قازاقستاندا بەكىرە تۇقىمداس بالىقتار ءۇشىن گەنەتيكالىق پاسپورتتار جاساقتالىپ جاتىر. بۇنداي جۇمىستار بىرنەشە جىل جۇرگىزىلۋدە. نەگىزگى ماقساتى: بەكىرە تۇقىمداستاردىڭ ميگراسيالىق جولدارىن زەرتتەۋ، سونداي-اق، تابيعي جانە جاساندى پوپۋلياسيا دەڭگەيىن انىقتاۋ.

- ءاربىر ۇستالعان تۇقىم بەرۋشى بالىققا جانە جاس بالىققا ماماندار گەنەتيكالىق پاسپورت جاسايدى. سونىڭ ارقاسىندا كەيىنىرەك، بالىقتىڭ قايدان كەلگەنىن، «اتا-اناسى» كىم ەكەنىن، قاي زاۋىتتان شىققانىن نەمەسە تابيعي جولمەن پايدا بولعانىن انىقتاي الامىز. ءسويتىپ، ءاربىر ەلدىڭ، ءاربىر زاۋىتتىڭ بەكىرە تۇقىمداستاردى قالپىنا كەلتىرۋ ۇدەرىسىنە قوسقان ۇلەسى دە بەلگىلى بولادى،-دەيدى «بالىق شارۋاشىلىعىنىڭ عىلىمي-وندىرىستىك ورتالىعى» ءجشس-نىڭ اتىراۋ فيليالىنىڭ ديرەكتورى ەربولات قاديموۆ.
​ە.قاديموۆتىڭ ايتۋىنشا، شاباقتاردىڭ ومىرشەڭدىگى تۋرالى ناقتى اقپاراتتىڭ بولماۋى – بەكىرە زاۋىتتارى بار كاسپيي ماڭى مەملەكەتتەرى ءۇشىن ورتاق پروبلەما. ءقازىر سىنالىپ جاتقان گەندىك – مولەكۋليارلىق تالداۋ ادىستەمەسى بولاشاقتا جاساندى جانە تابيعي پوپۋلياسيا اراسىنداعى ايىرماشىلىقتى اجىراتىپ الۋعا مۇمكىندىك بەرەدى.
​جەرگىلىكتى ەكى بەكىرە زاۋىتى 20 جىلدا بەكىرە، قورتپا، ششوقىر سياقتى بالىقتاردىڭ ءجۇز ميلليوننان استام شاباعىن تەڭىزگە جىبەرگەن ەكەن. ەگەر، قورتپا 17-18 جاستا جىنىستىق تۇرعىدان ەرەسەك بالىققا اينالاتىنىن ەسكەرسەك، كەزىندەگى شاباقتاردىڭ ءقازىر ۋىلدىرىق شاشۋعا شىعۋى ابدەن مۇمكىن.