ديماش قۇدايبەرگەنوۆ قىرعىزستاندىق BBC باعدارلاماسىنا سۇحبات بەردى دەپ جازادى Qamshy.kz اقپارات اگەنتتىگى. اتالمىش سۇحباتتا ديماش قۇدايبەرگەنوۆ لوندوندا وتكەن كونسەرت تۋرالى، ءوزىنىڭ شىعارماشىلىعىنا مەن تانىمالدىلىعىنا قاتىستى ءبىرقاتار سۇراقتارعا جاۋاپ بەردى. 

— قىتايدا وتكەن بايقاۋ ساحنادا بىرنەشە جىل ونەر كورسەتكەن 30-40 جاس ارالىعىنداعى تانىمال، كاسىبي انشىلەردىڭ قاتىسۋىمەن ءوتتى. العاشىندا بۇل بايقاۋدا مەنىڭ عانا اتاق-داڭقىم بولمادى. مەنى ەشكىم تانىمادى. "كىم؟ قايدان كەلدى؟" دەگەن سەكىلدى سۇراقتار ءجيى قويىلدى. شىنى كەرەك، بۇل بايقاۋعا مەنى تاجىريبە رەتىندە شاقىرعان بولاتىن. ۇيىمداستىرۋشىلاردىڭ ءبىرى مەنى بايقاپ قالىپ، ءوز ۇسىنىسىن ايتتى. بۇعان دەيىنگى مەن قاتىسقان بايقاۋلار "I am singer" جوباسىنا جول اشسا، قىتايداعى بايقاۋ قازىرگى تانىمالدىلىعىما وڭ اسەرىن تيگىزدى. ءبارى ءوز كەزەگىمەن، ءبىر جاراتۋشىنىڭ قالاۋىمەن بولدى، - دەيدى ديماش. 

سونداي-اق ديماش ءجۋرناليستىڭ "نە ءۇشىن ءوز تىڭدارماندارىڭدى "قىمباتتىلارىم" دەپ اتادىڭ؟" دەگەن سۇراعىنا دا جاۋاپ بەردى. 

— جانكۇيەرلەردىڭ ارتىسكە "جۇلدىز" دەگەن اتاق بەرەتىنى بار. مەنىڭ تىڭدارماندارىم دا مەنى جۇلدىز دەپ باعالاپ، قۇرمەتتەپ جاتادى. سول سەبەپتەن ولار مەن ءۇشىن قىمبات، جانىما جاقىن. جانكۇيەرلەرىم وتباسىمنىڭ ءبىر مۇشەسى بولعاندىقتان، مەن ءۇشىن قىمبات بولعاندىقتان ولاردى "قىمباتتىلارىم" دەپ اتايمىن. 

قىرعىز ءجۋرناليسى الەمدىك اتاقتى قالاي قابىلداعانىن سۇراعان كەزدە ديماش ومار حايامنىڭ ءسوزىن تىلگە تيەك ەتتى. 

— "باقىتتى ءارى باي ادامعا قىزىقپاڭىز. سەبەبى، اتقان تاڭنىڭ باتار ءساتى بولادى". بۇل - ومار حايامنىڭ ءسوزى. ءاربىر جاقسىلىق نەمەسە جاماندىق — وتكىنشى دۇنيە. مىسالى، ادامنىڭ رۋحاني قۇندىلىعى مەن ءۇشىن كاسىبيلىگىنەن جوعارى تۇرادى. سەبەبى ءبىز ومىرگە ادام بولۋ ءۇشىن كەلدىك. ءانشى، ءمۇعالىم، ءارتىس بولۋ ءۇشىن ەمەس. سول سەبەپتى ادامگەرشىلىك قاسيەتتى، رۋحاني قۇندىلىقتاردى ساقتاپ قالۋ - ءبىزدىڭ ەڭ باستى پارىزىمىز.  اتا-انام "ديماشقا دۇرىس تاربيە بەرمەگەن"، - دەگەن جامان اتقا قالماۋ ءۇشىن ءوز-وزىمدى بارىنشا جەرگە ءتۇسىرىپ، ەسەپ بەرىپ جۇرەمىن. "جۇلدىز اۋرۋى كەز كەلگەن انشىدە بولادى، ۋاقىت وتە كەلە باسىلادى" دەگەن پىكىر قالىپتاسقان. الايدا جۇلدىز اۋرۋى ەشقاشان باسىلمايدى. ەگەر ءانشى، ءارتىس ءوزىنىڭ شىعارماشىلىعىنا بەلگىلى ءبىر كاسىپ رەتىندە قارايتىن بولسا، ازداپ سابىرلىلىق تانىتسا، بارلىعى ءوز ورنىندا بولار ەدى. ارينە مەن ءوز تىڭدارماندارىما العىس ايتامىن. ءبىراق ولار كەي كەزدەرى تىم اسىرەلەپ، مەنى ءمىنسىز ادام رەتىندە كورەدى. دەسە دە مەنىڭ دە اشۋلاناتىن كەزدەرىم بولادى، مەنىڭ دە دوستارىممەن قىدىرىپ، كوڭىل كوتەرەتىن كەزدەرىم بولادى. جالپى ايتقاندا مەن قاراپايىم اداممىن.