جاڭبىرلى كۇن. قولىمدا قولشاتىرىم جوق. بۇگىن ءتورت اداممەن كەزدەسۋىم قاجەت. جوسپار بويىنشا. ۇلدانا – ءبىرىنشىسى. كۇتىپ وتىرمىن، كۇتىپ وتىرمىن. ەسىك جاققا قاراپ قويامىن. ول كەشىكتى... بىردە كۇن سياقتى جارقىراعان ساپ-سارى سىرت كيىمىن شەشىپ، قاراما-قارسى بەتكە كەلىپ جايعاستى. جانارىنا قارايمىن. كىتاپ مۇقاباسىندا اعىل-تەگىل كوز جاسىنا ەرىك بەرىپ، بەتىندەگى بوياۋى اقسا دا كوزىنىڭ وتكىرلىگى تايماعان قىز ءدال ءقازىر كۇلىپ-جايناپ وتىر. ول – قوقىستان تابىلعان ميلليونەر قىز. ءاتى-جونى – ۇلدانا ەرقاسىم.

ول ءبىر قىزىق ادام. قاتال تاعدىر سىلكىلەپ، مىڭ سىناسا دا، تىنشىماعان. 17 جاسىندا ميلليونەر اتانىپ، 22 جاسىندا كىتاپ شىعارعان ءوزىنىڭ سوزىمەن ايتساق، «ۇلى دالانىڭ ساندالبايى» ۇلدانا ەرقاسىممەن حالۋا قوسىلعان كوفە ىشە وتىرىپ قۇرعان اڭگىمەمىزدى بولشەك-بولشەككە ءبولىپ وقىرمان نازارىنا ۇسىنامىز.

ول – ارداق ەمەس

ءار ادامنىڭ ومىرىندە ءبىر پەندەگە ايتۋعا باتىلى بارماعان سىرى بولادى. مۇنى ادەتتە شكافقا جاسىرعان سۇلدەمىز دەپ جاتامىز. ۇستىمىزدەگى جىلدىڭ 24 ساۋىرىندە تۇساۋى كەسىلگەن «قوقىستان تابىلعان ميلليونەر قىز» كىتابى موتيۆاسيا ىزدەگەندەرگە ارنالماعان ەكەن. «باتىلدىقتىڭ سيمۆولىنا ارنالسىن» دەگەن نيەتپەن جارىققا شىققان تۋىندى 23 جاسقا ەندى تولعان ارۋدىڭ 22 جىلعى ءومىرىنىڭ قىسقاشا بيوگرافياسى. تاعدىردان اسقان سيۋجەت جوق دەگەن سوزدەردى ۇران ەتكەن كىتاپتىڭ 150 بەتى قازاقشا، 150 بەتى ورىسشا جازىلعان. اعىلشىنشا نۇسقاسى دا پۋبليكاسياعا دايىن.

كىتاپتىڭ ءتىپتى ترەيلەرى بار. ساپاسى سىن كوتەرەتىن بەينە كادرلارىن كورە وتىرىپ دەنە تىتىركەنەدى. ۆيدەوسى وسىنداي سۇمدىق بولسا، كىتاپ بەتىنەن قانداي شىندىق وقيمىز دەگەن وي شىندىعىندا مازا بەرمەدى. #شىندىقتان قاشىپ قۇتىلمايسىڭ دەيدى جاستار جاستار جىلىندا... ول قانداي شىندىق؟! الماتىدا شالقىپ جۇرگەندە ول ۇلدانا بولسا، اۋىر-اۋىر زاتتار تاسىپ، تاۋار ساتقاندا ول ارداق.

ول – الاياق ەمەس

«بۇل كىتاپ قالاي دۇنيەگە كەلدى؟» دەگەن مەنىڭ سۇراعىما كۇلىپ وتىرىپ ۇلدانا ەرقاسىم بىلاي دەپ جاۋاپ قاتتى:

«كىتاپ نەگىزى وسى وقيعادان باستاۋ الادى. شەتەل كورگىسى كەلگەن قازاق قىزدارىن باستاپ، شارم-ال-شەيح قالاسىنا ۇشىپ كەلگەنبىز. بۇل جاڭا جىل قارساڭى بولاتىن. ءبارى ءساتتى باستالعانىمەن اياعى داۋ-دامايعا ۇلاستى. ءقوناقۇيدىڭ سۋى ءوشىپ قالعاندىعىنا ىزالانعان قىزدار مەنى بارىنە كىنالاي ءتۇستى. ءتىپتى ارىزدانىپ، سوتتاپ جىبەرگىلەرى كەلەتىندىكتەرىن جاسىرمادى. جاڭا جىلدىڭ تۇنىندە كوپ جىلادىم. «الاياق»، «ارامزا»، «جەزوكشە» دەگەن قاۋەسەتتەن شارشاعان مەن بار شىندىعىمدى ايتىپ، كىتاپ جازاتىن كۇن جەتكەنىن ءتۇسىندىم. ءتۇسىندىم دە، اللا تاعالاعا «سول كىتابىمدى جازىپ بەرەتىن رەداكتوردى جىبەرە قويشى» دەپ جالبارىندىم. قۇداي قابىل ەتتى.

ۇشاققا وتىرسام، جۋرناليست زارينا ءمۋسليمدى بايقاپ قالدىم. تەك قانا زارينا حانىم وسى كىتاپتى جازىپ شىعا الاتىنىنا سەنىمدى ەدىم. ءوزىمدى تانىمايتىن بوگدە جاننىڭ قاسىنا بارعىزىپ، «قاسىما وتىرىڭىزشى» دەپ كوندىرىپ، ءوز ومىرىمنەن سىر شەرتكىزۋگە بەل بۋدىم. ويلاعانىم ىسكە استى. زارينا مۋسليم قازاقستانعا تۇسكەن بويدا كەزدەسۋ بەلگىلەدى. 30 ساعاتتىق اڭگىمە ديكتوفونعا جازىلدى. 15 كۇن، 15 ءتۇننىڭ ىشىندە مەن ارمانداعان، ماعان ەركىندىك سىيلايتىن، وزگەلەر ءۇشىن باتىلدىق سيمۆولىنا اينالاتىن بولاشاق بەستسەللەر كىتابى دۇنيەگە كەلدى. مەنىمەن پسيحولوگ ايدا وتەمىسوۆا دا جۇمىس جاسادى. كىتاپ ديزاينى – اسلان تويلانيندىكى. بۇگىندە كىتاپ مەلوماندا ءوز وقىرمانىن كۇتىپ جارقىراپ تۇر. باعاسى – 5880 تەڭگە. نۋمەرولوگيا بويىنشا ەكى سەگىزدىك ساتتىلىك الىپ كەلەدى ەكەن. مۇنى سايكەستىك ەمەس، تاعدىر دەدىم».

ول – جۇك تاسۋشى

«ساۋدا جاساپ جۇرگەندە «ارداقپىن» دەپ وتىرىك ايتقان. وقۋعا گرانتقا تۇسپەگەندە «ءتۇستىم» دەي سالعان. 22 جاسىمدا باسپانالى بولىپ، اۆتوسالوننان تەمىر تۇلپار ساتىپ الىپ، گرۋپپالاستارىن تاڭ قالدىرعان. ولارعا دا وتىرىك ايتقان. «نەمەن شۇعىلداناسىڭ؟» دەگەن كۇدىككە تولى سۇراقتارىنا «ساندالبايمىن» دەپ قىسقا قايىرىپ وتىرعان. وقۋ وقىماي، كۇندىز-تۇنىن ماڭدايدان اققان تەردى سۇرتۋمەن وتكىزگەن قايسار قىز. ءتىپتى بۇگىن تۇندە كوز شىرىمىن الماعانىما قاراماستان سۇحباتقا الىپ-ۇشىپ كەلگەن ءبىر قىزىق ادام. ۇلدانانىڭ ءبىر اپتا بويى ۇيىقتاماي جۇمىس ىستەيتىن كەزدەرى ءجيى بولادى ەكەن. ءبىراق شارشامايتىن دەيدى... وتىرىكتەردەن عانا ابدەن مەزى بولعانىن اشىق ايتتى. «وسى سەن قاندايسىڭ؟»، «جوزەكشە ەمەسپىسىڭ؟»، «بىرەۋدىڭ اشىناسى سياقتىسىڭ» دەگەندەرگە كىتاپ ارقىلى اۋىزدارىنا قاقپاق بولۋدى ءجون ساناپتى. قانشاما جىلدار بويى ءبارىن ىشتەن تىندىرعان قىز بۇگىندە ازات.

ج: سونىمەن، ۇلدانا، العاشقى ميلليونعا قالاي قول جەتكىزدىڭىز؟

ۇ: ساۋدا جاسادىم.

ج: جۇك تاسۋشىمىن دەپ قالدىڭىز.

ۇ: ميلليوننىڭ تاۋارىن كوزگە ەلەستەتىڭىزشى. قانشاما قوراپ. ءبىر گازەلگە سىيعىزۋ، ونى كوتەرىپ، ەكىنشى نۇكتەگە جەتكىزىپ بەرۋ، ورنالاستىرۋ – قارا كۇشتى قاجەت ەتەتىن جۇمىس. قولىم كۇس-كۇس، كيىمىم كىر-كىر بولىپ ميلليون رەت وسىلاي جۇك تاسۋشى بولدىم. سىرت كوز مەنى ءتىپتى قىز دەپ ويلامايتىن شىعار. ءتۇرىم ادەتتە ادام شوشىرلىقتاي بولادى.

ج: بۇگىن ءسىز كىمسىز؟

ۇ: بۇگىن مەن اللانى اۋزىنان تاستامايتىن ازات اداممىن. Dream Trip كومپانياسىندا جۇمىس ىستەيمىن.

ج: ەرتەڭ كىم بولماقسىز؟

ۇ: ءۇش تىلدە جارىق كورىپ، وقىرماننىڭ جۇرەگىن جاۋلاعان بەستسەللەر كىتاپ «قوقىستان تابىلعان ميلليونەر قىزدىڭ» اۆتورى بولماقشىمىن. كىتابىم بويىنشا تۇسىرىلگەن كينونى ۇلكەن ەكراننان تاماشالاپ وتىراتىن باقىتتى جان بولماقشىمىن. جارتى جۇرەگىن تاۋىپ، ۇل-قىزدى دۇنيەگە اكەلىپ، باي-قۋاتتى ءومىر كەشەتىن ارۋ انا بولماقشىمىن.

ونىڭ سپونسورى – اللا تاعالا

«مەلوماندا" كىتابىڭنىڭ تۇرۋى ماقتانىش سەزىمىن تۋدىرادى ەكەن. سەبەبى قازاقشا جازىلعان كىتاپتارعا ارنالعان نەبارى 7-اق سورە بار. سولاردىڭ اراسىندا ەندى 22 جاستاعى قىزدىڭ قولجازباسى دا تۇر. «بۇل كىتاپتىڭ سپونسورى كىم؟» دەگەن سۇراق تۋىنداپ جاتىر. مەن بارىنە «مەنىڭ سپونسورىم – اللا تاعالا» دەپ جاۋاپ بەرەمىن. ءسىز مەنى قيالي دەپ ويلاپ قالۋىڭىز عاجاپ ەمەس. ءبىراق بۇل شىندىق. كىتاپتى وقي وتىرىپ، وعان كوزىڭىز جەتەدى. سەبەبى مەنىڭ ۇنەمى جانىمنان تابىلاتىن جالعىز دوسىم بار، ول – اللا تاعالا.

قيىندىقتا جانىمنان تابىلىپ، دەمەۋ كورسەتكەن قۇربىم بولعان ەمەس. ساتسىزدىكپەن، اۋرۋ-قايعىمەن، اشۋ-نالامەن دە جاراتقانعا جالبارىنا وتىرىپ كۇرەستىم. وسى كىتاپتىڭ جازىلۋ بارىسىندا سۋيسيد جايلى وي دا كەلدى. مۇنى دا ءبىر سىناق دەپ ءبىلدىم. ءوز-وزىمدى ارەڭ جەڭدىم. مۇنداي جاعداي ومىرىمدە ءبىرىنشى رەت بولدى. قانشا قيىندىق كورسەم دە مويىماعان مەن «تومەنگە قۇلدىراي سالسام» دەگەن ويمەن الىستىم. «ۇلدانا، ەسىڭدى جي!» دەپ وز-وزىمە ايتا بەردىم. ويىمدى اۋزىمداعى ءسوزىم جەڭدى. مەن جالپى ءسوزدىڭ كۇش-قۇدىرەتىن مويىنداعان جانمىن. سوندىقتان دا قانداي جاعدايعا قاراماستان «ءبارى جاقسى بولادى»، «قايىرلىسى بولادى» دەپ ىشتەي كۇبىرلەپ ايتىپ وتىرۋدى ادەتكە اينالدىرعانمىن.

اللا تاعالا ەكەۋمىزدىڭ ارامىزدا نازىك ءبىر بايلانىس بار. كىشكەنتاي كەزىمنەن باستاپ جاتىپ الىپ جاراتقاننان جاقىندارىما اماندىق، بايلىق، جاقسىلىق تىلەيتىنمىن. ءتىپتى الىستاعى مەن كورمەگەن بىرەۋدىڭ جاقىنىن دا دۇعاما قوساتىنمىن.

كۇلىپ وتىرىپ جىلاپ، جىلاپ وتىرىپ كۇلە سالاتىن ادەتىم بار. ءتىپتى كىتاپتىڭ مۇقاباسىندا جىلاپ وتىرمىن. نەگە؟ ءوز فوتوسەسسياما كەشىكتىم. جوسپارىمنىڭ كۇل-تالقانى شىقتى. ءۆيزاجيستىم كەتىپ قالدى. سوندىقتان ەرىكسىز جىلادىم. مۇقاباداعى فوتو قانداي شىنايى بولسا، كىتاپ تا سونداي».

ول – موتيۆاتور دا ەمەس

كىشكەنتاي كەزىندە تۇتىعىپ سويلەيتىن قىز ءقازىر مەنىڭ الدىمدا كوسىلىپ، شەشەن سويلەپ وتىر. ونىڭ بۇل اۋرۋدان ايىعۋىنا سەبەپكەر بولعان ادەبيەتتەن ساباق بەرگەن ۇستازى باعدات سىرىم قىزى ەكەن. مانەرلەپ وقۋ بايقاۋىندا جەڭىسكە جەتۋىڭ كەرەك دەگەن ۇستازى وسىلايشا ۇلدانانىڭ تاعدىرىن وزگەرتكەن. ومىرىندە بىردە-بىر سەمينار، ترەنينگكە باس سۇعىپ كورمەگەن ميلليونەر قىز بۇل كىتابى ارقىلى وتىرىك بەت-پەردەمىزدى شەشىپ، شىنايى بەت-جۇزىمىزدى كورسەتۋىمىزگە شاقىرىپ وتىر. #شىندىقتان قاشىپ قۇتىلا المايسىڭ دەگەن جازۋ ءۇشىن 15 تاۋلىككە قامالعان جاستاردى كورە وتىرىپ، بەتىمىز بۇلك ەتپەگەن ءبىز كىتاپتى وقي وتىرىپ ءوزىمىزدى تاني الامىز با، ۇلكەن سۇراق. قالاي دەگەنمەن، جاستاردىڭ الدەنەگە ۇمتىلۋى، الدەنەنى اڭساۋى وزگەرىستەردىڭ باستالعانىن بىلدىرسە كەرەك. قوقىستان تابىلعان ميلليونەر قىزدىڭ شىنىاياقتاعى كوفەسى تاۋسىلدى. مەنىڭ كوفەسىز وتىرعانىم قاي زامان...

(جالعاسى بار)

سۇحباتتاسقان جازيرا بايدالى