بەلگىلى ساتيريك مۇحتار شەرىم ءوزىنىڭ الەۋمەتتىك جەلىدەگى پاراقشاسىندا «الداراسپان» تەاترىنىڭ ديرەكتورى نۇرجان تولەندييەۆكە وكپەسى قارا قازانداي ەكەنىن ايتىپ، جازبا جاريالادى. ساتيريكتىڭ ايتۋىنشا، الداعى ۋاقىتتا ءارتىس الەۋمەتتىك جەلىدە كەشىرىم سۇراماسا، سوتقا شاعىمدانۋى مۇمكىن ەكەنىن ايتىپ، ەسكەرتۋ جاسادى دەپ حابارلايدى Qamshy.kz اقپارات اگەنتتىگى.

ءبىز مۇحتار شەرىمنىڭ جازباسىن وقىرمانعا قولايلى بولۋى ءۇشىن، تولىق بەرۋدى ءجون دەپ تاپتىق.

"الداراسپان" ءازىل-سىقاق تەاترىنىڭ جەتەكشىسى، ءارتىسى نۇرجان-تۋكا تولەندييەۆ ءىنىمدى جۇرتتىڭ ءبارى جاقسى كورەدى. مەن دە قۇرمەتتەيمىن. ونەرىن. تالانتىن. وسى ۋاقىتقا دەيىن ونىڭ تالانتىنا ماحابباتىم مازداپ تۇر ەدى، "الداراسپاندى" كورىپ وتىرىپ، وعان دەگەن ىستىق ىقىلاسىما بىرەۋ سۋ سەپكەندەي، الدەكىم مەنى ىڭق ەتكىزە تەپكەندەي، تاڭدايىمدا قۇرعاقشىلىق بولىپ، قاڭسىپ كەپكەندەي، سىلەيدىم دە قالدىم.

نەگە دەيسىزدەر عوي؟ "تۋكا" ءىنىمنىڭ ۇرى ەكەنىن كورىپ، كوزدەرىم الاقانداي، كوڭىلىم جورعالاپ بارا جاتقان تاراقانداي بولدى! ويپىرماي، بۇلار دا تاۋسىلادى ەكەن عوي! تاۋسىلعان سوڭ ۇرلىققا بارادى ەكەن عوي؟ ول مەنىڭ ۇيىمە ۇرلىققا تۇسكەن جوق، ول مەنىڭ شىعارمامدى، ساتيرامدى ۇرلاپ كەتتى! تال تۇستە!

الەۋمەتتىك جەلىلەردە جاريالانىپ كەتكەن "سيرياعا كەتتىم!" اتتى ساتيرامدى ۇرلاپ، مونولوگ جانرىندا ايتىپ شىقتى! كەيىپكەرىمنىڭ ايەلى "سيىرعا كەتتىم!" دەپ كۇيەۋىنە حات جازىپ كەتكىسى كەلەدى، ءبىراق ساۋاتسىزدىعىنان "سيرياعا كەتتىم!" دەپ جازىپ قويعان. وقيعا وسىلاي ءوربيدى. نۇرجان ءىنىمنىڭ ساتيرامدى ورىنداعانىنا ءماز بولار ەدىم-اۋ! ءبىراق ۇياتتان جۇرداي، اشەيىندە ساحنادا ۇلاعاتتى سوزدەر ايتۋعا كەلگەندە الدىنا جان سالمايتىن ءىنىم "سيرياعا كەتتىم" ساتيرامدى ورىنداعاندا، ەفيردە "اۆتورى نۇرجان تولەندييەۆ" دەپ بەردى. بۇل نە سوندا؟ توناۋ عوي؟ دەرەۋ وزىنە قوڭىراۋ شالدىم.

"ويباي، سىزدىكى مە ەدى؟ ماعان ۆاساپپەن كەلىپ ەدى... كەشىرىڭىز... تەليەۆيدەنيەگە ايتىپ، فاميلياڭىزدى قويدىرتامىن" دەپ اقتالىپ جاتتى ۇيالماستان. (بۇل داۋىسىن جازىپ الدىم.)

سوندا قالاي، ۆاساپپەن اۆتورسىز كەلگەن ازىلدەردى تولەندييەۆ مىرزا ءوزى جازعانداي يەلەنىپ كەتە بەرە مە؟ اۆتورلىق قۇقىعىمدى تالاپ ەتىپ، سوتقا شاعىمدانۋىم، مورالدىق شىعىن تالاپ ەتۋىم مۇمكىن. وزىمە شاق تەرىمە سىيماي، ءارى جاقسى كورەتىن ءىنىمدى ۇرى دەۋگە قيماي وتىرمىن... وسى باعدارلاماسىندا مەنىڭ تاعى ءبىر ساتيرامدى يەمدەنىپ كەتىپتى. سۋسيد تۋرالى جازعانمىن. يدەيامدى، وقيعانى ۇرلاعان. ونى دا دالەلدەي الامىن.

كەزىندە "شانشارعا" "ءۇبان" اتتى ءازىلىمدى ءوزىم بەرىپ، وسى نۇرجان تاماشا ورىنداپ شىققان ەدى. "الداراسپانعا" "ەۆرومولامدى" بەرىپ، ەرەكشە ورىنداپ، تاعى ءبىر قۋانتىپ ەدى. ەندى مىنە، ەڭسەم ەسىككە قىسىلىپ، ۇنجىرعام ۇن بولىپ وتىر! شىنىندا، "الداراسپان" كەيىنگى كەزدە الاسارىپ، الاق-جۇلاق ەتە باستادى، سويتسەم، تاۋسىلا باستاپتى عوي! ەگەر ماعان الەۋمەتتىك جەلىدە كەشىرىم سۇراماسا، اۆتورلىعىما نۇقسان كەلتىرمەسە، جاعدايى ۋشىعىپ تۇر "تۋكانىڭ"...