مەملەكەت باسشىسى قاسىم-جومارت توقايەۆ قازاقستان مۇسىلماندارىن ورازا ايت مەرەكەسىمەن قۇتتىقتادى دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.
پرەزيدەنت ءوز قۇتتىقتاۋىندا ادامگەرشىلىككە، مەيىرىم مەن قايىرىمدىلىققا ۇندەيتىن قاسيەتتى رامازان ايىنىڭ اياقتالۋى كۇللى مۇسىلمان ۇمبەتى ءۇشىن ماڭىزدى مەرەكە ەكەنىن اتاپ ءوتتى.
"ورازا ايت كۇندەرى ءار مۇسىلمان تۋعان-تۋىستارى مەن باۋىرلارىنا قامقورلىق كورسەتىپ، مۇقتاج جاندارعا قول ۇشىن سوزىپ، ءوزىنىڭ رۋحاني دامۋىنا زور ءمان بەرەدى. ىزگى ويلار مەن يگى ىستەر ءوزارا تۇسىنىستىك پەن كەلىسىمگە باستايدى، ادامداردى ورتاق ماقسات-مۇددەگە جەتەلەيدى"، - دەدى توقايەۆ.
ونىڭ پىكىرىنشە، قازاقستان – بەيبىت ءومىر مەن جاسامپازدىقتىڭ مەكەنى. وزگە ءدىني سەنىمدەرگە قۇرمەت، تولەرانتتىلىق پەن ادامگەرشىلىك قۇندىلىقتار – حالقىمىزعا ءتان يگى قاسيەتتەر.
"يسلام ءىلىمى وتانعا دەگەن سۇيىسپەنشىلىك پەن ۇلتتىق داستۇرگە بەرىك قوعامىمىزدىڭ رۋحاني جاڭعىرۋ يدەياسىنا تولىق ساي كەلەدى. ەلىمىز امان، جۇرتىمىز تىنىش بولسىن! ءار شاڭىراققا باق-بەرەكە تىلەيمىن! ورازا ايت قۇتتى بولسىن!"، - دەپ تۇيىندەدى مەملەكەت باسشىسى.
پىكىر قالدىرۋ