زاڭناماعا ەەو ەلدەرىنەن قازاقستانعا كىرگىزىلگەن اۆتوكولىكتەردىڭ تىركەلۋىن مىندەتتەيتىن وزگەرىستەر ەنگىزۋ جوسپارلانۋدا. ولار قابىلدانعان جاعدايدا شەتەلدىك نومىردەگى كولىكتەر قاتاڭ باقىلاۋعا الىنادى دەپ حابارلايدى Qamshy.kz اقپارات اگەنتتىگى كولوسا سايتىنا سىلتەمە جاساپ.
ەۋرازيالىق وداققا مۇشە ەلدەردەن كەلگەن اۆتوكولىكتەردىڭ ءبىزدىڭ ەلگە ەركىن كىرە باستاعانىنا بىر-ەكى جىل بولدى. ءبىراق وسى از عانا ۋاقىت ىشىندە تۋىنداعان ماسەلە جەتەرلىك. تاجىريبە كورسەتكەندەي، ءبىزدىڭ ەلدە جۇرگەن وزگە مەملەكەتتە تىركەلگەن كولىكتەر نەگىزىنەن ارمەنيالىق، رەسەيلىك جانە قىرعىز كولىكتەرى. بۇگىندە ولاردىڭ ءبىرازىن وتانداستارىمىز تىزگىندەپ ءجۇر. ولاردىڭ ىشىندە جول ەرەجەسىن ەلەمەيتىندەر مەن اپاتقا تۇسكەندەرى قانشاما. ال ەڭ باستىسى — اتالعان كولىكتەر قىلمىس الەمىندە كەڭىنەن قولدانىلادى ەكەن.
ق ر پارلامەنت ءماجىلىسىنىڭ دەپۋتاتى پاۆەل كازانسيەۆتىڭ ايتۋىنشا، وسى جىلدىڭ كوكتەمىندە قازاقستاننىڭ كولىك تۋرالى زاڭناماسىنا ەلگە كىرگىزىلەتىن اۆتوكولىكتەردىڭ مىندەتتى تۇردە تىركەۋدەن ءوتۋىن مىندەتتەيتىن تۇزەتۋلەر ەنگىزۋ جوسپارلانعان. الايدا جۇمىس توبىنىڭ مۇشەلەرى بۇل مەرزىمىنەن بۇرىنعى وزگەرىستەر دەگەن شەشىمگە كەلىپتى. سول سەبەپتى تۇزەتۋلەر ەنگىزۋ كەيىنگە قالدىرىلدى جانە قازىرگى تاڭدا ولاردى ق ر ييدم جانە ءىىم سىندى ءبىرقاتار مينيسترلىكتەر مەن مەملەكەتتىك مەكەمەلەر ەگجەي-تەگجەيلى پىسىقتاۋدا. زاڭناماعا وزگەرىستەر ەنگىزبەس بۇرىن قازاقستان شەكاراسىنا كىرەتىن بارلىق اۆتوكولىكتەردى ناقتى بەلگىلەپ، ەەو ەلدەرىندەگى كولىك قۇرالدارى بويىنشا دەرەكتەر بازاسىن سايكەستەندىرۋ سىندى باستى ماسەلەلەردى شەشىپ الۋ قاجەت.
تۇزەتۋ بويىنشا جۇمىستاردى ءماجىلىس دەپۋتاتتارى وسى جىلدىڭ قىركۇيەگىندە قولعا الادى دەگەن بولجام بار.
ۇسىنعان: بەك بايتاس
پىكىر قالدىرۋ