ەلىمىزدە كەشەگى وتكەن پرەزيدەنتتىك سايلاۋ جوعارى دەڭگەيدە، اشىق ءارى ءادىل ءوتتى دەپ ايتا الامىن. حالىق ەرىكتى تۇردە ءوز تاڭداۋىن جاساپ، داۋىس بەرۋ ۋچاسكەلەرىنە لەك-لەگىمەن كەلىپ جاتتى. ءتىپتى، سايلاۋ الدى ناۋقاننىڭ، دايىندىقتىڭ جۇيەلى ۇيىمداستىرىلۋى، بۇل جولعى سايلاۋدىڭ تالاستى، تارتىستى وتۋىنە جول اشقان سەكىلدى.

ولاي دەيتىنىم، مەن ءوزىم رەسپۋبليكالىق شتاب مۇشەلەرىنىڭ قاتارىندا بولدىم. جامبىل وبىلىسىنا بارىپ، شارۋاشىلىقتاعى ارىپتەستەرىممەن، اۋىل حالقىمەن جولىعىپ، پىكىرلەرىن ءبىلدىم. قانشا ادام بولعان جەردە سونشا پىكىر بولاتىندىعى ايدان انىق. مەن اۋەل باستان-اق ەلىمىزدىڭ دامۋىنا ەلەۋلى ۇلەس قوسىپ كەلە جاتقان، ءوز ءىسىنىڭ مامانى، ديپلومات قاسىم-جومارت كەمەلۇلىن تاڭداعان اداممىن. حالىقتىڭ ءبىر بولىگى وزگە ۇمىتكەرلەرگە داۋىس بەرەمىز دەپ جاتتى. سوندا، جاڭاعى ءوزىم جولىققان حالىقتىڭ باسىم كوپشىلىگى «بۇل قالاي بولعانى، ەل باسقارۋعا، سوعان لايىقتى، تاجىريبەلى ادام كەلۋى كەرەك ەمەس پە؟! ەرتەڭ ءبىز وتباسىمىزبەن بارىپ داۋىس بەرمەسەك، باسقا كانديداتتار العا شىعىپ كەتۋى مۇمكىن، ءبىز تۇگەل سايلاۋعا قاتىسامىز دەسىپ جاتتى».

ال كەشە، سايلاۋمەن قاتار ەلوردادا قازاق كۇرەسىنەن وتكەن «قازاقستان بارىسىن» ۇيىمداستىردىق. سول جەردە قاسىم-جومارت كەمەلۇلىنا جولىعۋدىڭ دا ءساتى ءتۇستى. ءسوز اراسىندا ول كىسى ماعان «ءاي، جاكە! قازاق سپورتشىلارى بوكستان الەمدىك ارەنادا ونەرىن كورسەتىپ، تانىمال بولىپ جاتىر، ەلىمىزدى دە تانىستىرىپ ءجۇر. ال، كۇرەس نەگە ونداي دارەجەدە ەمەس؟ الدە سپورت سالاسىنا كورسەتىلەتىن قولداۋ شارالارىن كۇشەيتۋ قاجەت پە؟ ءبىز ءبىرجاقتى ەمەس، جان-جاقتى دامۋىمىز كەرەك!» دەگەندە، ناق وسى كىسى ەلباسى ساياساتىن جالعاستىرىپ، ەلدەگى بىرلىك پەن بەرەكەنى، تىنىشتىقتى ساقتاي وتىرىپ، ەلىمىزدى العا جەتەلەيتىندىگىنە تاعى دا كوزىم جەتتى.

سوندىقتان، كەشەگى كۇن بارلىعىمىز، ونىڭ ىشىندە شەتەلدىك ماماندار دا حالىقتىڭ ساياسي ساۋاتتىلىعىنا، بەلسەندىلىگىنە كۋا بولىپ، كوڭىلىمىز تولعان كۇن بولدى!

وليمپيادا چەمپيونى

جاقسىلىق ۇشكەمپىروۆ