭداپ ،قور بولعان ءتىلدى ويلاپ ەڭىرەپ جىلاعىڭ كەلەدى. قۇرىسىنشى، وعان دا كوز كوندىك. بۇلارعا «ءتايت» دەيتىن ەشكىمنىڭ جوقتىعىنا كوز ۇيرەنگەن. مادەنيەت سالاسى باسشىلارىنىڭ ءوزى «ولار ءوز اقشاسىنا تۇسىرگەن، ەشتەڭە دەي المايمىز» دەپ وتىرسا. ەڭ سوراقىسى، الگى ەكى قازاق افريكادا سومكەلەرىن ارقالاپ، ءشاي ۇرلاپ جۇرگەندە بولدى. ولار قولعا تۇسەدى. قۇتقارىپ الۋعا قويانبايەۆتار كەلەدى. ەكى اراداعى كەلىسسوزدەر كەزىندە افريكالىق تايپانىڭ كوسەمى ءبىزدىڭ ىرجاقايعا «ءبۇيتىپ جىبەرەمىن» دەپ الاقانىمەن جۇدىرىعىن پەرىپ كەلىپ قالادى. ىرجاقاي شوشىپ كەتەدى/ءبۇيتىپ جىبەرگەندە بولار ەدى/. ابىروي بولعاندا الگى تايپانىڭ تىلىندە بۇل يشارات «سىيلاۋ، قۇرمەتتەۋ» دەگەندى بىلدىرەدى ەكەن. ەندى ىرجاقاي دا الاقانىمەن جۇدىرىعىن ۇرىپ، «ءبۇيتىپ جىبەرەمىندى» قايتالاپ جاتتى. زال تولى كۇلكى. اكە دە ءماز، انا دا ءماز، بالا دا ءماز...
...كينودان شىعىپ بارامىز. ءبىر كىشكەنتاي بالا «ءبۇيتىپ جىبەرەمىندى» قولىمەن قايتالاپ بارادى. اناسى باسىنان سىيپاپ، كۇلدى دە قويدى. ەسىمە اكەمنىڭ شاپالاعىنىڭ تۇسكەنى. بۇلارعا دا سونداي ءبىر شاپالاق كەرەك بولدى. وزدەرى عانا ەمەس، كورەرمەندى دە ازدىرىپ ءبىتتى! دەگراداسيا!

ارمان سقابىل ۇلى، Facebook-تەگى پاراقشاسىنان