بولاشاق بالاڭىزدىڭ جالاقىسى كوپ بولعانىن قالايسىز با؟ وندا ءسىز مىندەتتى تۇردە جەتى سانى بار كۇنى بوسانۋىڭىز كەرەك! بۇگىندە باقسى-بالگەردىڭ ورنىن الماستىرعان نۋمەرولوگ ماماندارى جاس كەلىنشەكتەرگە وسىنداي كەڭەستەر بەرىپ الەك. ال استرولوگتار جۇلدىزداردىڭ ورنالاسۋىنا قاراي ءسابيىڭىزدىڭ نەگە قىزىعىپ، قانداي سالادا جۇمىس ىستەيتىنىنە دەيىن ايتىپ بەرەمىز دەپ سەندىرۋدە. بۇل قانشالىقتى راس؟ الدە ىرىمعا سەنگىش قازاقتى الداۋدىڭ كەزەكتى ءبىر ءتاسىلى مە؟ بۇعان قاتىستى شاريعات نە دەيدى؟ بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنىڭ دەرەگىن نەگىزگە الىپ حابارلايدى.

بۇگىندە نۋمەرولوگ پەن استرولوگتار قۇددى ءبىر باقسى-بالگەردىڭ ورنىن الماستىرعانداي. كوكەيىندە جۇرگەن كەز-كەلگەن سۇراقتىڭ جاۋابىن تابۋ ءۇشىن حالىق سولارعا جۇگىنەتىن بولعان. ءتىپتى، بالانى قاي كۇنى، ساعات نەشەدە بوسانۋ كەرەكتىگىنە دەيىن ايتىپ بەرەدى. ءبىر قىزىعى، ولاردىڭ كەڭەسىنە قۇلاق اسىپ، بۇلجىتپاي ورىندايتىندار جىل ساناپ كوبەيىپ بارادى ەكەن.

"مەنىڭ كەسەروۆاعا بارا جاتقاندىقتان، اي كۇن، ءساتتى دەپ مەنەن اياعى اۋىر ايەلدەر سۇراپ جاتادى. ال مەن سىزگە قانداي ساندار ماڭىزدى، بالانىڭ دەنساۋلىعىنىڭ مىقتى بولعاندىعى ما نەمەسە باي بولعانى ما، قابىلەتتى بولعانى ما، سودان كەيىن سوعان ارناپ، كۇن تاڭدايمىز. سولاي تۋىپ جاتادى. ويتكەنى، ءساتتى ساندار بولادى. جولى بولعىش، 7-8 سانى. مۇنداي ادامعا كەز-كەلگەن ەسىك اشىق. كوبىنە اتا-انالار سوندايدى تاڭدايدى"،- دەيدى نۋمەرولوگ قۇرالاي باقىت قىزى

"بالا سپورتقا جاقىن بولسىن دەسەڭىز 4ء-ى كۇنى، ساۋساعىنان بال تامعان ونەر يەسى بولعانىن قالاساڭىز 7ء-سى كۇنى بوسانعانىڭىز ءجون" دەيدى نۋمەرولوگتار. ەسىمىن كىم دەپ قويامىن دەپ باسىڭىز قاتىپ جاتسا، وعان دا قام جەمەڭىز. ودان بولەك، ءمۇعالىم، دارىگەر، ءتىپتى پرەزيدەنت بولا ما، ونى دا ەسەپتەپ، ايتامىز دەپ سەندىرىپ وتىر. بولماسا، كومەككە استرولوگتار كەلۋگە دايىن.

"بالانىڭ بولاشاقتا قانداي بولاتىنىن انىقتاۋ ءۇشىن ءبىز مارس جۇلدىزىن الىپ قاراستىرامىز. ول ءبىزدىڭ بارلىق قىزىعۋشىلىعىمىزعا جاۋاپ بەرەدى. ماسەلەن،  ەگەر  ءسىز تۋعاندا، مارس پلانەتاسى  وتتى زودياك بەلگىلەرىنە سايكەس كەلىپ تۇرسا، وندا ءسىز سپورتقا جاقىن بولاسىز دەگەن ءسوز، زودياك بەلگىڭىز سۋلى بولسا، ونەرگە، ال جەردەگى بەلگىدە تۋىلساڭىز، دەمەك  عىلىم مەن بىلىمگە قىزىعاسىز. كەيىن بولاشاقتا بالاسىنا ۇيىرمە تاڭداعاندا قاتەلىك جاساپ، وكىنىپ قالماۋ ءۇشىن اتا-انالار ماعان كەلىپ، استرولوگيالىق كارتا جاسايدى. ال مەن ولارعا دۇرىس باعىت-باعدار بەرۋگە تىرىسامىن"، - دەيدى ارمان شتاتپايەۆ اتتى استرولوگ.

قازاق بۇرىننان ىرىمشىل حالىق قوي. جىلدار بويى بالا كوتەرە الماي قالعاندار ءتۇرلى ايلا-تاسىلدەرگە باراتىن ەدى. جاس انادان بالاسىنىڭ جورگەگىن سۇرايدى، كوپبالالى انانىڭ ءىش كيىمىن ۇرلايدى، تاعىسىن تاعى. ءبىراق، كوپ كەلىنشەك زاماناۋي جولداردى قۇپتامايتىن بولىپ شىقتى. ونى انالار اراسىندا ساۋالناما جۇرگىزۋ ارقىلى بىلدىك.

كىشىگىرىم ساۋالناما جاساعان كەزدىڭ وزىندە  قىز-كەلىنشەكتەردىڭ دەنى بۇل ماسەلەدە ءدىندى العا تارتىپ وتىر. "ءبارى ادامنىڭ ەمەس، اللانىڭ قالاۋىمەن بولادى" دەيدى. ال بۇعان قاتىستى شاريعات نە دەيدى؟

"كەز-كەلگەن قۇدايدىڭ كۇنى ول ءساتتى كۇن بولىپ سانالادى. دەگەنمەن  ءدىننىڭ ىشىندە دە جۇلدىزناماعا بايلانىستى،الەمنىڭ ۇيلەسىمىنە، گارمونياسىنا بايلانىستى  ءبىر ساندار بار.  ياعني، جىلدىڭ ۋاقىتتارىندا نەمەسە اپتانىڭ كۇندەرىندە ءبىر ساتتىلىك دەگەن دۇنيەلەر بار. مىسالى بەيسەنبى كۇنى تۋعان  بالالار زەرەك بولادى.    جۇما كۇنى تۋعاندار ءدىندار بولادى نەمەسە سەنبى كۇنى تۋعان بالالار كىشكەنە جالقاۋلاۋ بولادى دەگەن كوزقاراستار بۇرىندا دا بولعان"، - دەپ پىكىر ءبىلدىردى ءدىنتانۋشى كەڭشىلىك تىشقان.

وسىلايشا، ءبىز تىلدەسكەن مامانداردىڭ ويى قاق جارىلدى. ءبىرى بالانى سانداردىڭ قۇدىرەتىنە سۇيەنىپ، جوسپارلاپ بوسانعان ءجون دەيدى. وزگەسى بۇعان ۇزىلدى-كەسىلدى قارسى. ال دۇنيە ەسىگىن ءالى اشپاعان بالانىڭ تاعدىرىن ارنايى مامانداردىڭ كومەگىنە سۇيەنىپ،  شەشىپ جۇرگەن اتا-انالاردىڭ ىس-ارەكەتى قانشالىقتى قيسىندى، ول جايلى بايلامدى پاتشا كوڭىلدى كورەرمەننىڭ وزىنە قالدىردىق!

ۇسىنعان: اسەل بولات قىزى