شەشەنستان رەسپۋبليكاسى ۇلتتىق ساياسات مينيسترلىگىنىڭ باسشىسى جانبولات ۋماروۆ كەشە ءسوز سويلەپ، «بۇزاقىلىق جاساعان ازاماتتار ەلدىڭ تەلەارناسى ارقىلى حالىقتان كەشىرىم سۇراۋ كەرەك» دەپ مالىمدەدى. ول ءۇشىن الداعى ۋاقىتتا تەلەارنادان ارنايى ايدار اشىلماق. ول قالاي اتالادى، ول جاعى ءالى اشىپ ايتىلعان جوق.

ال مۇنىڭ سەبەبى نەدە؟ جانبولات ۋماروۆتىڭ ايتۋىنا قاراعاندا، قازىرگى كەزەڭدە ينتەرنەت، الەۋمەتتىك جەلى ارقىلى جالعان مالىمەتتەر تاراتىپ، حالىقتى ابىگەرگە سالىپ جاتقاندار ازايماي وتىر. ءتىپتى وتكەندە كارىز قۇبىرلارى ارقىلى سۋدىڭ ۋلانعانى تۋرالى اقپارات تاراپ، حالىق ابىگەرگە ءتۇستى. شەشەنستاندا مۇنداي بۇزاقىلىق، الاياقتىق سيپاتتا جاسالىناتىن وقيعالار وتە كوپ. سوندىقتان دا مۇنىڭ الدىن الۋ كەرەك. حالىقتى ابىگەرگە سالاتىن مۇنداي بۇزاقىلاردى تابۋ قيىن ەمەس. جازاسىن الىپ، ايىپپۇلىن تولەر، ءبىراق الدىمەن ەلدىڭ الدىنا شىعىپ، كەشىرىم سۇراۋى ءتيىس. ارينە، بۇزىقتى ورتالىق الاڭعا اكەپ كەشىرىم سۇراتۋعا بولار، ءبىراق بۇل وركەنيەتتى جول ەمەس. سوندىقتان جالپى جۇرتقا زيان كەلتىرگەن وقيعا تۋرالى ەل حاباردار بولعانى ءجون. ول ءۇشىن ونى جاساعان ادام ءوزىنىڭ جاعىمسىز ىسىنە ۇيالىپ، كەشىرىم سۇراۋى ءتيىس. ال ونىڭ ەڭ دۇرىس جولى تەلەرنا ارقىلى حالىقتان كەشىرىم سۇراۋ، بۇدان بىلاي ونى جاساماۋعا ۋادە بەرۋ. سونداي-اق جالعان اقپارات تاراتقان ازاماتتىڭ سۋرەتى جاريالانىپ، ءتارتىپ بۇزۋشى گازەت وقىرماندارىنان دا كەشىرىم سۇرايدى.

الايدا شەشەنستان رەسپۋبليكاسى ۇلتتىق ساياسات مينيسترلىگىنىڭ باسشىسى جانبولات ۋماروۆ  «بۇل بۇزاقىلىق ارەكەتپەن كۇرەسۋدىڭ توتە جولى ەمەس، دەگەنمەن ءار ادام قوعامعا، حالىققا زيان كەلتىرىپ وتىرعانىن الدىمەن سەزىنىپ، وسىلاي ۇيالۋى ءتيىس» دەپ ەسەپتەيدى.

وسىدان ءبىراز ۋاقىت بۇرىن شەشەن پرەزيدەنتى رامزان قادىروۆ قوعامدىق كولىكتە ۇلكەن كىسىگە ورىن بەرمەي، ونى بالاعاتتاعان شەشەن جىگىتىن وزىنە شاقىرىپ الىپ، تەلەارنادان كەشىرىم سۇراتقانى بەلگىلى. ەندى مىنە اتالعان ءادىستى مينيسترلەر دە قولدانا باستادى.