ءبۇلدىرىپ جاتسا ءبىر بۇزىق.
قايتەمىز سونشا تۇنشىعىپ.
ديماشقا قارسى تاس اتۋ،
قازاقي قوڭىز تىرشىلىك.
قىتايدىڭ كوزىن سۋلاتقان.
اعىلشىن ەلىن دۋلاتقان.
ۇكىلەپ قوسقان ارعىماق،
ماسكەۋدىڭ ءتورىن شۋلاتقان.
كەتكەنىڭ قايتىپ كەلگەندەي.
ۇرپاققا ۇرپاق ەرگەندەي،
پاريجدە تۇرىپ امىرە،
تاعى دا داۋىسىن كەرگەندەي.
كوزىنىڭ اق پەن قاراسى.
كىمىڭ بار تاعى، ساناشى؟
دۇنيە ءجۇزى تاڭ قالعان،
كوشپەندى ەلدىڭ بالاسى.
ساناعا جاتىر جەتىپ ءۇن.
ءبىرى ەمەس ءانشى ەكىنىڭ.
ول جۇرگەن جولمەن ءجۇرىپ كور،
ديماشتىڭ كي دە ەتىگىن.
دومبىرا ونىڭ قاققانى.
قازاقى بەلبەۋ تاققانى.
قازاق بوپ شىققان ساحناعا،
ديماشتى داتتاۋ لاققانىڭ.
كۇنشىلدىك وسكەن سانادا.
كۇپىرلىك ەتكەن جاعا ما؟
تۇلپارىڭ وزسا جارىستا،
تاقياڭ قىسىپ بارا ما؟
ايتىلار تالاي اققا سىن.
جاقسىعا كۇيە جاقپاسىن.
تۇياعى ءبۇتىن تۇلپاردى،
ءتىل كوزدەن قۇداي ساقتاسىن.
وتەگەن نۇرماعامبەتوۆ
پىكىر قالدىرۋ