بيىل مەملەكەت وڭىرلەردى دامىتۋعا 323،7 ملرد تەڭگە ءبولىپ وتىر. بۇل تۋرالى ۇلتتىق ەكونوميكا مينيسترلىگىندە ايتىلدى دەپ حابارلايدى Qamshy.kz اقپارات اگەنتتىگى LS سايتىنا سىلتەمە جاساپ.

ونىڭ ىشىندە 250،2 ملرد تەڭگە رەسپۋبليكالىق بيۋدجەتتەن قاراستىرىلعان. 60،3 ملرد تەڭگەسى جەرگىلىكتى بيۋدجەتتەن. ال قالعان 13،2 ملرد تەڭگە قاراجات كاسىپورىنداردان تارتىلماق.

ۇلتتىق ەكونوميكا مينيسترلىگىندە اتالعان قاراجاتتىڭ ءتۇرلى باعىتتار بويىنشا يگەرىلەتىنى اتالدى.

بيىلعى بولىنگەلى تۇرعان اقشانىڭ باسىم بولىگى اۋىلدىق ايماقتار مەن كەنت، كىشى قالالارداعى سۋ جۇيەسىن، اۋىز سۋمەن قامتاماسىز ەتۋ ماسەلەلەرىن شەشۋگە باعىتتالىپ وتىر. ناقتى ايتساق، بۇل باعىتقا 141،2 ملرد تەڭگە جۇمسالماقشى.

سونداي-اق، وبلىس ورتالىعىنا اينالعان تۇركىستان قالاسىندا قىزمەتتىك تۇرعىن جايلار مەن اكىمشىلىك عيماراتتاردى سالۋ ءۇشىن 16 ملرد تەڭگە قاراجات ءبولىپ وتىر.

ارنايى جوبالار دا وڭىرلەردى دامىتۋعا باعىتتالعان قاراجاتتان تىسقارى قالمادى. "ديپلوممەن اۋىلعا" جوباسىن ءارى قاراي دامىتۋ ءۇشىن اتالعان جالپى سومانىڭ 14،8 ملرد تەڭگەسى قاراستىرىلدى. ال "اۋىل – ەل بەسىگى" ارنايى جوباسىنىڭ جوسپارلارىن جۇزەگە اسىرۋ ءۇشىن 30 ملرد تەڭگە قارجى جۇمسالماق.

ايتا كەتۋ كەرەك، ۇلتتىق ەكونوميكا مينيسترلىگىنىڭ جوبالاردى جۇزەگە اسىرۋ باعىتىنا قوماقتى قاراجات ءبولۋ ناۋقانى 2015 جىلدان باستالعان. اياقتالۋ مەرزىمى 2020 جىلعا جوسپارلانعان. 2015-2018 جىلدار ارالىعىندا 1،426 ترلن تەڭگە قاراجات ءبولىندى. بۇل كولەمنىڭ 99،1 پايىزى، ياعني، 1،413 ترلن تەڭگەسى يگەرىلىپتى-مىس.

اتاپ ايتار بولساق، 1،426 ترلن تەڭگەنىڭ 529،4 ملرد تەڭگەسى رەسپۋبليكالىق بيۋدجەتتەن، 588،4 ملرد تەڭگەسى ۇلتتىق قوردان، 230،5 ملرد تەڭگەسى جەرگىلىكتى بيۋدجەتتەن، 78،5 ملرد تەڭگەسى كاسىپورىنداردان الىنعان.