ديماش قۇدايبەرگەنوۆتىڭ مەگاجۇلدىز اتانباي تۇرىپ، قىتايدىڭ ساحناسىنا شىققان كەزەڭدەرىندە كۇللى تەلەارنا مەن راديو، گازەت-جۋرنالدار ول تۋرالى جارىسا جازدى. سول كەزەڭدەگى قىتايلىق جۋرناليست فۋ ءليننىڭ راديودا جاساعان رەپورتاجى ءبىرقاتار بىزگە بەيمالىم دۇنيەلەردىڭ بەتىن اشتى دەپ حابارلايدى Qamshy.kz اقپارات اگەنتتىگى.

"مەنىڭ نەمەرەم ديماشتىڭ ولەڭدەرىن قايتالاپ تىڭداي بەرەدى. سوندىقتان، مەن بۇل انشىگە نازار اۋداردىم"، - دەپ باستادى ءسوزىن فۋ لين.

جۋرناليست ءانشىنىڭ ەرەكشە جەكە ءستيلىن قالىپتاستىرعانىن، داۋىس ىرعاعىمەن وتە كوپ جۇمىس جاسايتىنىن ايتا كەلىپ، ونىڭ جوعارى جانە تومەنگى نوتالارعا جىلدام اۋىساتىن قابىلەتىنە تاڭ قالعانىن جاسىرمادى.

"ول بەلكانتو ءتاسىلىن وتە ورىندى قولدانادى جانە بۇل ارەكەتى تىڭدارماننىڭ جۇرەگىنە جول تابۋعا كوپ كومەگىن بەرۋدە. ونىڭ باستى اۋىسۋ ادىستەرى دە كەرەمەت. سونداي-اق، ديماشتىڭ كلاسسيكالىق داۋىسى وتە تاماشا قويىلعان. ونىڭ ۆوكالدىق قاسيەتى ۆيتاسقا قاتتى ۇقسايدى. ءتىپتى، كەيبىر جەرلەردەگى ورىنداۋشىلىق قابىلەتى ودان دا اسىپ تۇسەدى"، - دەپ جالعادى فۋ لين.

سونىمەن قاتار، قىتايلىق جۋرناليست ءانشىنىڭ 1994 جىلى دۇنيەگە كەلگەنىن، جاسىنىڭ جيىرمادان ەندى اسقانىنا قاراماستان، مول تاجىريبەسىنە، تالاسسىز تالانتىنا باس يەتىنىن ايتۋدى ۇمىتپادى.

قازاق ءانشىنى شەگىنە جەتكىزە ماقتاعان جۇڭگو ءجۋرناليسى ءوز مۋزىكالارىنىڭ دا الەمدىك ستاندارتتارعا، عالام ساحناسىنا ساي بولۋى قاجەتتىگىن اتاپ ءوتتى.

"نەگە بىزدە الەمدىك دەڭگەيدەگى مەگاجۇلدىز جوق؟ ويتكەنى، ءبىز ولاردىڭ ءوسىپ شىعۋىنا ىقپال جاسامادىق. سونىمەن بىرگە، ءبىزدىڭ كەيبىر يدەيالارىمىز ءالى كۇنگە ارتتا قالىپ كەلەدى"، - دەپ اشىنعان پىكىر ءبىلدىردى ول.

فۋ لين ءوزىنىڭ ديماش تۋرالى پىكىرىن ەركىن جەتكىزە وتىرىپ، ونىڭ ءان ايتۋداعى ءۇش باستى ەرەكشەلىگىن اتادى. العاشقىسى – جوعارى جانە تومەنگى نوتالارعا اۋىسۋ قابىلەت. ەكىنشىسى – ۆوكالدىق تالانتى مەن داۋىستىڭ اشىلىپ-جابىلۋ تراكتتارىن باسقارۋى. ءۇشىنشىسى – دەمدى شىعارىپ-تارتۋداعى تاجىريبەلىلىگى.

"ونەر شەكارانى بىلمەيدى. ونەر ۇلتتى بىلمەيدى. سونداي-اق، ونەردى ءسۇيۋ ءۇشىن جاسىڭ دا ماڭىزدى ەمەس"، - دەدى فۋ لين.

فۋ لين مۋزىكاعا قۇرمەت كورسەتۋ قاجەتتىگىن، تالانت پەن ەڭبەكتىڭ ايىرماشىلىعى بار ەكەنىن ايتا كەلىپ، ديماشتان كوپ ءۇمتى كۇتەتىنىن جەتكىزىپ، ءسوزىن قورىتىندىلادى.

اۋدارعان: ادىلەت مادەنيەت